യു.എ.ഇയിലേക്ക്​ പോകുന്ന പ്രവാസികള്‍ ശ്രദ്ധിക്കുക; ഇന്ത്യന്‍ കോണ്‍സുലേറ്റിന്റെ മുന്നറിയിപ്പ്

ദുബൈ: ഇന്ത്യയിൽ നിന്ന്​ യു.എ.ഇയിലേക്ക്​ തൊഴിൽ തേടി പോകുന്നവർ സന്ദർശക​ വിസയയിൽ യാത്ര ചെയ്യരുതെന്ന്​ ദുബൈയിലെ ഇന്ത്യൻ ​കോൺസുലേറ്റിൻ്റെ മുന്നറിയിപ്പ്​. ഒ​ട്ടേറെപേർ കബളിപ്പിക്കപ്പെട്ട പശ്​ചാതലത്തിലാണ് മുന്നറിയിപ്പ്.​ സന്ദർശക വിസയിൽ ജോലിക്കെത്തിയ ശേഷം ഏജൻ്റുമാർ ചതിച്ചതായി പരാതിപ്പെട്ടുകൊണ്ടുള്ള ഒട്ടേറെ ഫോൺ കോളുകളാണ്​ കോൺസുലേറ്റിൽ ലഭിക്കുന്നതെന്നാണ്​ കോൺസൽ ജനറൽ വിപുൽ അറിയിച്ചു.

സന്ദർശക വിസയിൽ ജോലിക്ക്​ പോകരുതെന്നും യാത്ര തിരിക്കും മുമ്പ്​ ജോലി ഒാഫറും എൻട്രി പെർമിറ്റ്​ വിസയും ആധികാരികമാണെന്ന്​ ഉറപ്പുവരുത്തണമെന്നും അദ്ദേഹം വ്യക്​തമാക്കി.  അടുത്തിടെ ഉത്തർപ്രദേശിൽ നിന്ന്​ 27 പേരടങ്ങുന്ന സംഘം കബളിപ്പിക്കപ്പെട്ട്​ യു.എ.ഇയിൽ എത്തിയിരുന്നു. ഇവരുടെ കൈയിൽ ഭക്ഷണം കഴിക്കാൻ പോലും പണമില്ലായിരുന്നു.  കോൺസുലേറ്റ്​ ഇടപെട്ടാണ്​ വിമാന ടിക്കറ്റ്​ തരപ്പെടുത്തി നാട്ടിലേക്ക്​ മടക്കി അയച്ചത്​. നഴ്​സായ യുവതിക്ക്​ വീട്ടുജോലിക്കുള്ള വിസ നൽകിയും കബളിപ്പിച്ചു. തൊഴിൽദാതാവുമായി ബന്ധപ്പെട്ട്​ പാസ്​പോർട്ട്​ തിരികെ വാങ്ങി മടക്കി അയക്കുന്ന സംഭവങ്ങളും വ്യാപകമാണ്​. കബളിപ്പിക്കപ്പെട്ട്​ ദുരിതത്തിലായ 225 പേർക്കാണ്​ കഴിഞ്ഞ വർഷം കോൺസുലേറ്റ്​ നാട്ടിലേക്കു മടങ്ങാനുള്ള വിമാന ടിക്കറ്റ്​ സംഘടിപ്പിച്ചുനൽകിയത്​. ഇൗ വർഷം ഇതുവരെ 186 പേർക്കും ടിക്കറ്റ്​ നൽകിയിട്ടുണ്ട്​.  എമിഗ്രേഷൻ ക്ലിയറൻസോടുകൂടി യാ​ത്ര ചെയ്യുന്ന തൊഴിലാളികൾ ഇന്ത്യാ ഗവൺമെൻ്റിൻ്റെ ഇ-മൈഗ്രേറ്റ്​ ഒാൺലൈൻ റിക്രൂട്ട്​മെൻറ്​ സംവിധാനത്തിന്​ കീഴിൽ കീഴിൽ വരുന്നതാണ്​ സുരക്ഷിതം.

ജനുവരി മുതൽ ജൂൺവരെയുള്ള 792 തൊഴിൽ അവസരങ്ങൾ സംബന്ധിച്ച അന്വേഷണത്തിൽ 66 എണ്ണം മാത്രമായിരുന്നു യഥാർഥം എന്നും കണ്ടെത്തിയിരുന്നു. സ്​ഥാപനങ്ങളുടെ പേരിൽ വ്യാജ വെബ്​സൈറ്റുകൾ വരെ നിർമിച്ച്​ തൊഴിൽതട്ടിപ്പ്​ നടക്കുന്നുണ്ട്​.