ദൂലെ ആൾക്കൂട്ടക്കൊലപാതകം: ഇരുപത്തിമൂന്ന് പ്രതികളെ അറസ്റ്റ് ചെയ്തു

ഇരുപത്തിമൂന്ന് പേരെ പൊലീസ് അറസ്റ്റ് ചെയ്തു സോഷ്യൽ മീഡിയ സന്ദേശങ്ങൾ വിശ്വസിക്കരുതെന്ന് ആഭ്യന്തരമന്ത്രി

മഹാരാഷ്ട്ര:  മഹാരാഷ്ട്രയിലെ ദൂലെ  ജില്ലയിൽ  അഞ്ച് പേരെ ആൾക്കൂട്ടം മർദ്ദിച്ചു കൊലപ്പെടുത്തിയ കേസിൽ ഇരുപത്തിമൂന്ന് പേരെ പൊലീസ് അറസ്റ്റ് ചെയ്തു. ഭരത് ശങ്കർ ബോസ്ലെ, സഹോദരൻ ​ദാദാറാവു ശങ്കർ ബോസ്ലെ, രാജു ബോസ്ലെ, ഭരത് മാൽവെ, അന​ഗു ഇങ്കോളെ എന്നിവരെയാണ് കുട്ടികളെ തട്ടിക്കൊണ്ടു പോകാനെത്തിയവെരന്ന് സംശയിച്ച് ആൾക്കൂട്ടം കൊലപ്പെടുത്തിയത്. നാടോടികളായ ​ഗോത്രവംശജരായിരുന്നു ഇവർ. 

റെയിൻപാ‍ഡ ​ഗ്രാമത്തിൽ നിന്നാണ് ഇവർ ദൂലെയിലെത്തിയത്. മാർക്കറ്റിൽ വച്ച് ഇവരിലൊരാൾ പെൺകുട്ടിയോട് സംസാരിക്കാൻശ്രമിച്ചിരുന്നു. ഇത് കണ്ടപ്പോഴാണ് കുട്ടികളെ തട്ടിക്കൊണ്ടു പോകാൻ വന്നവരെന്ന് സംശയിച്ച് ആൾക്കൂട്ടം വളഞ്ഞത്. കല്ലും വടിയും ചെരിപ്പും ഉപയോ​ഗിച്ച് നിർദ്ദയം തല്ലിക്കൊല്ലുകയായിരുന്നു. ക്രൂരമർദ്ദനത്തിനിരയായ ഇവരെ ആശുപത്രിയിലെത്തിക്കാൻ ആൾക്കൂട്ടം വിസമ്മതിച്ചു. ഇവർ അഞ്ചു പേരും സംഭവ സ്ഥലത്ത് വച്ച് തന്നെ മരിച്ചിരുന്നു. പ്രതികളെ കണ്ടുപിടിച്ച് കർശന നടപടികൾ സ്വീകരിക്കുന്നത് വരെ മൃതദേഹം സ്വീകരിക്കാൻ അവർ തയ്യാറായില്ല. സർക്കാർ ഇതുവര ഈ സംഭവത്തിൽ ഇടപെട്ടില്ല എന്നിവർ ആരോപിക്കുന്നു. മരിച്ചവർക്ക് നീതി ലഭ്യമാകണം എന്നാണ് ​ഗ്രാമവാസികളുടെ ആവശ്യം. 

ആഭ്യന്തരമന്ത്രി ദീപക് കേസർക്കാർ സംഭവത്തിൽ നീതി നടപ്പാക്കുമെന്ന് കർശനമായി പ്രഖ്യാപിച്ചിട്ടുണ്ട്. തിങ്കളാഴ്ച രാവിലെ അദ്ദേഹം റെയിൻപാഡ ​ഗ്രാമം സന്ദർശിച്ചിരുന്നു. സോഷ്യൽ മീഡിയ വഴി പ്രചരിക്കുന്ന സന്ദേശങ്ങൾ ആരും വിശ്വസിക്കരുത്. നിയമം കൈയിലെടുക്കാൻ ആർക്കും അവകാശമില്ലെന്നും കേസർക്കാർ പറഞ്ഞു.