വിദ്യാര്‍ത്ഥിനിയെ കൂട്ടബലാത്സംഗത്തിനിരയാക്കി ട്രെയിനില്‍ നിന്നും വലിച്ചെറിഞ്ഞു

പട്​ന: പത്താം ക്​ളാസ്​ വിദ്യാര്‍ത്ഥിനിയെ കൂട്ടബലാത്സംഗത്തിനിരയാക്കി ട്രെയിനില്‍ നിന്നും വലിച്ചെറിഞ്ഞു. തെക്കൻ ബിഹാറിലെ ലക്ഷിസരായ്​ ജില്ലയിലാണ്​ ഞെട്ടിപ്പിക്കുന്ന സംഭവം. ഗുരുതരമായി പരിക്കേറ്റ പതിനാലുകാരി ആശുപത്രിയിൽ അത്യാഹിത വിഭാഗത്തിലാണ്.

വെള്ളിയാഴ്ച വൈകിട്ട് സ്​കൂളിൽ നിന്ന്​ മടങ്ങിയെത്തിയ ശേഷം കൂട്ടുകാരിയുടെ വീട്ടിലേക്ക്​ പോകുന്നതിനിടയിലാണ്​ പെൺകുട്ടിയെ ആറംഗ സംഘം തട്ടികൊണ്ടുപോയത്​. തുടര്‍ന്ന് കൂട്ടബലാത്സംഗത്തിന് ഇരയാക്കിയ ശേഷം സമീപത്തെ സ്​റ്റേഷനിൽ നിന്നും ബലംപ്രയോഗിച്ച്​ ട്രെയിനിൽ കയറ്റി ഓടുന്ന ട്രെയിനിൽ നിന്ന്​ പുറത്തേക്ക്​ തള്ളിയിടുകയുമായിരുന്നു.

ശനിയാഴ്​ച രാവിലെ ട്രാക്കിനരികെ രക്തത്തിൽ കുളിച്ച്​ അബോധാവസ്ഥയിലായ പെൺകുട്ടിയെ കണ്ടെത്തിയത്​.  പാട്​ന മെഡിക്കൽ കോളജ്​ ആശുപത്രിയിൽ പ്രവേശിപ്പിച്ച പെൺകുട്ടിയെ ആറു മണിക്കൂർ കഴിഞ്ഞാണ്​ അഡ്​മിറ്റ്​ ചെയ്​തതെന്നും പരാതിയുണ്ട്​.

പെൺകുട്ടി ബലത്സംഗത്തിനിരയായതായി വൈദ്യപരിശോധനയിൽ തെളിഞ്ഞതായും ആരോഗ്യനില വഷളായി​കൊണ്ടിരിക്കയാണെന്നും ആശുപത്രി അധികൃതർ അറിയിച്ചു.

സംഭവത്തിനു പിന്നിൽ ആറ് പേരാണെന്നും ഇവര്‍ പ്രായപൂര്‍ത്തിയാകാത്തവരാണെന്നും റിപ്പോര്‍ട്ടുകളുണ്ട്. പൊലീസ്​ ഒരാളെ അറസ്​റ്റു ചെയ്​തു. ഒളിവിലായ മറ്റ് പ്രതികൾക്ക്​ വേണ്ടി തെരച്ചിൽ ഊർജിതമാക്കി.