യുഎഇയില്‍ സ്വര്‍ണ്ണവില ഇടിഞ്ഞു; ആറ് മാസത്തെ ഏറ്റവും കുറഞ്ഞ നിരക്ക്

മികച്ച വിലയില്‍ സ്വര്‍ണ്ണം വാങ്ങാന്‍ അവസരം

ഡോളർ ശക്തിപ്പെട്ടതോടെ യുഎഇയില്‍ സ്വർണ്ണവില ആറുമാസത്തെ ഏറ്റവും കുറഞ്ഞ നിരക്കിലെത്തി. വിലയിടിഞ്ഞത് സ്വർണ്ണവിപണിക്ക് കരുത്ത് പകരുമെന്നാണ് വ്യാപാരികളുടെ കണക്കുകൂട്ടൽ. ഇതിനിടെ, ദിർഹം- രൂപ വിനിമയനിരക്കും ഉയർന്നത് നാട്ടിലേക്ക് പണം അയയ്ക്കുന്ന പ്രവാസികൾക്ക് ഗുണകരമായി.

ഈ വര്‍ഷത്തെ ഏറ്റവും കുറഞ്ഞ വിലയിലാണ് ഇന്ന് സ്വര്‍ണ്ണ വില്‍പന നടന്നത്. ഗ്രാമിന് 142.75. കഴിഞ്ഞ മാസത്തെ വിലയേക്കാള്‍ 5 ദിര്‍ഹം കുറവ്. ഡോളർ കൂടുതൽ കരുത്താർജിച്ചതോടെയാണ് അന്താരാഷ്​ട്ര വിപണിയിൽ സ്വർണ്ണവിലയില്‍ വ്യതിയാനം അനുഭവപ്പെടുന്നത്. ഗള്‍ഫില്‍ സ്​കൂളുകള്‍ അടയ്ക്കാൻ ദിവസങ്ങൾ മാത്രം ബാക്കി നിൽക്കെ അവധിക്ക്​ നാട്ടിലേക്ക്​ പോകാൻ ഒരുങ്ങുന്നവരാണ്​ ഇന്ന് സ്വർണം വാങ്ങാനെത്തിയവരില്‍ ഏറെയും​. വിവിധ ജ്വല്ലറി ഗ്രൂപ്പുകൾ പ്രഖ്യാപിച്ച വേനൽക്കാല സമ്മാന പദ്ധതികളും ആനുകൂല്യങ്ങളും കൂടി ലഭിച്ചതോടെ മികച്ച വിലയിൽ സ്വർണ്ണം വാങ്ങാന്‍ അവസരമൊരുങ്ങി. യുഎഇയില്‍ മൂല്യവർധിത നികുതി നിലവിൽ വന്നതിനെത്തുടര്‍ന്ന് സ്വർണ്ണവിപണിയിലുണ്ടായ മാന്ദ്യത്തിന് പ്രകടമായ മാറ്റം വന്നതായി കച്ചവടക്കാര്‍ പറഞ്ഞു. 

ഇതിനിടെ, ദിർഹം-രൂപ വിനിമയനിരക്കും ഉയർന്നത് നാട്ടിലേക്ക് പണം അയയ്ക്കുന്ന പ്രവാസികൾക്ക് ഗുണകരമായി. ഈ മാസം ആദ്യത്തോടെ ഉയർന്ന ദിർഹം-രൂപ വിനിമയനിരക്ക് 18.57 എന്ന നിരക്കിലെത്തിയതോടെ പണമിടപാട് സ്ഥാപനങ്ങളില്‍ ഇന്ന് നല്ല തിരക്കാണ് അനുഭവപ്പെട്ടത്. മാസാവസാനമായതുകൊണ്ട് തന്നെ ക്രഡിറ്റ് കാര്‍ഡ് ഉപയോഗിച്ച് സ്വര്‍ണം വാങ്ങുകയും പണമയയ്ക്കുകയും ചെയ്തവര്‍ കുറവല്ല.