കശ്മീരില്‍ ഹുറിയത്​ നേതാവ് ഉമർ ഫാറൂഖ്​ അറസ്​റ്റിൽ

ശ്രീനഗർ: കശ്​മീരിൽ ഹുറിയത്​ കോ​ൺഫറൻസ്​ ചെയർമാൻ മിർവായീസ്​ ഉമർ ഫാറൂഖിനെ പൊലീസ്​ അറസ്​റ്റു ചെയ്തു. ആദ്യമായാണ്​ ഹുറിയത്​ ചെയർമാനെ അറസ്​റ്റ്​ ചെയ്യുന്നത്​. മുമ്പ് നിരവധി തവണ വീട്ടുതടങ്കലിലാക്കിയിരുന്നു. ഈദ്​​ഗാഹ്​ മേഖലയിലേക്ക്​ മാർച്ച്​ നടത്താനുള്ള ശ്രമത്തിനിടെ വെള്ളിയാഴ്​ചയാണ്  ഉമറിനെ കസ്​റ്റഡിയിലെടുത്തത്. പിന്നീട് അറസ്റ്റ് രേഖപ്പെടുത്തി.

കശ്മീരില്‍ സാധാരണ നില പുനസ്​ഥാപിക്കപ്പെടുന്നതുവരെയുള്ള താൽകാലിക നടപടിയാണിതെന്ന്​ സംസ്​ഥാന സർക്കാർ വക്​താവും വിദ്യാഭ്യാസ മ​​​​​​​ന്ത്രിയുമായ നയീം അക്​തർ അറിയിച്ചു. എന്നാൽ പൊലീസ്​ ഇതു സംബന്ധിച്ച്​ ​പ്രതികരിച്ചിട്ടില്ല.

അറസ്റ്റിനെ വിഘടന വാദി നേതാവ്​ സയ്യിദ്​ അലി ഷാ ഗിലാനി അപലപിച്ചു​.  സംസ്​ഥാനത്തി​ന്‍റെയും കേന്ദ്രത്തി​ന്‍റെയും  ഭീരുത്വവും ബാലിശവുമായ നീക്കമാണിതെന്നായിരുന്നു ഗീലാനിയുടെ പ്രതികരണം.  

ജൂലൈ എട്ടിന്​ ഹിസ്​ബുൽ മുജാഹിദീൻ കമാൻഡർ ബുർഹാൻ വാനി സൈന്യവുമായുള്ള ഏറ്റുമുട്ടലില്‍ കൊല്ലപ്പെട്ടതിനെത്തുടർന്നാണ്​ കശ്​മീരിൽ സംഘർഷം പൊട്ടിപുറപ്പെട്ടത്​. തുടർന്ന്​ പ്രദേശത്ത് 50 ദിവസമായി കർഫ്യൂ തുടരുകയാണ്​. പ്രക്ഷോഭകരും സുരക്ഷ സൈനികരുമായുള്ള സംഘർഷത്തിൽ ഇതുവ​രെ 70 പേർ കൊല്ലപ്പെട്ടു.