അര്‍ജന്‍റീന തോറ്റത് എംബാപ്പെയുടെ വേഗത്തിന് മുന്നില്‍: ഐ.എം.വിജയന്‍

'ലീഡ് കിട്ടിയപ്പോഴാണ് അര്‍ജന്‍റീന മോശമായി കളിച്ചത്'

എക്കാലത്തെയും തന്‍റെ പ്രിയ ടീമായ അര്‍ജന്‍റീന പ്രീ ക്വാര്‍ട്ടറില്‍ ഫ്രാന്‍സിനോട് തോറ്റ് പുറത്തുപോകുന്നതിന്‍റെ നിരാശയിലാണ് മുന്‍ ഇന്ത്യന്‍ ക്യാപ്റ്റന്‍ ഐ.എം.വിജയന്‍. 4-3 എന്നത് ഭയങ്കര സ്കോര്‍ ആണെന്നും ലീഡ് ലഭിച്ച സമയത്ത് ടീമിന്‍റെ കളി മോശമായെന്നും വിജയന്‍ വിലയിരുത്തുന്നു. ഏഷ്യാനെറ്റ് ന്യൂസിന് വേണ്ടി അര്‍ജന്‍റീന-ഫ്രാന്‍സ് മത്സരം വിലയിരുത്തുകയായിരുന്നു അദ്ദേഹം.

"4-3 എന്നത് ഭയങ്കര സ്കോര്‍ ആയിപ്പോയി. ഇത്രയും പ്രതീക്ഷിച്ചില്ല. ലീഡ് കിട്ടിയപ്പോഴാണ് അര്‍ജന്‍റീന മോശമായി കളിച്ചത്. അല്ലെങ്കില്‍ ആ സമനില ഗോളൊന്നും ഒരിക്കലും മേടിക്കാന്‍ പാടില്ലാത്തതാണ്. ഡിഫന്‍ഡര്‍ തന്‍റെ ബൂട്ടിലേക്ക് വന്ന ക്രോസ് കറക്ടായി ക്ലിയര്‍ ചെയ്യുന്നതിന് പകരം ഹീല്‍ കൊണ്ട് തട്ടാന്‍ നോക്കിയതാണ് ഭയങ്കര പ്രശ്നമായത്. യുവതാരം കൈലിയന്‍ എംബാപ്പെയുടെ വേഗത്തിന് മുന്നിലാണ് അര്‍ജന്‍റീന തോറ്റത്."

ഭാര്യയ്ക്കും മക്കള്‍ക്കും സുഹൃത്തുക്കള്‍ക്കുമൊപ്പമാണ് വിജയന്‍ അര്‍ജന്‍റീനയുടെ കളി കണ്ടത്.