ഇന്ത്യ -സൗദി വാണിജ്യ ബന്ധം വളർച്ചയുടെ പാതയിലെന്ന് വിദഗ്ധർ

സൗദി: ഇന്ത്യ -സൗദി വാണിജ്യ ബന്ധം വളർച്ചയുടെ പാതയിലെന്ന് നയതന്ത്ര വിദഗ്ധർ. 'ഇന്ത്യ-സൗദി സാമ്പത്തിക സഹകരണവും നിക്ഷേപ സാധ്യതകളും' എന്ന വിഷയത്തിൽ റിയാദിൽ നടന്ന സെമിനാറിലാണ്ഈ നിരീക്ഷണം. പ്രവാസികൾ സൗദിയിലെ നിക്ഷേപ സാധ്യതകൾ പ്രയോജനപ്പെടുത്തണമെന്ന് ഇന്ത്യൻ സ്ഥാനപതി ഉൾപ്പെടെയുള്ളവർ അഭിപ്രായപ്പെട്ടു.

ഇന്ത്യയും സൗദിയും തമ്മിലുള്ള വ്യാപാര വാണിജ്യ ബന്ധം കൂടുതൽ ശക്തിപ്പെടുത്തണമെന്നും ഇരു രാജ്യങ്ങളുടെയും സാമ്പത്തിക വളർച്ചക്ക് ഇത് കരുത്തുപകരുമെന്നും സെമിനാര്‍ വിലയിരുത്തി. ജനാദ്രിയ ഫെസ്റ്റിവലിനോട് അനുബന്ധിച്ച് രണ്ടു ദിവസങ്ങളിലായി നടന്ന സെമിനാറിൽ ഇന്ത്യൻ അംബാസഡർ അഹമ്മദ് ജാവേദ്, ഇന്ത്യയിലെ സൗദി അംബാസഡർ ഡോ.സൗദ് മുഹമ്മദ് അൽ സാത്തി, ഇന്ത്യൻ കൌൺസിൽ ഫോർ വേൾഡ് അഫയേഴ്‌സ് ഡയറക്ടർ ജനറൽ നളിൻ സൂരി എന്നിവർ സംസാരിച്ചു.

ഇരു രാജ്യങ്ങളിലെയും സംരംഭകർക്ക്‌ നിക്ഷേപത്തിനായി ധാരാളം സാധ്യതകളുണ്ടെങ്കിലും അതൊന്നും ശരിയായ രീതിയിൽ വിനിയോഗിക്കപ്പെടുന്നില്ലെന്നും അറബ് ചേംബറിന്റെയും ഗൾഫ് ചേംബറിന്റയും ഭാരവാഹികൾ സെമിനാറിൽ അഭിപ്രായപ്പെട്ടു. ഇരു രാജ്യങ്ങളിലെയും വ്യവസായ വാണിജ്യ രംഗത്തെ പ്രമുഖരും സെമിനാറിൽ പങ്കെടുത്തു.