ദുബായില്‍ വിനോദസഞ്ചാരത്തിന് പോയ ഇന്ത്യന്‍ യുവാവിന് ദാരുണാന്ത്യം; ഭാര്യ ഗുരുതരവാസ്ഥയില്‍

ദുബായില്‍ വിനോദ സഞ്ചാരത്തിനെത്തിയ ഇന്ത്യന്‍ വ്യാപാരി വാഹനാപകടത്തില്‍ മരിച്ചു. ഭാര്യ ഗുരുതരാവസ്ഥയില്‍ റാഷിദ് ആശുപത്രി ഐ.സി.യുവില്‍ തുടരുന്നു. കര്‍ണ്ണാടകയിലെ ബെല്ലാരി സ്വദേശിയായ റെഡ്‍മെയ്ഡ് വസ്‌ത്ര വ്യാപാരി ദിനേഷ് കവാദ് (39) ആണ് അല്‍ അവീറിലെ എമിറേറ്റ്സ് റോഡില്‍ നടന്ന അപകടത്തില്‍ മരണപ്പെട്ടത്. 37കാരിയായ ഭാര്യ നീതു ഗുരുതരാവസ്ഥയിലാണ്.

ഡെസേര്‍ട്ട് സഫാരിക്കായി മിനി വാനില്‍ പോകുമ്പോഴായിരുന്നു അപകടം. മുന്നിലുള്ള ട്രക്കുമായി വാഹനം കൂട്ടിയിടിച്ചു. വിവിധ രാജ്യക്കാരായ മൂന്ന് ദമ്പതികളാണ് വാഹനത്തിലുണ്ടായിരുന്നത്. ദിനേഷും പാകിസ്ഥാനിയായ ഡ്രൈവറും മരണപ്പെട്ടു. വാഹനങ്ങള്‍ തമ്മില്‍ സുരക്ഷിതമായ അകലം പാലിക്കാത്തതാണ് അപകടത്തില്‍ കലാശിച്ചതെന്ന് ദുബായ് പൊലീസ് പറഞ്ഞു. വാഹനത്തിലുണ്ടായിരുന്ന മറ്റു രണ്ട് ദമ്പതിമാര്‍ പരുക്കേല്‍ക്കാതെ രക്ഷപ്പെട്ടു. ഡെസേര്‍ട്ട് സഫാരി ബുക്ക് ചെയ്തിരുന്ന ഏജന്‍സിയുടെ വാഹനത്തിലാണ് ഇവര്‍ യാത്ര ചെയ്തിരുന്നത്.