ഭരണകൂടത്തില്‍ ഏറ്റവും കൂടുതല്‍ വിശ്വാസമുള്ളത് ഇന്ത്യക്കാര്‍ക്കെന്ന് സര്‍വ്വേ

ഡൽഹി: ഭരിക്കുന്ന സർക്കാറിൽ ഏറ്റവും കൂടുതൽ പേർ വിശ്വാസമർപ്പിക്കുന്ന രാജ്യം ഇന്ത്യയാണെന്ന്​ സർവെ റി​പ്പോർട്ട്​. ഓർഗനൈസേഷൻ ഫോർ ഇക്കണോമിക്​ കോഓപ്പറേഷൻ ആൻ്റ് ഡെവലപ്​മെൻറ്​ (ഒ.ഇ.സി.ഡി) അംഗരാജ്യങ്ങളിൽ നടത്തിയ സർവെയിലാണ്​ ഇത്​ പുറത്തുവന്നത്​. ഇന്ത്യയിലെ 73 ശതമാനം പേർ രാജ്യത്തെ ഭരണകൂടത്തെ വിശ്വസിക്കുന്നുണ്ടെന്നാണ്​ സർവെ പറയുന്നത്​.

ഇന്ത്യക്ക്​ പിറകിൽ കാനഡയും (63%)  തുർക്കിയും റഷ്യയും(58% വീതം) ജർമനി (55%)യുമാണ്​. കഴിഞ്ഞ വർഷം 15 രാജ്യങ്ങളിലായാണ്​ സർവെ നടത്തിയത്​. കുടിയേറ്റ പ്രതിസന്ധി, ബാങ്കുകൾ അടച്ചുപൂട്ടൽ തുടങ്ങിയ പ്രതിസന്ധികൾ അഭിമുഖീകരിച്ച ഗ്രീസ്​ ആണ്​ വിശ്വാസത്തിൽ ഏറ്റവും പിറകിൽ നിൽക്കുന്ന രാജ്യം.

13 ശതമാനം പേർക്ക്​ മാത്രമേ ഗ്രീസ്​ ഭരണകൂടത്തിൽ പ്രതീക്ഷയുള്ളൂവെന്നാണ്​ സ​ർവെ പറയുന്നത്​. ബ്രിട്ടന്​ 41 ശതമാനത്തി​ൻ്റെയും ജപ്പാന്​ 36 ശതമാനത്തി​ൻ്റെയും അമേരിക്കക്കും സ്​പെയിനിനും 30 ശതമാനത്തിൻ്റെയും ഫ്രാൻസിന്​ 28 ശതമാനത്തി​ൻ്റെയും വിശ്വാസം നേടാനായിട്ടുള്ളൂവെന്നാണ്​ സർവെ പറയുന്നത്​.