വയനാട്ടില്‍ അന്താരാഷ്ട്ര ചക്ക മഹോത്സവം ജൂലൈ ഒന്‍പത് മുതൽ

ജൂലൈ ഒന്‍പത് മുതല്‍ 15 വരെയാണ് ചക്കമഹോത്സവം

കോഴിക്കോട്: കേരള സംസ്ഥാന കാര്‍ഷിക വികസന കര്‍ഷക ക്ഷേമ വകുപ്പിന്‍റേയും കേരള കാര്‍ഷിക സര്‍വകലാശാലയുടേയും സംയുക്താഭിമുഖ്യത്തില്‍ വയനാട് അമ്പലവയല്‍ മേഖലാ കാര്‍ഷിക ഗവേഷണ കേന്ദ്രത്തില്‍ ജൂലൈ ഒന്‍പത് മുതല്‍ 15 വരെ അന്താരാഷ്ട്ര ചക്ക മഹോത്സവം-2018 നടത്തുന്നു. കേരളത്തിന്‍റെ സുപ്രധാന ഭക്ഷ്യവിളയായ ചക്ക ഔദ്യോഗിക ഫലമായി പ്രഖ്യാപിക്കപ്പെട്ട സാഹചര്യത്തില്‍ ചക്കയുടെ മൂല്യവർധിത സാധ്യതകളും വിപണന ശൃംഖലകളും കണ്ടെത്തി തൊഴില്‍ മേഖലകളെ ശക്തിപ്പെടുത്തുവാനും മികച്ച വരുമാനം കണ്ടെത്താനുമുളള അവസരങ്ങള്‍ ഒരുക്കുകയാണ് മേളയുടെ ലക്ഷ്യം. 

മലേഷ്യ, ശ്രീലങ്ക, വിയറ്റ്നാം തുടങ്ങി ഭാരതത്തിന്‍റെ വിവിധ സംസ്ഥാനങ്ങളില്‍ നിന്നുമുളള ശാസ്ത്രജ്ഞര്‍, വ്യവസായികള്‍ പങ്കെടുക്കുന്ന സിമ്പോസിയം ഏഴ് ദിവസങ്ങളിലായി നടത്തപ്പെടും. സ്ത്രീ സംരംഭകര്‍ക്കുളള അഞ്ച് ദിവസത്തെ സൗജന്യ പരിശീലന പരിപാടി ജൂലൈ ഒന്‍പത് മുതല്‍ 13 വരെ സംഘടിപ്പിക്കും. പരിപാടിയുടെ ഏറ്റവും വലിയ ആകര്‍ഷണം 18 വിഭവങ്ങള്‍ അടങ്ങിയ ചക്ക സദ്യ ആയിരിക്കും. ആദിവാസി സംഗമവും വിത്തുത്സവവും ഇതിനോടു കൂടെ ഉണ്ടായിരിക്കും. 

ഭക്ഷ്യ വൈവിധ്യം ചക്കയില്‍ എന്ന വിഷയത്തില്‍ സ്ത്രീകള്‍ക്ക് മൂന്ന് ദിവസങ്ങിലായി എകദിന പരിശീലന പരിപാടി നടത്തും. വ്യത്യസ്ത ഇനം ചക്കകളുടെ ബൃഹത്തായ പ്രദര്‍ശനം, മൂല്യവര്‍ധിത ഉത്പന്നങ്ങളുടെ പ്രദര്‍ശനവും വില്പനയും, സെമിനാറുകള്‍, ഗ്രൂപ്പ് ചര്‍ച്ചകള്‍ എന്നിവയും ഉണ്ടായിരിക്കും. മഹോത്സവത്തോടനുബന്ധിച്ച് ചക്കയിലെ കൊത്തുപണി, ചക്കപാചകം, മികച്ച ചക്ക, ചക്ക ചിത്രരചന, ചക്ക ഫോട്ടൊഗ്രാഫി എന്നിവയില്‍ മത്സരങ്ങളും സംഘടിപ്പിക്കും. വിവിധ പരിപാടികളിലേക്കുളള രജിസ്ട്രഷന്‍, വിശദ വിവരങ്ങള്‍ എന്നിവ അറിയുന്നതിന് rarsamb@kau.in/shajeesh.jan@Kau.in ,mailto:rarsamb@kau.in/shajeesh.jan@Kau.in എന്നീ ഇ മെയില്‍ വിലാസങ്ങളിലോ 04936 260421, 04936 260561 എന്നീ ഫോണ്‍ നമ്പറുകളില്‍ ബന്ധപ്പെടാവുന്നതാണെന്ന്  അസിസ്റ്റന്‍റ് ഡയറക്റ്റര്‍ ഒഫ് അഗ്രികള്‍ച്ചര്‍ അറിയിച്ചു.