രാഷ്ട്രപതിയുടെ പൊലീസ് മെഡല്‍ദാന ചടങ്ങ് ജേക്കബ് തോമസ് ബഹിഷ്കരിച്ചു

തിരുവനന്തപുരം: സ്വാതന്ത്ര്യ ദിനാഘോഷത്തിലെ പൊലീസ് മെഡല്‍ദാന ചടങ്ങ് ഡി.ജി.പി ജേക്കബ് തോമസ് ബഹിഷ്കരിച്ചു. രാഷ്ട്രപതിയുടെ പൊലീസ് മെഡലിന് അര്‍ഹനായ ജേക്കബ് തോമസ് എന്നാല്‍ മുഖ്യമന്ത്രിയുടെ കൈയ്യില്‍ നിന്ന് മെഡല്‍ വാങ്ങാൻ എത്തിയില്ല.

സേവന കാലത്തുടനീളം പ്രകടിപ്പിച്ച മികവിനും ആത്മാര്‍ത്ഥതക്കും നേതൃപാടവത്തിനും കര്‍മ്മധീരതക്കുമുള്ള അംഗീകാരമായാണ് ഉദ്ദ്യോഗസ്ഥര്‍ക്ക് രാഷ്ട്രപതിയുടെ പൊലീസ് മെഡല്‍ ലഭിക്കുന്നത്. സംസ്ഥാനത്തുനിന്ന് ഇത്തവണ മെഡലിന് അര്‍ഹരായവരില്‍ ആദ്യത്തെ പേര് തന്നെ ജേക്കബ് തോമസിന്റേതായിരുന്നു. എന്നാല്‍ മെഡല്‍ വാങ്ങാന്‍ റിപ്പബ്ലിക് ദിന പരേഡ് നടന്ന സെന്‍ട്രല്‍ സ്റ്റേഡിയത്തില്‍ ജേക്കബ് തോമസ് എത്തിയില്ല. പൊലീസ് മെഡലിന് അര്‍ഹരായവരുടെ പേരും വിവരങ്ങളും ഫോട്ടോയും ഉള്‍പ്പെടുത്തി പൊതുഭരണ വകുപ്പ് ഇറക്കിയ ബുക്ക്‍ലെറ്റിലും ജേക്കബ് തോമസിന്റെ ഫോട്ടോ ഉണ്ടായിരുന്നില്ല. പേരും സ്ഥാനപ്പേരും മാത്രമാണ് ഉണ്ടായിരുന്നത്. എന്ത് കൊണ്ട് മെഡല്‍ വാങ്ങാന്‍ എത്തിയില്ല എന്ന് പ്രതികരിക്കാന്‍ ജേക്കബ് തോമസ് തയ്യാറായില്ല.