പ്രണയാഭ്യര്‍ത്ഥന നിരസിച്ചതിന് കോയമ്പത്തൂരില്‍ പെണ്‍കുട്ടിയെ മലയാളി യുവാവ് കുത്തിക്കൊന്നു

ബുധനാഴ്ച രാത്രിയായിരുന്നു സംഭവം. എഞ്ചിനീയറിങ് ബിരുദധാരിയായ ധന്യ അടുത്തിടെയാണ് ഒരു സ്വകാര്യ കമ്പനിയില്‍ ജോലിയില്‍ പ്രവേശിച്ചത്. വീടിന് സമീപത്ത് താമസിക്കുന്ന പാലക്കാട് സ്വദേശി സഹീര്‍ നേരത്തെ ധന്യയോട് പ്രണയാഭ്യര്‍ത്ഥന നടത്തിയിരുന്നെങ്കിലും നിരസിക്കുകയായിരുന്നു. ഇതിനിടെ 10 ദിവസം മുമ്പ് മറ്റൊരാളുമായി ധന്യയുടെ വിവാഹവും നിശ്ചയിച്ചു. ബുധഘനാഴ്ച രാത്രി എട്ടു മണിയോടെ അന്നൂരിലെ വീട്ടില്‍ ധന്യ തനിച്ചായിരുന്ന സമയത്ത് അവിടെയെത്തിയ സഹീര്‍ കത്തികൊണ്ട് ധന്യയുടെ കഴുത്തറുക്കുകയായിരുന്നു. രാത്രി വീട്ടിലെത്തിയ അമ്മയാണ് രക്തത്തില്‍ കുളിച്ച നിലയില്‍ മകളുടെ മൃതദേഹം വീട്ടിനുള്ളില്‍ കണ്ടെത്തിയത്. ഉടന്‍ പൊലീസിനെ വിവരമറിയിച്ചു.

സംഭവത്തിന് ശേഷം പാലക്കാട്ടേക്ക് കടന്ന സഹീര്‍ അവിടെ വെച്ച് വിഷം കഴിച്ച് ആത്മഹത്യക്ക് ശ്രമിച്ചു. ഇയാളിപ്പോള്‍ ചികിത്സയിലാണ്. ധന്യയുടെ മൃതദേഹം പോസ്റ്റ്മോര്‍ട്ടത്തിന് ശേഷം ബന്ധുക്കള്‍ക്ക് വിട്ടുനല്‍കും. കോയമ്പത്തൂരില്‍ നിന്നുള്ള പൊലീസ് സംഘം പാലക്കാട്ട് എത്തിയിട്ടുണ്ട്.