കെവിന്റെ കൊലപാതകം; പൊലീസുക്കാര്ക്ക് നടപടി
Synopsis
കോട്ടയം എസ്പി വി.എം. മുഹമ്മദ് ഫറീഖിനെ സ്ഥലം മാറ്റി. ഗാന്ധിനഗര് എസ് ഐ എം.എസ്. ഷിബുവിന് സസ്പെന്ഷന്. എസ്ഐയേയും സസ്പെന്ഡ് ചെയ്തു
കോട്ടയം: കെവിന് കൊല ചെയ്യപ്പെട്ട സംഭവത്തില് വീഴ്ച്ച പറ്റിയതിനെ തുടര്ന്ന് പൊലീസുക്കാര്ക്ക് നടപടി. കോട്ടയം എസ്പി വി.എം. മുഹമ്മദ് ഫറീഖിനെ സ്ഥലം മാറ്റി. ഗാന്ധിനഗര് എസ് ഐ എം.എസ്. ഷിബുവിന് സസ്പെന്ഷന്. കൂടാതെ എസ്ഐയേയും സസ്പെന്ഡ് ചെയ്തു.
സംഭവത്തില് കോട്ടയം പോലീസിന് ഗുരുതരവീഴ്ച്ച സംഭവിച്ചെന്ന് ആക്ഷേപം ഉയര്ന്നിരുന്നു. ശനിയാഴ്ച്ച പുലര്ച്ചെ തട്ടിക്കൊണ്ടു പോയ കെവിനെ കണ്ടെത്താനുള്ള നടപടികള്ക്ക് വൈകുന്നേരം നാല് മണിക്കാണ് പോലീസ് തുടക്കമിടുന്നത്. ഒരല്പം ഉത്തരവാദിത്തം പോലീസ് കാണിച്ചിരുന്നെങ്കില് കെവിനെ ജീവനോടെ രക്ഷിക്കാമായിരുന്നു എന്നാണ് പോലീസിന് നേരെ ഉയരുന്ന പ്രധാന വിമര്ശനം. സംഭവത്തില് കെവിന്റെ ഭാര്യയുടെ ബന്ധുകളുമായി ചേര്ന്ന് ഗാന്ധി നഗര് എസ്.ഐ ഒത്തുകളിക്കുകയായിരുന്നുവെന്ന ഗുരുതര ആരോപണമാണ് കെവിന്റെ ബന്ധുകള് ഉന്നയിച്ചിരുന്നു.
അതേസമയം, സംഭവത്തില് മൂന്ന് പേര് പിടിയിലായി. ഇഷാന്, നിയാസ്, റിയാസ് എന്നിവരാണ് പിടിയിലായത് . നീനുവിന്റെ സഹോദരനെയും സംഘത്തെയും പൊലീസ് തെരയുന്നു. കെവിന്റെ മൃതദേഹം നാളെ പോസ്റ്റ്മോര്ട്ടം ചെയ്യും. പത്താനപുരത്തുള്ള നീന എന്ന യുവതിയും കുമാരനെല്ലൂര് സ്വദേശി കെവിനും വീട്ടുകാരുടെ എതിര്പ്പിനെ മറികടന്നാണ് രജിസ്റ്റര് വിവാഹം ചെയ്തത്. എന്നാല് വിവാഹത്തിന് ശേഷവും ബന്ധുകളില് നിന്ന് ഭീഷണി നേരിട്ടതിനാല് നീനയെ കെവിന് കോട്ടയത്തെ ഹോസ്റ്റലില് പാര്പ്പിക്കുകയും, ആക്രമണം മുന്നില് കണ്ട് കെവിന് മാന്നാനത്തെ ബന്ധുവീട്ടിലേക്ക് താമസം മാറുകയും ചെയ്തു.
ശനിയാഴ്ച്ച പുലര്ച്ചെ മൂന്ന് മണിയോടെ മാന്നാനത്തെ ഈ ബന്ധുവീട്ടിലേക്കാണ് മൂന്ന് കാറിലായി നീനയുടെ സഹോദരനും സംഘവും എത്തുന്നത്. നീനയെ എവിടെ എന്നു ചോദിച്ചു കൊണ്ട് വീട്ടിലേക്ക് കയറിയ സംഘം അവരെ കണ്ടെത്താന് സാധിക്കാതെ വന്നതോടെ കെവിനേയും ബന്ധു അനീഷിനേയും പിടികൂടി കൊണ്ടു പോയി. ഈ സംഭവം നടന്ന് അല്പസമയത്തിനകം തന്നെ കെവിന്റെ ബന്ധുകള് ഗാന്ധിനഗര് പോലീസ് സ്റ്റേഷനിലെത്തി പരാതി നല്കി.
കെവിനൊപ്പം കൊണ്ടു പോയ ബന്ധു അനീഷിനെ മര്ദ്ദിച്ച ശേഷം പിന്നീട് സംഘം വഴിയില് ഉപേക്ഷിച്ചു. നീനുവിനെ വിട്ടുതന്നാല് കെവിനെ വിടാം എന്നും ഇവര് അനീഷിനോട് പറഞ്ഞു. മര്ദ്ദനമേറ്റു നീരുവീര്ത്ത മുഖവുമായി അനീഷും ഗാന്ധിനഗര് സ്റ്റേഷനിലെത്തി കാര്യങ്ങള് പോലീസിനെ അറിയിച്ചു. രാവിലെയോടെ കോട്ടയം നഗരത്തിലെ ഒരു ഹോസ്റ്റലില് താമസിക്കുന്ന കെവിന്റെ ഭാര്യ നീനയും സ്റ്റേഷനിലെത്തി ഭര്ത്താവിനെ കാണാനില്ലെന്ന് പരാതി നല്കി. ഇങ്ങനെ മൂന്ന് പരാതികള് ഒരു സംഭവത്തില് കിട്ടിയിട്ടും വൈകുന്നേരമാണ് കെവിനെ തേടി പോലീസ് സ്റ്റേഷന് പുറത്തേക്ക് ഇറങ്ങുന്നത്.
മുഖ്യമന്ത്രി കോട്ടയത്തെ പരിപാടിയില് പങ്കെടുക്കാന് വരുന്നതിനാല് സുരക്ഷയൊരുക്കാന് പോകണമെന്നും മറ്റുമുള്ള മുടന്തന് ന്യായങ്ങള് പറഞ്ഞ് ഗാന്ധിനഗര് എസ്.ഐ ഷിബു നടപടികള് വൈകിപ്പിക്കായായിരുന്നുവെന്ന് കെവിന്റെ ബന്ധുകള് ആരോപിക്കുന്നു. ബന്ധുകള് ഒരുപാട് യാചിച്ചതോടെ രാവിലെ പതിനൊന്നരയോടെ പോലീസ് സംഭവത്തില് എഫ്.ഐ.ആര് ഇട്ടു. എന്നാല് അതിനപ്പുറം കെവിന് കണ്ടെത്താനുള്ള നടപടികളിലേക്ക് പോലീസ് പോയില്ല.
പിന്നീട് വൈകുന്നേരത്തോടെ ജനങ്ങള് സ്റ്റേഷനില് മുന്നില് തടിച്ചു കൂടി പ്രതിഷേധിക്കുകയും, ജനപ്രതിനിധികളും മാധ്യമങ്ങളും വിഷയത്തില് ഇടപെടുകയും ചെയ്തതോടെയാണ് സ്ഥിതി മാറുന്നത്. തുടര്ന്ന് പുനലൂര് ഡിവൈഎസ്പി ഗാന്ധിനഗര് സ്റ്റേഷനിലെത്തി കേസന്വേഷണത്തിന്റെ മേല്നോട്ടം ഏറ്റെടുത്തു. ഇതോടെ കാര്യങ്ങള് വേഗത്തിലായി.
തെന്മല ഭാഗത്തേക്കാണ് കെവിനെ തട്ടിക്കൊണ്ടു പോയ സംഘം സഞ്ചരിക്കുന്നതെന്ന് പോലീസ് കണ്ടെത്തി. ആ ഭാഗത്തേക്ക് തിരച്ചില് വ്യാപകമാക്കാന് നിര്ദേശം നല്കി. തട്ടിക്കൊണ്ടു പോകാനുപയോഗിച്ച കാറിന്റെ ഉടമസ്ഥനെ കണ്ടെത്തി അറസ്റ്റ് ചെയ്തു. രാത്രിയോടെ അക്രമി സംഘത്തിലുണ്ടായിരുന്ന വിശാല് എന്നയാളേയും പോലീസ് പിടികൂടി. എന്നാല് യാത്രാമധ്യേ തങ്ങളില് നിന്നും കെവിന് രക്ഷപ്പെട്ടന്ന മൊഴിയാണ് ഇയാള് പോലീസിന് നല്കിയത്. തുടര്ന്ന് കെവിനെ കണ്ടെത്താനായി രാത്രി വൈകിയും പുനലൂര് തെന്മല ഭാഗത്ത് പോലീസ് തിരച്ചില് നടത്തി. ഇതിന് ശേഷമാണ് ഇന്ന് പുലര്ച്ചയോടെ ചാലിയേക്കരയിലെ തോടില് മുങ്ങിയ നിലയില് കെവിന്റെ മൃതദേഹം കണ്ടെത്തിയത്.
ഇന്ത്യയിലെയും ലോകമെമ്പാടുമുള്ള എല്ലാ Malayalam News അറിയാൻ എപ്പോഴും ഏഷ്യാനെറ്റ് ന്യൂസ് മലയാളം വാർത്തകൾ. Malayalam News Live എന്നിവയുടെ തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam