ലോ അക്കാദമി സമരം ഇന്ന് ഇരുപത്തിനാലാം ദിവസത്തിലേക്ക്

തിരുവനന്തപുരം: ലോ അക്കാദമി സമരം ഇന്ന് ഇരുപത്തിനാലാം ദിവസത്തിലേക്ക് .  സമരം ഒത്ത് തീർപ്പാക്കാനായി ജില്ലാ ഭരണകൂടം ഇടപെട്ട് നടത്തിയ ചർച്ച കഴിഞ്ഞ ദിവസം പരാജയപ്പെട്ടിരുന്നു. ലക്ഷ്മിനായരെ പ്രിൻസിപ്പൽ സ്ഥാനത്തു നിന്നും പുറത്താക്കിയുള്ള മിനുട്ട്സ് ഹാജരാക്കിയാലേ ചർച്ചക്കുള്ളൂ എന്ന് വിദ്യാർത്ഥികൾ നിർബന്ധം പിടിച്ചതോടെയാണ് ചര്‍ച്ച പൊളിഞ്ഞത്. ഇന്നും അനുരഞ്ജന ചര്‍ച്ചകൾ തുടരും . 

അതേസമയം പ്രശ്നത്തിൽ വിദ്യാഭ്യാസമന്ത്രി ഇടപെടണമെന്ന ആവശ്യവും ഒരു വിഭാഗം വിദ്യാര്‍ത്ഥികൾ ഉന്നയിക്കുന്നുണ്ട്. സ്ഥലം എംഎൽഎ കൂടിയായ കോണ്‍ഗ്രസ് നേതാവ് കെ മുരളീധരനും ബിജെപി നേതാവ് വിവി രാജേഷും അനിശ്ചിതകാല സമരം തുടരുകയാണ് .