പേട്ടയിൽ ട്രെയിനിറങ്ങിയ യുവാവിനെക്കുറിച്ച് പൊലീസിന് രഹസ്യ വിവരം, പ്രാഥമിക പരിശോധനയിൽ ഒന്നുമില്ല, കൈയിലെ യുപിഎസ് തുറന്നപ്പോൾ എംഡിഎംഎ

വട്ടിയൂർക്കാവിൽ വാടകക്ക് താമസിക്കുന്ന കൊല്ലം സ്വദേശിയായ ജുവാൻ സിൽവർസ്റ്ററിൻെറ കൈയിൽ നിന്നാണ് ലഹരിവസ്തു പിടികൂടിയത്.

തിരുവനന്തപുരം: തലസ്ഥാനത്ത് വൻ ലഹരിവേട്ട. 100 ഗ്രാമിലേറെ എംഡിഎംഎയുമായി യുവാവിനെ സിറ്റി ഡാൻസാഫ് സംഘം പിടികൂടി. വട്ടിയൂർക്കാവിൽ വാടകക്ക് താമസിക്കുന്ന കൊല്ലം സ്വദേശിയായ ജുവാൻ സിൽവർസ്റ്ററിൻെറ കൈയിൽ നിന്നാണ് ലഹരിവസ്തു പിടികൂടിയത്. ബെം​ഗളൂരുവിൽ നിന്നും പേട്ടയിൽ ട്രെയിനിറങ്ങിയ ഇയാളുടെ കൈവശം ലഹരിവസ്തു ഉണ്ടെന്ന വിവരം സിറ്റി കമ്മീഷണർക്ക് ലഭിച്ചതിനെ തുടർന്നാണ് കസ്റ്റഡിലെടുത്തത്.

 പ്രാഥമിക പരിശോധനയിൽ ഒന്നും കണ്ടെത്താനായില്ല. പിന്നീട് കൈയിലുണ്ടായിരുന്ന യുപിഎസ് തുറന്ന് പരിശോധിച്ചപ്പോഴാണ് ലഹരി വസ്തു കണ്ടെത്തിയത്. ബം​ഗളൂരുവിൽ നിന്നും തലസ്ഥാനത്ത് ലഹരിവസ്തുക്കളെത്തിക്കുന്ന പ്രധാന ഏജൻറുമാരിൽ ഒരാളാണ് ജുവാനെന്ന് പൊലീസ് പറഞ്ഞു. പ്രതിയെ പേട്ട പൊലീസിന് കൈമാറി.