ഓള്‍ഡ് മങ്ക് റം കേരളത്തില്‍ തിരിച്ചെത്തുന്നു

തിരുവനന്തപുരം: ഒരു ഇടവേളക്ക് ശേഷം ഓള്‍ഡ് മങ്ക് റം കേരളത്തിലേക്ക് തിരിച്ചെത്തുന്നു. 2018 ജനുവരി മാസത്തിലാണ് ഓള്‍ഡ് മങ്ക് വീണ്ടും കേരളത്തിലെ ബീവറേജ് ഷോപ്പുകളില്‍ ലഭ്യമായി തുടങ്ങിയത്. 750, 410,210 നിരക്കുകളുള്ള വിവിധ അളവുകളിലാണ് വിപണിയിലെത്തിയിട്ടുള്ളത്. 2010 മുതല്‍ ഇവ കേരളത്തിലെ ബീവറേജ് കോര്‍പ്പറേഷന്‍ ഔട്ട്‌ലറ്റുകളില്‍ നിന്ന് പിന്‍വലിച്ചിരുന്നു. ആവശ്യക്കാര്‍ കുറഞ്ഞതിനെ തുടര്‍ന്നായിരുന്നു നടപടി. 

1954 ഡിസംബര്‍ 19 നാണ് കരസേനയില്‍ ബ്രിഗേഡായിരുന്ന കപില്‍ മോഹന്‍ ഓള്‍ഡ് മങ്ക് റം അവതരിപ്പിക്കുന്നത്. സൈനികര്‍ക്ക് പ്രിയങ്കരമായി തീര്‍ന്ന ഈ റം വിലക്കുറവ് കൊണ്ട് സാധാരണക്കാരുടെ ഇടയിലും വളരെ പെട്ടെന്ന് പ്രചാരം നേടി . ഡയര്‍ മേകിന്‍ ബ്രൂറീസ് ലിമിറ്റഡ് എന്ന കമ്പനിയാണ് മോഹന്‍ ഏറ്റെടുത്ത് മോഹന്‍ മീകിന്‍ ലിമിറ്റഡ് എന്ന് പേരു മാറ്റിയത്. ഒരു കാലത്ത് ഇന്ത്യന്‍ മദ്യ വിപണി വാണിരുന്ന മദ്യമായിരുന്നു ഈ കമ്പനി പുറത്തിറക്കിയത്. അടുത്ത കാലത്ത് വില്‍പനയില്‍ വലിയ ഇടിവ് സംഭവിക്കുകയുണ്ടായി. കഴിഞ്ഞ വര്‍ഷങ്ങളില്‍ വന്ന കണക്ക് പ്രകാരം 54 ശതമാനത്തോളം വില്‍പന താഴ്ന്നു. ഈ പ്രതിസന്ധിയെ കമ്പനി തരണം ചെയ്തു കൊണ്ടിരിക്കെയാണ് 2018 ജനുവരി ഒമ്പതിന് കപില്‍ മോഹന്‍ അന്തരിച്ചത്.