ശബരിമലയിലെ സ്ത്രീ പ്രവേശനത്തെ എതിർത്ത് പന്തളം രാജകുടുംബം

അയ്യപ്പൻ നിത്യബ്രഹ്മചാരിയാണ് ആ വിശ്വാസത്തിന് അനുസരിച്ചാണ് ശബരിമലയിലെ ആചാരങ്ങൾ. അല്ലാതെ പ്രായം, ആർത്തവം തുടങ്ങിയവയുടെ പേരിലല്ല സ്ത്രീപ്രവേശനത്തെ എതിര്‍ക്കുന്നത്.

പന്തളം: ശബരിമല ക്ഷേത്രത്തിൽ എല്ലാ പ്രായത്തിലുമുള്ള സ്ത്രീകൾ പ്രവേശിക്കുന്നതിനെ എതിർത്ത് പന്തളം രാജകുടുംബം. സ്ത്രീകൾക്ക് പ്രവേശനം നൽകണമെന്ന സർക്കാർ നിലപാടിൽ ദുഖമുണ്ടെന്ന് രാജകുടുംബാം​ഗങ്ങൾ പറഞ്ഞു. 

ഇൗ വിഷയത്തിൽ സർക്കാരിന്റേതോ രാഷ്ട്രീയ പാർട്ടികളുടേയോ അഭിപ്രായമല്ല ദേവസ്വം ബോർഡിന്റേയും തന്ത്രിയുടേയും പന്തളം കൊട്ടാരത്തിന്റേയും നിലപാടാണ് പരി​ഗണിക്കേണ്ടത്. ഇവർക്കെല്ലാം ഇൗ വിഷയത്തിൽ സ്ത്രീപ്രവേശന വിഷയത്തിൽ ഒരേ നിലപാടാണുള്ളതെന്നും പന്തളം കൊട്ടാരം ട്രസ്റ്റ് പ്രസിഡന്റ് ശശികുമാർ വർമ്മ പറഞ്ഞു.

ആചാരം കണക്കിലെടുത്താണ് ശബരിമലയിലെ സ്ത്രീപ്രവേശനത്തെ തങ്ങൾ എതിർക്കുന്നത്. അയ്യപ്പൻ നിത്യബ്രഹ്മചാരിയാണ്. അതിനാൽ തന്നെ ശബരിമലയിലെ ആചാരങ്ങളും ആ വിശ്വാസത്തെ പിൻപ്പറ്റിയുള്ളതാണ്.  അല്ലാതെ പ്രായം, ആർത്തവം തുടങ്ങിയ വിഷയങ്ങൾ കേന്ദ്രീകരിച്ചല്ല സ്ത്രീ പ്രവേശനത്തെ എതിർക്കുന്നതെന്നും രാജകുടുംബം വിശദീകരിക്കുന്നു.