കാണാതായ ജസ്നക്ക് വേണ്ടി നവമാധ്യമക്കൂട്ടായ്മയുടെ പ്രതിഷേധ ജാഥ

ജസ്നക്ക് വേണ്ടി നവ മാധ്യമകൂട്ടായ്മ അന്വേഷണത്തിൽ വീഴ്ചയെന്നാരോപണം മൗനജാഥ നടത്തി  

കോട്ടയം:കാണാതായ കോളേജ് വിദ്യാർത്ഥി ജസ്നക്കായുള്ള അന്വേഷണത്തിൽ വീഴ്ചയെന്നാരോപിച്ച് കാഞ്ഞിരപ്പള്ളിയിൽ നവമാധ്യമ കൂട്ടായ്മയുടെ പ്രതിഷേധ ജാഥ. സെന്‍റ് ഡൊമിനിക്സ് കോളേജ് വിദ്യാർത്ഥി ജസ്നയെ 40 ദിവസം മുമ്പാണ് കാണാതായത്. ബികോം വിദ്യാർത്ഥി ജസ്നയെ കണ്ടെത്തണമെന്നാവശ്യപ്പെട്ട് ജസ്റ്റിസ് ഫോർ ജസ്ന എന്ന ഫെയ്സ്ബുക്ക് കൂട്ടായ്മയാണ് രംഗത്തെത്തിയിരിക്കുന്നത്.

പ്രതിഷേധ ധർണ്ണ മൗന ജാഥ എന്നിവയിൽ നിരവധിപേരാണ് പങ്കെടുത്തത്. മനുഷ്യാവകാശകമ്മിഷന് നൽകാനുള്ള നിവേദനത്തിൽ ഒപ്പ് ശേഖരണവും നടത്തി. മാർച്ച് 22 ന് മുക്കൂട്ടുതറയിലെ വീട്ടിൽ നിന്നും മുണ്ടക്കയത്തേക്ക് പോകുന്നുവെന്ന് പറഞ്ഞ് ഇറങ്ങിയ ജസ്നയെ പിന്നീട് കാണാതായി. പത്തനംതിട്ട വെച്ചൂച്ചിറ പൊലീസ് കേസെടുത്ത് അന്വേഷണം തുടങ്ങിയെങ്കിലും എങ്ങുമെത്തിയിട്ടില്ല.