ഫ്ലെക്സി നിരക്ക് സംവിധാനം റെയിൽവേ പുനഃപരിശോധിക്കുന്നു

ദില്ലി: പ്രീമിയം ട്രെയിനുകളിൽ തിരക്കിനനുസരിച്ച്‌ നിരക്ക്‌ നിശ്ചയിക്കുന്ന ഫ്ലക്‌സി നിരക്ക് സംവിധാനം റെയില്‍വെ പുന:പരിശോധിക്കുന്നു. എല്ലാ ടിക്കറ്റിനും അടിസ്ഥാന നിരക്കിന്‍റെ 15 ശതമാനം നിരക്ക് കൂട്ടുകയോ 50 ശതമാനം സീറ്റുകളിൽ സാധാരണ നിരക്കിൽ യാത്ര ചെയ്യാനാകുന്ന തരത്തിലോ ടിക്കറ്റ് നിരക്ക് ക്രമീകരിക്കാനാണ് ആലോചിക്കുന്നത്. പ്രീമിയം ട്രെയിനുകളായ തുരന്തോ, ശദാബ്ദി, രാജധാനി ട്രെയിനുകളിൽ കഴിഞ്ഞ വര്‍ഷം സെപ്റ്റംബര്‍ ഒന്പത് മുതലാണ് ഫ്ലെക്സി നിരക്കുകൾ നടപ്പിലാക്കിയത്. ഇതോടെ ട്രെയിനുകൾ ഒഴിഞ്ഞ സീറ്റുകളോടെ സര്‍വ്വീസ് നടത്തേണ്ട സ്ഥിതിയിലായി. ഇതൊഴിവാക്കാനാണ് നിരക്കുകൾ റെയിൽവേ പുന:പരിശോധിക്കുന്നത്. തീരുമാനം ഈ മാസം തന്നെയുണ്ടാകുമെന്നാണ് റിപ്പോര്‍ട്ട്.