ആക്രമണത്തെ അതിജീവിച്ച സഹപ്രവർത്തകയോട് തികച്ചും വഞ്ചനാപരവും മനുഷ്യത്വഹീനവുമായ നിലപാടാണ് സംഘടനയായ അമ്മ സ്വീകരിച്ചതെന്ന് നടി രമ്യാ നമ്പീശന്‍. പ്രാഥമികമായി മനുഷ്യനായിരിക്കുന്നതിൽ വിശ്വസിക്കുന്നു. ഇപ്പോഴത്തെ സാഹചര്യങ്ങളോടുള്ള അങ്ങേയറ്റം നിരുത്തരവാദപരമായ നിലപാടിൽ പ്രതിഷേധിച്ച് താന്‍ രാജി വയ്ക്കുകയാണെന്നും രമ്യ പറഞ്ഞു.
'' 'അമ്മ' യിൽ നിന്നും രാജി വെക്കുകയാണ് . ഇപ്പോഴത്തെ സാഹചര്യങ്ങളോടുള്ള അങ്ങേയറ്റം നിരുത്തരവാദപരമായ നിലപാടിൽ പ്രതിഷേധിച്ചാണ് എന്റെ രാജി . ഹീനമായ ആക്രമണം നേരിട്ട ,ഞങ്ങളുടെ സഹപ്രവർത്തകയോട് തികച്ചും വഞ്ചനാപരവും മനുഷ്യത്വഹീനവുമായ നിലപാടാണ് സംഘടന സ്വീകരിച്ചത് . ഞാൻ പ്രാഥമികമായി മനുഷ്യനായിരിക്കുന്നതിൽ വിശ്വസിക്കുന്നു . നീതി പുലരട്ടെ. '' - രമ്യാ നമ്പീശൻ
ആക്രമണത്തെ അതിജീവിച്ച നടി, റിമ കല്ലിങ്കല്‍, രമ്യ നമ്പീശന്‍, ഗീതു മോഹന്‍ദാസ് എന്നിവരാണ് ഇന്ന് അമ്മയില്‍നിന്ന് രാജി വച്ചത്. വനിതാ സംഘടനയായ ഡബ്ലുസിസിയുടെ ഫേസ്ബുക്ക് പേജിലൂടെയാണ് താരങ്ങള്‍ തങ്ങളുടെ രാജിക്കാര്യം അറിയിച്ചത്.