ആകാംക്ഷയോടെ മുന്നണികൾ: എസ്.എൻ.ഡി.പി നാളെ നിലപാട് പ്രഖ്യാപിക്കും

ചെങ്ങന്നൂർ ഉപതിരഞ്ഞെടുപ്പിൽ ഏത് മുന്നണിയെ പിന്തുണയ്ക്കുമെന്ന കാര്യം എസ്.എൻ.ഡി.പി നാളെ പ്രഖ്യാപിക്കും

ചെങ്ങന്നൂർ: ചെങ്ങന്നൂർ ഉപതിരഞ്ഞെടുപ്പിൽ ഏത് മുന്നണിയെ പിന്തുണയ്ക്കുമെന്ന കാര്യം എസ്.എൻ.ഡി.പി നാളെ പ്രഖ്യാപിക്കും. ബുധനാഴ്ച്ച രാവിലെ പത്ത് മണിയ്ക്ക് കണിച്ചുകുളങ്ങരയിൽ വിളിച്ചു ചേർത്ത വാർത്ത സമ്മേളനത്തിൽ എസ്.എൻ.ഡി.പി ജനറൽ സെക്രട്ടറി വെള്ളാപ്പള്ളി നടേശനാവും സംഘടനയുടെ നിലപാട് അറിയിക്കുക. 

എസ്.എൻ.ഡി.പിയുടെ രാഷ്ട്രീയവിഭാ​ഗമായ ബിഡിജെഎസ് ബിജെപി നയിക്കുന്ന എൻഡിഎ മുന്നണിയിലാണെങ്കിലും  ബിജെപി തങ്ങളെ അവ​ഗണിക്കുന്നുവെന്ന പരാതി ബിഡിജെഎസിനും എസ്എൻഡിപിക്കുമുണ്ട്.  ബിഡിജെഎസ് ബിജെപിയുമായി നിസഹകരിക്കുന്ന നിലവിലെ സാഹചര്യത്തിൽ എസ്എൻഡിപിയുടെ രാഷ്ട്രീയനിലപാടിന് വലിയ പ്രസക്തിയുണ്ട്. 

നേരത്തെ ഇൗ മാസം 20-ന് എസ്.എൻ.ഡി.പിയുടെ നിലപാട് പ്രഖ്യാപിക്കും എന്ന് അറിയിച്ചിരുന്നെങ്കിലും അന്ന് പ്രഖ്യാപനമുണ്ടായില്ല. എൽ.ഡി.എഫ് സ്ഥാനാർഥി സജി ചെറിയാനാണ് ചെങ്ങന്നൂരിലിപ്പോൾ മുന്നിൽ നിൽക്കുന്നതെന്നും ശ്രീധരൻപ്പിള്ള മൂന്നാം സ്ഥാനത്താണെന്നും നേരത്തെ വെള്ളാപ്പള്ളി പറഞ്ഞിരുന്നു.