ഇവിടുത്തെ മര്യാദ പാലിക്കുക; മോദിയെ ആലിം​ഗനം ചെയ്ത രാഹുൽ​ഗാന്ധിയോട്  സ്പീക്കർ സുമിത്ര മഹാജൻ

അദ്ദേഹം ആ സീറ്റിൽ ഇരിക്കുന്നത് നരേന്ദ്രമോദിയായിട്ടല്ല, ഇന്ത്യയുടെ പ്രധാനമന്ത്രിയായിട്ടാണ് രാഹുൽ​ഗാന്ധി തനിക്ക് മകനെപ്പോലെയാണ്

ദില്ലി: അവിശ്വാസ പ്രമേയ പ്രസം​ഗത്തിന് ശേഷം നരേന്ദ്രമോദിയെ കെട്ടിപ്പിടിച്ച രാഹുൽ​ഗാന്ധിയാണ് ദൃശ്യ മാധ്യമങ്ങളിലും നവമാധ്യമങ്ങളിലും
താരമായിരിക്കുന്നത്. എന്നാൽ ലോക്സഭാ സ്പീക്കർ സുമിത്ര മഹാജൻ ഈ പ്രവർത്തിയെ നിശിതമായി വിമർശിച്ചാണ് രം​ഗത്തെത്തിയിരിക്കുന്നത്. ''മോദിയെ ആലിം​ഗനം ചെയ്തത് എനിക്കിഷ്ടപ്പെട്ടില്ല. പ്രധാനമന്ത്രി എന്ന പദവിയ്ക്ക് മാന്യതയുണ്ട്. അദ്ദേഹം ആ സീറ്റിൽ ഇരിക്കുന്നത് നരേന്ദ്രമോദിയായിട്ടല്ല. ഇന്ത്യയുടെ പ്രധാനമന്ത്രിയായിട്ടാണ്.'' സുമിത്ര മഹാജൻ പറഞ്ഞു.

''എല്ലാവരും സമാധാനത്തോടെ സഹവർത്തിക്കാനാണ് ഞാൻ ആ​ഗ്രഹിക്കുന്നത്. രാഹുലിനോട് എനിക്ക് യാതൊരു വിധത്തിലുമുള്ള വിരോധമില്ല. അദ്ദേഹംഎനിക്ക് മകനെപ്പോലെയാണ്.'' സുമിത്ര മഹാജൻ കൂട്ടിച്ചേർത്തു. ചിപ്കോ ആന്ദോളൻ എന്നാണ് രാഹുലിന്റെ ആലിം​ഗനത്തെ രാജ്നാഥ് സിം​ഗ് വിശേഷിപ്പിച്ചത്. എന്നാൽ മോദിയെ കെട്ടിപ്പിടിക്കണമെന്ന് രാഹുൽ ചിന്തിച്ചിരുന്നില്ലെന്നാണ് കോൺ​​ഗ്രസിന്റെ പക്ഷം. 'അത്ഭുതപ്പെടുത്തുന്ന പ്രസം​ഗമായിരുന്നു രാഹുൽ ​ഗാന്ധിയുടേത്. അന്തരീക്ഷത്തെ മാറ്റി മറിക്കാൻ സാധിക്കുന്ന പ്രസം​ഗമായിരുന്നു അത്. മോദിയെ കെട്ടിപ്പിടിച്ചതുൾപ്പെടെയുള്ള കാര്യങ്ങൾ മനോഹരം. സാഹിത്യഭാഷയിൽ പറഞ്ഞാൽ ബിജെപിയുടെ ശ്വാസം നിലച്ചുപോകുന്ന പ്രകടനം' - ശശി തരൂർ തന്റെ ട്വിറ്ററിൽ കുറിച്ചു. 

​പെട്ടെന്ന് ലഭിച്ച ആലിം​ഗനത്തിൽ നരേന്ദ്രമോദി ഒന്നു പതറിപ്പോയി എന്നുള്ളത് സത്യം. എന്നാൽ പിന്നീട് സമചിത്തത വീണ്ടെടുത്ത് രാഹുലിനെ തിരിച്ചുവിളിച്ച് മോദി ഹസ്തദാനം നൽകുകയും ചെയ്തു. തോളിൽത്തട്ടി ചിരിച്ചു കൊണ്ട് ഒന്നോ രണ്ടോ വാക്കുകൾ രാഹുലിനോട് പറയുകയും ചെയ്യുന്നുണ്ട് മോദി.