ഉത്തരേന്ത്യയില്‍ ഭൂചലനം

ദില്ലി: ദില്ലി ഉള്‍പ്പെടെ ഉത്തരേന്ത്യയിലെ വിവിധ സംസ്ഥാനങ്ങളില്‍ ഭൂചലനം. ഉത്തരാഖണ്ഡില്‍ റിക്ടര്‍ സ്‌കെയിലില്‍ 5.5 രേഖപ്പെടുത്തിയ ഭൂചലനത്തിന് തൊട്ടുപിന്നാലെയാണ് ദില്ലിയിലും ഭൂചലനം അനുഭവപ്പെട്ടത്. ഉത്തരാഖണ്ഡില്‍നിന്ന് 121 കിലോമീറ്റര്‍ കിഴക്ക് ഡെറാഡൂണിലാണ് ഭൂചലനത്തിന്റെ പ്രഭവ കേന്ദ്രം. ഇത് ദില്ലിയിലേക്കും വ്യാപിക്കുകയായിരുന്നു.

24 മണിക്കൂറിനുള്ളില്‍ രണ്ടാമത് ഭൂചലനമാണ് ഉത്തരാഖണ്ഡില്‍ അനുഭവപ്പെടുന്നത്. രാത്രി 8.49 ന് ഉണ്ടായ ഭൂചലനത്തിന് പുറമെ ഇന്നലെ റിക്ടര്‍ സ്‌കെയിലില്‍ 3.3 രേഖപ്പെടുത്തിയ ഭൂചലനവും സംസ്ഥാനത്ത് റിപ്പോര്‍ട്ട് ചെയ്തിരുന്നു. ഹിമാലയത്തിന്റെ ഭാഗമായ സംസ്ഥാനം അതീവ ഭൂചലന മേഖലയാണ്. ഹരിയാന, ഉത്തര്‍പ്രദേശ് എന്നിവിടങ്ങളിലും ഭൂചലനം അനുഭവപ്പെട്ടു. അതേസമയം നാശനഷ്ടങ്ങള്‍ റിപ്പോര്‍ട്ട് ചെയ്തിട്ടില്ല.