'വയല്‍ കഴുകന്മാര്‍', മന്ത്രിയുടെ വിമര്‍ശനത്തിനെതിരെ വയല്‍ക്കിളികള്‍

കീഴാറ്റൂര്‍ സമരം ജി. സുധാകരന് മറുപടിയുമായി വയല്‍ക്കിളികള്‍

തിരുവനന്തപുരം:കീഴാറ്റൂരിലെ സമരത്തെ വിമർശിച്ച മന്ത്രി ജി.സുധാകരന് വയൽക്കിളികളുടെ മറുപടി . മന്ത്രിക്ക് സമരചരിത്രമറിയില്ലെന്ന് സമരസമിതി ആരോപിച്ചു. മന്ത്രിയുടെ വയൽ കഴുകൻമാരെന്ന പ്രസ്താവന പിൻവലിക്കണമെന്ന് സുരേഷ് കീഴാറ്റുർ ആവശ്യപ്പെട്ടു.

കീഴാറ്റൂരിലെ വയല്‍ പ്രക്ഷോഭം ചര്‍ച്ച ചെയ്യണമെന്നാവശ്യപ്പെട്ട് വി.ഡി.സതീശന്‍ നല്‍കിയ നോട്ടീസിന് മറുപടി പറയുമ്പോളാണ് മന്ത്രി സമരക്കാര്‍ക്കെതിരെ കര്‍ശന നിലപാട് സ്വീകരിച്ചത്. ജീവിതത്തില്‍ ഒരിക്കല്‍ പോലും പാടത്ത് പോകാത്തവരാണ് കീഴാറ്റൂരില്‍ സമരത്തിന് വന്നിരിക്കുന്നത്. 

നന്ദിഗ്രാമും സിംഗൂരുമായി കീഴാറ്റൂരിന് സാമ്യമില്ല. ഒരു കുഞ്ഞിനെപ്പോലും കീഴാറ്റൂരില്‍ വെടിവയ്ക്കാന്‍ പോകുന്നില്ല. ഒരു തുള്ളി രക്തവും അവിടെ വീഴ്ത്തില്ല. പ്രക്ഷോഭകാരികള്‍ വയല്‍ കിളികളാണോ അതോ വയൽ കഴുകൻമാരാണോയെന്ന് തെളിയട്ടെ എന്ന് ജി.സുധാകരന്‍ പറയുകയായിരുന്നു.