വൻകിട നിക്ഷേപമല്ല, ഗുണനിലവാരമാണ് പ്രധാനം; വിദ്യാഭ്യാസം പരീക്ഷണ വസ്തുവാക്കരുത്

ഒരുകാലത്ത് എഞ്ചിനീയറിംഗും മെഡിസിനും മാത്രം സ്വപ്നം കണ്ടിരുന്ന യുവതലമുറയ്ക്ക് ഇന്ന് വേഗത്തിൽ തൊഴിൽ ലഭിക്കുന്ന പ്രായോഗിക കോഴ്സുകളോട് താൽപ്പര്യം വർദ്ധിച്ചിട്ടുണ്ടെന്ന് ഓർവൽ ലയണൽ

വിദ്യാഭ്യാസം എന്നുള്ളത് കേവലം ബിരുദങ്ങൾ നൽകുന്ന പ്രക്രിയയല്ല, മറിച്ച് ജീവിതത്തെ മാറ്റിമറിക്കുന്ന ഒന്നായിരിക്കണമെന്ന് ഇന്ത്യൻ ഇൻസ്റ്റിറ്റ്യൂട്ട് ഓഫ് കൊമേഴ്സ്-ലക്ഷ്യ സ്ഥാപകൻ ഓർവൽ ലയണൽ. കൊച്ചി ജെയിൻ സർവ്വകലാശാല സംഘടിപ്പിക്കുന്ന സമ്മിറ്റ് ഓഫ് ഫ്യൂച്ചറിൽ 'പ്രോഫിറ്റ് വിത്ത് പർപ്പസ്: എജ്യുക്കേഷൻ ഇൻ ഫോക്കസ്' എന്ന വിഷയത്തിൽ നടന്ന പാനൽ ചർച്ചയിൽ പങ്കെടുത്ത് സംസാരിക്കുകയായിരുന്നു അദ്ദേഹം.

ബീഹാറിലെ ഒരു ചെറിയ ഗ്രാമത്തിൽ നിന്നും ഇന്ത്യയിലെ തന്നെ വലിയ സ്കിൽ-ഡെവലപ്‌മെന്റ് പ്ലാറ്റ്‌ഫോമുകളിലൊന്നിന്റെ സ്ഥാപകനിലേക്കുള്ള തന്റെ യാത്ര വിദ്യാഭ്യാസ സംരംഭകനും എംവേഴ്സിറ്റി സിഇഒയുമായ വിവേക് സിൻഹ പങ്കുവെച്ചു. സെഷനിൽ അക്ഷയ് മുരളീധരൻ മോഡറേറ്ററായിരുന്നു.

ഒരുകാലത്ത് എഞ്ചിനീയറിംഗും മെഡിസിനും മാത്രം സ്വപ്നം കണ്ടിരുന്ന യുവതലമുറയ്ക്ക് ഇന്ന് വേഗത്തിൽ തൊഴിൽ ലഭിക്കുന്ന പ്രായോഗിക കോഴ്സുകളോട് താൽപ്പര്യം വർദ്ധിച്ചിട്ടുണ്ടെന്ന് ഓർവൽ ലയണൽ നിരീക്ഷിച്ചു. ഒരു വികസ്വര രാജ്യത്ത് വിദ്യാഭ്യാസം മൂല്യവത്താണെന്ന് കണക്കാക്കപ്പെടുന്നത് അത് സാമ്പത്തിക ഭദ്രതയിലേക്കും മെച്ചപ്പെട്ട ജീവിതസാഹചര്യങ്ങളിലേക്കും നയിക്കുമ്പോഴാണെന്ന് അദ്ദേഹം അഭിപ്രായപ്പെട്ടു.

വരും വർഷങ്ങളിൽ ആരോഗ്യ സംരക്ഷണം, ഹോസ്പിറ്റാലിറ്റി, അടിസ്ഥാന സൗകര്യ വികസനം എന്നീ മേഖലകളിൽ വലിയ തൊഴിലവസരങ്ങൾ ഉണ്ടാകുമെന്ന് വിവേക് സിൻഹ വിലയിരുത്തി. ഈ മേഖലകൾ മനുഷ്യവിഭവശേഷിയെ അമിതമായി ആശ്രയിക്കുന്നതിനാൽ നിർമ്മിത ബുദ്ധി പോലുള്ള സാങ്കേതിക വിദ്യകൾ മനുഷ്യർക്ക് പകരം നിൽക്കില്ലെന്നും, പകരം ജോലികൾ എളുപ്പമാക്കാൻ സഹായിക്കുമെന്നും അദ്ദേഹം വ്യക്തമാക്കി.

വൻകിട ടെക് ഹബ്ബുകൾക്ക് പുറത്ത് വിദ്യാഭ്യാസ സ്ഥാപനങ്ങൾ കെട്ടിപ്പടുക്കുന്നതിലെ വെല്ലുവിളികളും ചർച്ചാവിഷയമായി. കൊച്ചിയിൽ നിന്ന് ഒരു പ്രസ്ഥാനം കെട്ടിപ്പടുത്ത തന്റെ അനുഭവം പങ്കുവെച്ചുകൊണ്ട്, വലിയ സംരംഭങ്ങൾ തുടങ്ങാൻ വൻതോതിലുള്ള നിക്ഷേപം അത്യാവശ്യമാണെന്ന മിഥ്യാധാരണ ലയണൽ തിരുത്തി. നിക്ഷേപങ്ങൾ ഒരിക്കലും ഗുണനിലവാരമുള്ള പാഠ്യപദ്ധതിക്കും കൃത്യമായ ബിസിനസ് മോഡലിനും പകരമാവില്ല. അധ്യാപകർക്കും പഠന സൗകര്യങ്ങൾക്കും വേണ്ടിയുള്ള ദീർഘകാല നിക്ഷേപങ്ങൾ വിദ്യാഭ്യാസ മേഖലയുടെ വളർച്ചയ്ക്ക് അത്യാവശ്യമാണെന്നും അദ്ദേഹം പറഞ്ഞു.

വിദ്യാഭ്യാസം എന്നത് വലിയ ഉത്തരവാദിത്തമുള്ള മേഖലയാണെന്ന സന്ദേശത്തോടെയാണ് സെഷൻ അവസാനിച്ചത്. സോഫ്റ്റ്‌വെയർ കമ്പനികൾക്ക് പരീക്ഷണങ്ങൾ നടത്താമെങ്കിലും വിദ്യാഭ്യാസ സ്ഥാപനങ്ങൾക്ക് അതിന് സാധിക്കില്ല, കാരണം അത് മനുഷ്യന്റെ ജീവിതത്തെയാണ് ബാധിക്കുന്നത്. വർഷങ്ങൾ കൊണ്ട് കെട്ടിപ്പടുക്കുന്ന വിശ്വാസം ഒരു ദിവസം കൊണ്ട് തകരാമെന്നും, അതിനാൽ സത്യസന്ധതയോടെയും കൃത്യമായ ലക്ഷ്യത്തോടെയും ഈ മേഖലയിൽ പ്രവർത്തിക്കണമെന്നും പാനലിസ്റ്റുകൾ വിദ്യാർത്ഥികളോടും സംരംഭകരോടും ആഹ്വാനം ചെയ്തു.