ഈ ഫീൽഡിൽ ഞാനൊരു നല്ല സ്‌കോറർ ആയിരുന്നില്ല; കുട്ടിക്കാലത്തെ ചിത്രം പങ്കുവെച്ച് വീണ്ടും സച്ചിൻ്റെ വെളിപ്പെടുത്തൽ

ക്രിക്കറ്റ് ഇതിഹാസം, ക്രിക്കറ്റ് പ്രേമികളുടെ വികാരം, ക്രിക്കറ്റിലെ ദൈവം, ലോകം മുഴുവൻ ആരാധിക്കുന്ന വ്യക്തിത്വം. അതേ സക്ഷാൽ  സച്ചിൻ ടെൻഡുൽക്കർ. സച്ചിനെ കുറിച്ച് വിശേഷിപ്പിക്കാൻ വാക്കുകളില്ല. എന്നാൽ ഇതേ സച്ചിന്‍ തൻ്റെ കുട്ടിക്കാലത്തെ കുറിച്ച് സംസാരിക്കുമ്പോഴെല്ലാം ഒരുകാര്യം മടികൂടാതെ വെളിപ്പെടുത്താറുണ്ട്; താൻ ഒരു ശരാശരിയിലും താഴ്ന്ന വിദ്യാർത്ഥിയായിരുന്നുവെന്ന്.

തൻ്റെ ട്വിറ്റർ പേജിൽ ഒരു പഴയ ബ്ലാക് ആൻ്റ് വൈറ്റ് ചിത്രം പങ്കുവച്ചുകൊണ്ട് ഒരു കുസൃതിയോടെ ആ കാര്യം ആരാധകരുമായി ഒരിക്കൽ കൂടി പങ്കുവച്ചിരിക്കുകയാണ്  സച്ചിൻ തെൻഡുൽക്കർ . സച്ചിൻ്റെ കുട്ടിക്കാലത്തെ ചിത്രമാണ് താരം ട്വിറ്ററിലൂടെ  പങ്ക് വെച്ചത്.  കളിപ്പാട്ടത്തിനടുത്ത് ഒരു പുസ്തകം തുറന്നുവായിക്കുന്ന ചിത്രം. ചിത്രത്തിൻ്റെ അടിക്കുറിപ്പായി ഇങ്ങനെയൊരു കുറിപ്പും; "ഈ ഫീൽഡിൽ ഞാനൊരു നല്ല സ്‌കോറർ ആയിരുന്നില്ല". 

നൂറു സെഞ്ച്വറികൾ അടക്കം 34347 റൺസ്  ക്രിക്കറ്റിൽ സ്‌കോർ ചെയ്തിട്ടുണ്ട് സച്ചിൻ. ഏകദിനത്തിലെ ആദ്യ ഇരട്ട ശതകത്തിൻ്റെ ഉടമയും. 2013 ൽ ക്രിക്കറ്റിൽ നിന്നും വിരമിച്ച ഈ മഹാനായ കളിക്കാരൻ തൻ്റെ കുട്ടിക്കാലത്തെക്കുറിച്ച് പറയുമ്പോൾ അതിലൊരു സന്ദേശം കൂടിയുണ്ട്; ആദ്യത്തെ തോൽവികളിൽ തളരാതിരിക്കുക, പരിശ്രമിച്ചാൽ ലോകം കീഴടക്കാം.

നേരത്തെ അധ്യാപക ദിനത്തില്‍ സച്ചിന്‍ ഒരു വീഡിയോ പങ്കുവെച്ചിരുന്നു. തന്നെ വിജയത്തിലേക്ക് നയിച്ച ഗുരു രമാകാന്ത് അച്ഛരേക്കര്‍ക്കും ചേട്ടന്‍ അജിത് തെണ്ടുല്‍ക്കര്‍ക്കുമായിരുന്നു സച്ചിന്‍ ആ വീഡിയോ സമര്‍പ്പിച്ചത്.