മെസി എന്ന ഫുട്ബോള് കളിക്കാരന് സത്യസന്ധനാണ്... ഫുട്ബോളിനെ അദ്ദേഹം അഗാധമായി സ്നേഹിക്കുന്നു... തന്റെ ടീമിനെ അഗാധമായി സ്നേഹിക്കുന്നു... തന്റെ രാജ്യത്തെ അഗാധമായി സ്നേഹിക്കുന്നു... രാജ്യത്തിനുവേണ്ടി തന്റെ കടപ്പാട് ഇന്നു നിര്വഹിക്കാന് കഴിഞ്ഞില്ല എന്നത് അദ്ദേഹത്തിന്റെ മനസിനെ വല്ലാതെ വേദനിപ്പിച്ചു... ആ വേദനയാണ് ഇന്നത്തെ വിരമിക്കല് പ്രഖ്യാപനത്തിലേക്ക് അദ്ദേഹത്തെ നയിച്ചത്...
ലോക ഫുട്ബോളിന്റെ നെറുകയില് നില്ക്കുന്ന താരമാണു മെസി. ഫുട്ബോളിനു മെസി എന്ന താരത്തെ അവഗണിക്കാനാവില്ല. ഇടതുകാല് കൊണ്ടു ഗോള്പോസ്റ്റിലേക്ക് ഉതിര്ക്കുന്ന വെടിയുണ്ടകള് ഫുട്ബോള് ആരാധകരുടെ മനസില്നിന്നു മായുമോ? മെസിക്ക് ഒരുപാടു നാള് ഇനിയും കളിക്കാനാകും. 29 വയസല്ലേ ആയുള്ളൂ. പണ്ട് സച്ചിന് ചെയ്തതുപോലെ മെസിക്കു ക്യാപ്റ്റന് സ്ഥാനത്തുനിന്നു മാറാമായിരുന്നു. എന്നിട്ടു കളി തുടരാമായിരുന്നു.
ക്യാപ്റ്റനായിരിക്കുമ്പോള് അനുഭവിക്കുന്ന ഒരു സമ്മര്ദമുണ്ട്. പ്രത്യേകിച്ചു ഫുട്ബോള് ടീമിനെ നയിക്കുമ്പോള്. രാജ്യത്തിന്റെ മുഴുവന് ഭാരവും ക്യാപ്റ്റന്റെ തലയിലാണ്. അതു മാറിയിരുന്നെങ്കില് ഇന്നു മെസി ഇന്നത്തേതിനേക്കാള് നല്ല കളി കാഴ്ചവച്ചേനെ. മെസിയുടെ പിന്മാറ്റം അര്ജന്റീനയുടെ ദുരന്തമായിരിക്കും. അര്ജന്റീനയുടെ ഊര്ജമാണു മെസി. ലോകം മെസിയിലൂടെയാണ് അര്ജന്റീനയെ കാണുന്നത്. ടീമില് 11 കളിക്കാരുണ്ടെന്നതു സത്യമാണ്. എന്നാല് ബാക്കി 10 കളിക്കാരുടെ കളിയെ നയിക്കുന്നത് മെസി എന്ന ഊര്ജമാണ്. അതുകൊണ്ട് മെസി കളിയിലേക്കു തിരിച്ചുവരണമെന്നാണ് ആത്മാര്ഥമായ ആഗ്രഹം. ലോകത്തെ കോടാനുകോടി ആളുകള് ഇത് ആഗ്രഹിക്കുന്നു. ഒരു പെനാല്റ്റി പാഴാകുകയെന്നതു സ്വാഭാവികം. പച്ചയായ മനുഷ്യര്ക്കു പാളിച്ചകള് പറ്റാമല്ലോ?
അര്ജന്റീനയോടുള്ളതുപോലെ ബാഴ്സലോണയോടും മെസിക്ക് കൂറുണ്ട്. വിരമിക്കല് പ്രഖ്യാപനത്തോടെ വലിയ വിവാദങ്ങളുണ്ടാകാന് സാധ്യതയുണ്ട്. ഒരുകാര്യം ഓര്ക്കണം. മെസിയെ നല്ല ഒരു മനുഷ്യനാക്കി കളിക്കാനുള്ള അവസരമുണ്ടാക്കിയതു ബാഴ്സലോണയാണ്. രോഗത്തിന്റെ മുര്ധന്യത്തില് പണംകൊണ്ട് മെസിയെ തിരികൊക്കൊണ്ടുവന്നത് ക്ലബ്. അപ്പോള് ബാഴ്സലോണയോടുള്ള കൂറ് സ്വാഭാവികമല്ലേ..
നിര്ഭാഗ്യം മെസിയെ പിന്തുടരുന്നകാഴ്ചയാണു പലപ്പോഴും ലോക ഫുട്ബോള് കണ്ടിട്ടുള്ളത്. അത് ഇപ്പോഴും തുടരുന്നു. ഈ കറുത്ത ദിവസം മറക്കാന് ലോക ഫുട്ബോളിനു കഴിയില്ല മെസീ... താങ്കള് കളിയില്നിന്നു മാറരുത്., ലോക ഫുട്ബോള് കളിക്കാതിരിക്കരുത്...
