കേരളത്തിൽ നിന്നുള്ള കറുമ്പിക്ക് ലോക റെക്കോർഡ്! ഇവളാണത്രെ ലോകത്തിലെ ഏറ്റവും കുഞ്ഞനാട്

കറുപ്പ് നിറത്തിലുള്ള, കുള്ളൻ ആടുകളുടെ ഇനമായ പി​ഗ്മി ആടാണ് കറുമ്പി. നാല് വയസാണ് കറുമ്പിയുടെ പ്രായം. വെറും 1 അടി 3 ഇഞ്ച് (40.50 സെ.മീ) ഉയരമാണ് ഈ ആടിനുള്ളത്.

കേരളത്തിൽ നിന്നുള്ള കറുമ്പിക്ക് ലോക റെക്കോർഡ്! കറുമ്പി ഒരു ആടാണ്. ലോകത്ത് ജീവിച്ചിരിക്കുന്നവയിൽ ഏറ്റവും ഉയരം കുറഞ്ഞ ആട് എന്ന നിലയിലാണ് കറുമ്പി ഈ ലോക റെക്കോർഡ് സ്വന്തമാക്കിയിരിക്കുന്നത്. 

ആടിന്റെ ഉടമയും കർഷകനുമായ പീറ്റർ ലെനുവിന് തന്റെ ആട് എത്ര ചെറുതാണ് എന്നതിനെ കുറിച്ച് നേരത്തെ തന്നെ അറിയാമായിരുന്നു. എങ്കിലും, ഒരു ലോക റെക്കോർഡ് സ്വന്തമാക്കാൻ മാത്രം ചെറുതാണ് എന്ന് അറിയില്ലായിരുന്നു. ഒരു അതിഥിയാണത്രെ പീറ്റർ ലെനുവിനോട് ഈ ആട് എത്ര ചെറുതാണ് എന്ന് സൂചിപ്പിക്കുന്നത്. അതോടെയാണ് ലോക റെക്കോർഡിന് വേണ്ടി നോക്കാൻ പീറ്റർ ലെനു തീരുമാനിക്കുന്നത്. 

കറുപ്പ് നിറത്തിലുള്ള, കുള്ളൻ ആടുകളുടെ ഇനമായ പി​ഗ്മി ആടാണ് കറുമ്പി. നാല് വയസാണ് കറുമ്പിയുടെ പ്രായം. വെറും 1 അടി 3 ഇഞ്ച് (40.50 സെ.മീ) ഉയരമാണ് ഈ ആടിനുള്ളത്. അങ്ങനെയാണ് കറുമ്പി ഇപ്പോൾ ജീവിച്ചിരിക്കുന്നവയിൽ ഏറ്റവും ഉയരം കുറഞ്ഞ ആടായി ലോക റെക്കോർഡ് നേടിയിരിക്കുന്നത്. സാധാരണ പിഗ്മി ആടുകൾ 21 ഇഞ്ചിൽ (53 സെ.മീ) കൂടുതൽ ഉയരത്തിൽ വളരുന്നത് തന്നെ വളരെ അപൂർവമാണ്. എങ്കിലും, കറുമ്പി അതിലും ചെറുതാണ്. 

2021 -ലാണ് കറുമ്പി ജനിച്ചത്. ആടുകളെ കൂടാതെ പശുക്കൾ, മുയലുകൾ, കോഴികൾ, താറാവുകൾ എന്നിവയെല്ലാം പീറ്റർ ലെനുവിന്റെ ഫാമിലുണ്ട്. അവിടെ സജീവമാണ് കറുമ്പി. മറ്റുള്ള മൃ​ഗങ്ങളോട് ഇടപഴകാൻ ഇഷ്ടപ്പെടുന്ന ആട് കൂടിയാണത്രെ കറുമ്പി. ഇപ്പോൾ ​ഗർഭിണി കൂടിയാണ് അവൾ. 

​ഗിന്നസ് വേൾഡ് റെക്കോർഡ് തന്നെ തങ്ങളുടെ സോഷ്യൽ മീഡിയാ അക്കൗണ്ടിൽ കറുമ്പിയുടെ വീഡിയോ പങ്കുവച്ചിട്ടുണ്ട്. 

ഏഷ്യാനെറ്റ് ന്യൂസ് ലൈവ് കാണാം