മുട്ട കഴിച്ചാൽ കൊളസ്ട്രോൾ കൂടുമോ?

കൊളസ്ട്രോൾ കൂടുമെന്ന് പേടിച്ച് പലരും മുട്ട ഒഴിവാക്കാറുണ്ട്. കൊളസ്ട്രോൾ ശരീരത്തിലെ നിരവധി സുപ്രധാന പ്രവർത്തനങ്ങൾക്ക് അത്യന്താപേക്ഷിതമാണ്. 

രണ്ട് തരം കൊളസ്ട്രോൾ ഉണ്ട് - എൽഡിഎൽ, എച്ച്ഡിഎൽ. എൽഡിഎൽ അഥവാ ചീത്ത കൊളസ്ട്രോൾ ധമനികളിൽ അടിഞ്ഞുകൂടുകയും അവയെ ഇടുങ്ങിയതാക്കുകയും ഹൃദ്രോഗ സാധ്യത വർദ്ധിപ്പിക്കുകയും ചെയ്യും.

എച്ച്ഡിഎൽ അഥവാ നല്ല കൊളസ്ട്രോൾ രക്തപ്രവാഹത്തിൽ നിന്ന് എൽഡിഎൽ നീക്കം ചെയ്യാൻ സഹായിക്കുന്നു. ഇത് ഹൃദയത്തെ സംരക്ഷിക്കുന്നു.

എൽഡിഎല്ലും എച്ച്ഡിഎല്ലും തമ്മിലുള്ള ആരോഗ്യകരമായ സന്തുലിതാവസ്ഥ നിലനിർത്തുക എന്നതാണ് വേണ്ടതെന്ന് ക്ലിനിക്കൽ ഡയറ്റീഷ്യൻ ഖുഷ്മ ഷാ പറയുന്നു.

 മിതമായ അളവിൽ കഴിച്ചാൽ മുട്ട, പോഷക സമ്പന്നവും ഹൃദയാരോഗ്യമേകുന്നതുമായ ഒരു ഭക്ഷണമാണ് എന്നും ആരോ​ഗ്യ വിദ​ഗ്ധർ പറയുന്നു.

ഒരു ദിവസം ഒരു മുട്ട കഴിക്കുന്നവർക്ക് ഹൃദ്രോഗത്തിനും പക്ഷാഘാതത്തിനും സാധ്യത കുറവാണെന്ന് 2018-ൽ ജേണൽ ഓഫ് ഹാർട്ട് ഇൻ ചൈനയിൽ പ്രസിദ്ധീകരിച്ച പഠനത്തിൽ കണ്ടെത്തി. 

കണ്ണിന്റെ ആരോഗ്യം സംരക്ഷിക്കുകയും വീക്കം കുറയ്ക്കുകയും ചെയ്യുന്ന ല്യൂട്ടിൻ, സിയാക്സാന്തിൻ തുടങ്ങിയ ആന്റിഓക്‌സിഡന്റുകളും മുട്ടകൾ നൽകുന്നു.