2026 റെനോ ഡസ്റ്റർ ക്യാമറയിൽ പതിഞ്ഞു, വമ്പൻ ലുക്കിൽ പരീക്ഷണത്തിനെത്തിയത് ബംഗളരൂവിൽ

2022-ൽ ഇന്ത്യൻ വിപണിയിൽ നിന്ന് പിൻവാങ്ങിയ റെനോ ഡസ്റ്റർ, പുതിയ മൂന്നാം തലമുറ മോഡലായി തിരിച്ചുവരവിന് ഒരുങ്ങുന്നു. ഹ്യുണ്ടായി ക്രെറ്റ, കിയ സെൽറ്റോസ് തുടങ്ങിയ വാഹനങ്ങളോട് മത്സരിക്കാൻ ലക്ഷ്യമിടുന്ന പുതിയ ഡസ്റ്ററിന്റെ പരീക്ഷണയോട്ടം ഇന്ത്യയിൽ ആരംഭിച്ചു. 

2022 ൽ ഇന്ത്യൻ വിപണിയിൽ നിർത്തലാക്കിയ മോഡലായ റെനോ ഡസ്റ്റർ തിരിച്ചുവരവിന് ഒരുങ്ങുകയാണ്. ഇന്ത്യയിലെ വിപണി പുനരുജ്ജീവിപ്പിക്കുക എന്ന ലക്ഷ്യത്തോടെ, ഫ്രഞ്ച് വാഹന നിർമ്മാതാക്കൾ അടുത്ത വർഷം ആദ്യം ഡസ്റ്ററിനെ അതിന്റെ പുതിയ രൂപത്തിൽ വീണ്ടും അവതരിപ്പിക്കും. രണ്ടാം തലമുറ ഡസ്റ്ററിനെ ഒഴിവാക്കി, ഹ്യുണ്ടായി ക്രെറ്റ, കിയ സെൽറ്റോസ്, മാരുതി ഗ്രാൻഡ് വിറ്റാര, ടൊയോട്ട ഹൈഡൈഡർ, സെഗ്‌മെന്റിലെ മറ്റ് എതിരാളികൾ എന്നിവരെ വെല്ലുവിളിച്ച് മൂന്നാം തലമുറ മോഡലിനെ നേരിട്ട് കൊണ്ടുവരാനാണ് കമ്പനിയുടെ തീരുമാനം എന്നതാണ് ശ്രദ്ധേയം.

വിപണിയിലെത്തുന്നതിന് മുന്നോടിയായി റെനോ പുതിയ 2026 ഡസ്റ്ററിന്റെ ഇന്ത്യയിലെ പരീക്ഷണം ആരംഭിച്ചു. ബെംഗളൂരുവിൽ വെച്ച് ടെസ്റ്റ് പതിപ്പുകളിൽ ഒരെണ്ണം അടുത്തിടെ ക്യാമറയിൽ പതിഞ്ഞു. സ്പൈ ഇമേജുകൾ മിക്ക ഡിസൈൻ വിശദാംശങ്ങളും മറച്ചുവെച്ചിരുന്നെങ്കിലും, നേരായ ലുക്ക്, വി-ആകൃതിയിലുള്ള ടെയിൽലാമ്പുകൾ, മേൽക്കൂരയിൽ ഘടിപ്പിച്ച സ്‌പോയിലർ, ഷാർക്ക് ഫിൻ ആന്റിന, റൂഫ് റെയിലുകൾ, കൂറ്റൻ വീൽ ആർച്ച് ക്ലാഡിംഗ്, റാക്ക് ചെയ്ത വിൻഡ്‌ഷീൽഡും പിൻ വാഷറും വൈപ്പറും പോലുള്ള ചില പ്രധാന ഹൈലൈറ്റുകൾ ഇപ്പോഴും പ്രകടമാണ്.

റെനോ ഡസ്റ്ററിന്‍റെ ആഗോള പതിപ്പുമായി താരതമ്യപ്പെടുത്തുമ്പോൾ, ഇന്ത്യ-സ്പെക്ക് ഡസ്റ്ററിന് പരിഷ്‍കരിച്ച ഫ്രണ്ട്, റിയർ ബമ്പറുകൾ, പുതിയ അലോയ് വീൽ ഡിസൈൻ എന്നിങ്ങനെ അൽപ്പം വ്യത്യസ്‍തമായ സ്റ്റൈലിംഗ് ഉണ്ടായിരിക്കും. മുമ്പ് പുറത്തിറങ്ങിയ ഔദ്യോഗിക ടീസർ പ്രകാരം പുതിയ റെനോ ഡസ്റ്ററിൽ വൈ-ആകൃതിയിലുള്ള എൽഇഡി ലൈറ്റിംഗ് ഘടകങ്ങൾ, റെനോയുടെ പുതിയ ലോഗോയുള്ള പുതിയ സിഗ്നേച്ചർ ഗ്രിൽ, ഒരു ശിൽപം ചെയ്ത ബോണറ്റ്, കറുത്ത ബി-പില്ലറുകൾ, സംയോജിത ടേൺ ഇൻഡിക്കേറ്ററുകളുള്ള ഓആർവിഎമ്മുകൾ, ബോഡി-കളർ ഡോർ ഹാൻഡിലുകൾ എന്നിവ ഉൾപ്പെടുമെന്ന് സ്ഥിരീകരിച്ചു.

പവർട്രെയിനുകളെ സംബന്ധിച്ചിടത്തോളം, പുതിയ റെനോ ഡസ്റ്ററിൽ തുടക്കത്തിൽ പെട്രോൾ എഞ്ചിൻ ഓപ്ഷനുകൾ വാഗ്ദാനം ചെയ്യും. താഴ്ന്ന വേരിയന്റുകൾക്ക് 1.5 ലിറ്റർ നാച്ചുറലി ആസ്പിറേറ്റഡ് പെട്രോൾ, എസ്‌യുവിയുടെ മിഡ്-സ്പെക്ക്, ഉയർന്ന വേരിയന്റുകൾക്ക് 1.0 ലിറ്റർ ടർബോ അല്ലെങ്കിൽ 1.3 ലിറ്റർ ടർബോ പെട്രോൾ എഞ്ചിനുകൾ റെനോ ഉപയോഗിച്ചേക്കാം. ഡസ്റ്റർ ഹൈബ്രിഡ് പിന്നീടുള്ള ഘട്ടത്തിൽ എത്തിയേക്കും. അതേസമയം എസ്‌യുവിക്ക് സിഎൻജി ഇന്ധന ഓപ്ഷനും റെനോ പരിഗണിക്കുന്നുണ്ട്.

ഔദ്യോഗിക ഇന്റീരിയർ വിശദാംശങ്ങൾ ഇതുവരെ വെളിപ്പെടുത്തിയിട്ടില്ലെങ്കിലും, 2026 റെനോ ഡസ്റ്ററിൽ മുൻഗാമിയെ അപേക്ഷിച്ച് കൂടുതൽ പ്രീമിയം ക്യാബിനും സവിശേഷതകളും ഉണ്ടാകുമെന്ന് പ്രതീക്ഷിക്കുന്നു. വലിയ ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, വയർലെസ് ആൻഡ്രോയിഡ് ഓട്ടോ, ആപ്പിൾ കാർപ്ലേ, ഒടിഎ (ഓവർ-ദി-എയർ) അപ്‌ഡേറ്റുകൾ, വയർലെസ് ഫോൺ ചാർജർ, 7 ഇഞ്ച് ഡിജിറ്റൽ ഇൻസ്ട്രുമെന്റ് ക്ലസ്റ്റർ, ഡ്യുവൽ-സോൺ എസി, വെന്റിലേറ്റഡ് ഫ്രണ്ട് സീറ്റുകൾ, റിയർ എസി വെന്റുകൾ, 360-ഡിഗ്രി ക്യാമറ, റിയർവ്യൂ ക്യാമറ, റിയർ പാർക്കിംഗ് സെൻസറുകൾ, ആറ് എയർബാഗുകൾ, എഡിഎഎസ് എന്നിവ എസ്‌യുവിയിലെ സവിശേഷതകളിൽ ഉൾപ്പെടുന്നു.