ഫോക്‌സ്‌വാഗന്‍റെ വലിയ പ്രഖ്യാപനം! അത്ഭുതകരമായ ഈ രണ്ട് കാറുകൾ ഇന്ത്യയിലേക്ക്

ഫോക്‌സ്‌വാഗൺ ഇന്ത്യയിൽ രണ്ട് പുതിയ കാറുകൾ അവതരിപ്പിക്കുന്നു: ഗോൾഫ് ജിടിഐയും ടിഗുവാൻ ആർ-ലൈനും. 2025-ന്റെ രണ്ടാം പാദത്തിൽ ഈ മോഡലുകൾ പുറത്തിറങ്ങും.പുതിയ മോഡലുകൾ കൂടുതൽ കരുത്തും സവിശേഷതകളുമുള്ളവയാണ്.

ജർമ്മനിയിലെ മുൻനിര കാർ നിർമ്മാതാക്കളായ ഫോക്‌സ്‌വാഗൺ ഇന്ത്യയിലെ തങ്ങളുടെ വാഹന പോർട്ട്‌ഫോളിയോയിൽ വലിയൊരു വിപുലീകരണം നൽകാൻ തയ്യാറെടുക്കുന്നു. ഇന്ത്യൻ വിപണിയിൽ രണ്ട് പുതിയ കാറുകൾ പുറത്തിറക്കുമെന്ന് കമ്പനി പ്രഖ്യാപിച്ചു. ഫോക്‌സ്‌വാഗൺ ഗോൾഫ് ജിടിഐയും ടിഗുവാൻ ആർ-ലൈനും ഇന്ത്യൻ വിപണിയിൽ എത്തുമെന്നാണ് കമ്പനി സ്ഥിരീകരിച്ചത് . 2025 ന്റെ രണ്ടാം പാദത്തിന്റെ തുടക്കത്തിൽ രണ്ട് പുതിയ കാർലൈനുകളും അവതരിപ്പിക്കുമെന്ന് കമ്പനി പുറത്തിറക്കിയ ഔദ്യോഗിക പ്രസ്താവനയിൽ പറയുന്നു. മെയ് അല്ലെങ്കിൽ ജൂണിൽ നടക്കുന്ന കമ്പനിയുടെ വാർഷിക സമ്മേളനത്തിൽ പുതിയ മോഡലുകൾ അരങ്ങേറ്റം കുറിക്കുമെന്ന് പ്രതീക്ഷിക്കുന്നു.

ഫോക്‌സ്‌വാഗൺ ഇന്ത്യയുടെ നിലവിലെ നിരയിൽ വിർടസ് , ടൈഗൺ , ടിഗുവാൻ എന്നിവ ഉൾപ്പെടുന്നു. കഴിഞ്ഞ വർഷം ഇതേ കാലയളവിനെ അപേക്ഷിച്ച് 2025 ജനുവരി മുതൽ ഫെബ്രുവരി വരെയുള്ള വിൽപ്പനയിൽ 3 ശതമാനം വളർച്ച കൈവരിച്ചതായി കമ്പനി  റിപ്പോർട്ട് ചെയ്തു. വരാനിരിക്കുന്ന പുതിയ മോഡലുകളിൽ നിന്ന് എന്തൊക്കെ പ്രതീക്ഷിക്കാമെന്ന് അറിയാം. 

ഫോക്‌സ്‌വാഗൺ ടിഗ്വാൻ ആർ ലൈൻ
ടിഗ്വാന്റെ പുതിയ വകഭേദമായ ആർ ലൈൻ അവതരിപ്പിക്കാൻ ഫോക്‌സ്‌വാഗൺ ഒരുങ്ങുന്നു, ഇത് എസ്‌യുവിക്ക് കൂടുതൽ സ്‌പോർട്ടി ആകർഷണം നൽകും. 2021 ൽ ആദ്യം പുറത്തിറക്കിയ ടിഗ്വാൻ ഇപ്പോൾ ഈ ഡൈനാമിക് പതിപ്പിനൊപ്പം ഒരു നവീകരണം സ്വീകരിക്കുന്നു. പുതുക്കിയ MQB 'ഇവോ' പ്ലാറ്റ്‌ഫോമിനെ അടിസ്ഥാനമാക്കുന്ന, പുതിയ ടിഗുവാൻ വലുപ്പത്തിൽ മുൻ മോഡലിന് സമാനമാണ്. എങ്കിലും, അതിന്റെ നീളം ഏകദേശം 30 മില്ലീമീറ്ററും ഉയരം 4 മില്ലീമീറ്ററും വർദ്ധിപ്പിച്ചിട്ടുണ്ട്. ഇതിനുപുറമെ, ഇതിന് 2,680 mm വീൽബേസ് മാത്രമേയുള്ളൂ. ടിഗ്വാന്റെ മുൻവശത്ത് ഇപ്പോൾ 'ഐക്യു ലൈറ്റ് എച്ച്ഡി' മാട്രിക്സ് ഹെഡ്‌ലൈറ്റുകൾ ഉണ്ട്. അവ വലിയ ടൊവാറെഗ് എസ്‌യുവിയിൽ ഉപയോഗിക്കുന്നതിനായി വികസിപ്പിച്ചെടുത്തതാണ്. ഈ ഹെഡ്‌ലൈറ്റിൽ ലൈറ്റിംഗിനായി 38,400 മൾട്ടി-പിക്സൽ എൽഇഡികൾ ഉപയോഗിക്കുന്നു. പുതിയ ടിഗ്വാന്‍ കൂടുതല്‍ എയറോഡൈനാമിക് ആണെന്ന് കമ്പനി പറയുന്നു. 

ടിഗ്വാൻ ആർ ലൈനിന് 190 എച്ച്പിയും 320 എൻഎം ടോർക്കും ഉത്പാദിപ്പിക്കുന്ന 2.0 ലിറ്റർ ടർബോചാർജ്ഡ് പെട്രോൾ എഞ്ചിനാണ് കരുത്ത് പകരുന്നത്. വലിയ എയർ ഇൻടേക്ക് ചാനലുകളും പുതുക്കിയ ഫ്രണ്ട് ബമ്പറും ഡിസൈൻ മെച്ചപ്പെടുത്തലുകളിൽ ഉൾപ്പെടുന്നു, അതേസമയം മിക്ക ഘടകങ്ങളും ആഗോള വിപണികളിൽ ലഭ്യമായ നിലവിലെ രണ്ടാം തലമുറ മോഡലിന് സമാനമായി തുടരും.

ഫോക്‌സ്‌വാഗൺ ഗോൾഫ് ജിടിഐ
ഗോൾഫ് ജിടിഐ ഇന്ത്യൻ വാങ്ങുന്നവർക്ക് വളരെ പ്രത്യേകതയുള്ളതായിരിക്കും. കാരണം ഈ കാർ ഇന്ത്യൻ വിപണിയിൽ ആദ്യമായിട്ടാണ് അവതരിപ്പിക്കുന്നത്. ഇന്ത്യയിൽ, എട്ടാം തലമുറ മോഡലിന്റെ പുതുക്കിയ പതിപ്പ് അവതരിപ്പിക്കും. നൂതന സവിശേഷതകളും സാങ്കേതികവിദ്യയും കൊണ്ട് സജ്ജീകരിച്ചിരിക്കുന്ന ഒരു പ്രീമിയം ഹാച്ച്ബാക്ക് കാറാണിത്. ഏഴ് സ്പീഡ് ഡ്യുവൽ ക്ലച്ച് ഓട്ടോമാറ്റിക് ട്രാൻസ്മിഷനുമായി ജോടിയാക്കിയ 2.0 ലിറ്റർ ടർബോചാർജ്ഡ് പെട്രോൾ എഞ്ചിനാണ് ഇതിന് കരുത്ത് പകരുന്നത്. ഇത് 265 എച്ച്പി ഉത്പാദിപ്പിക്കുന്നു. ഹോട്ട് ഹാച്ച് 5.9 സെക്കൻഡിനുള്ളിൽ ഒരു നിശ്ചലാവസ്ഥയിൽ നിന്ന് 250 കിലോമീറ്റർ വേഗത കൈവരിക്കുമെന്ന് അവകാശപ്പെടുന്നു.

18 ഇഞ്ച് റിച്ച്മണ്ട് ഡയമണ്ട്-കട്ട് അലോയ് വീലുകൾ, കൂടുതൽ സ്‍പോർട്ടിയായ ബമ്പർ ഡിസൈൻ, സിഗ്നേച്ചർ ടാർട്ടൻ-പാറ്റേൺഡ് സീറ്റ് അപ്ഹോൾസ്റ്ററി, ജിടിഐ-നിർദ്ദിഷ്ട സ്റ്റിയറിംഗ് വീൽ തുടങ്ങിയവ ഈ വാഹനത്തിൽ ഉണ്ടാകും. 2024 ഏപ്രിലിൽ ആദ്യമായി വെളിപ്പെടുത്തിയ ഈ പതിപ്പ്, പവറും വ്യതിരിക്തമായ സ്റ്റൈലിംഗും സംയോജിപ്പിച്ച് ഗോൾഫ് ജിടിഐയുടെ പാരമ്പര്യം വർദ്ധിപ്പിക്കാൻ ലക്ഷ്യമിടുന്നു. ഇന്ത്യയിൽ ലഭ്യമായ ഏറ്റവും വിലയേറിയ ഹാച്ച്ബാക്ക് കാറായിരിക്കാം ഇതെന്നാണ് റിപ്പോർട്ടുകൾ. ഏകദേശം 40 ലക്ഷം രൂപ വിലയിൽ ആയിരിക്കും ഈ ഹാച്ച്ബാക്ക് എത്തുക എന്നാണ് കരുതുന്നത്.