ഈ പുതിയ ഇലക്ട്രിക് സ്കൂട്ടറിനെ ബൗൺസ് ഇൻഫിനിറ്റി ഡിസംബർ രണ്ടിന് പുറത്തിറക്കും എന്ന് ഹിന്ദുസ്ഥാന് ടൈംസ് ഓട്ടോ റിപ്പോര്ട്ട് ചെയ്യുന്നു
സ്കൂട്ടർ വാടകയ്ക്ക് നൽകുന്ന സേവനത്തിന് പേരുകേട്ട സ്റ്റാര്ട്ടപ്പ് സംരംഭമാണ് ബെംഗളൂരു (Bangalore) ആസ്ഥാനമായുള്ള ബൗൺസ് (Bounce). ഇപ്പോഴിതാ കമ്പനി ഇലക്ട്രിക്ക് സ്കൂട്ടര് നിര്മ്മാണ രംഗത്തേക്കും ചുവടുവയ്ക്കുകയാണ്. ഈ പുതിയ ഇലക്ട്രിക് സ്കൂട്ടറിനെ ബൗൺസ് ഇൻഫിനിറ്റി ഡിസംബർ രണ്ടിന് പുറത്തിറക്കും എന്ന് ഹിന്ദുസ്ഥാന് ടൈംസ് ഓട്ടോ റിപ്പോര്ട്ട് ചെയ്യുന്നു.
പുതിയ ബൗൺസ് ഇൻഫിനിറ്റി സ്കൂട്ടറിന്റെ ബുക്കിംഗും ലോഞ്ച് ചെയ്യുന്ന ദിവസം തന്നെ ആരംഭിക്കും. അതേസമയം ഡെലിവറികൾ അടുത്ത വർഷം ആരംഭിക്കും. 499 രൂപ ആയിരിക്കും സ്കൂട്ടറിന്റെ ബുക്കിംഗ് തുക. തങ്ങളുടെ ഇലക്ട്രിക് സ്കൂട്ടർ ഇന്ത്യയിൽ നിർമ്മിച്ചതാണെന്ന് കമ്പനി അവകാശപ്പെടുന്നു. സ്കൂട്ടറിന്റെ പ്രധാന ഹൈലൈറ്റുകളിലൊന്ന് ഇലക്ട്രിക് സ്കൂട്ടറിൽ സ്വാപ്പ് ചെയ്യാവുന്ന ബാറ്ററി പായ്ക്കുകൾ ഉണ്ടായിരിക്കും എന്നതാണ്. കൂടാതെ സ്കൂട്ടറിന്റെ ഭാഗമായി വാങ്ങുന്നതിനേക്കാൾ ബാറ്ററികൾ കമ്പനിയിൽ നിന്ന് വാടകയ്ക്കെടുക്കാനുള്ള ഓപ്ഷൻ വാങ്ങുന്നവർക്ക് ലഭിക്കും. സബ്സ്ക്രിപ്ഷൻ ചെലവ് കൂടി ചേർത്താല് സ്കൂട്ടറുകളുടെ വാങ്ങൽ ചെലവ് കുറയും.. ബാറ്ററി ഇല്ലാതെ സ്കൂട്ടർ വാങ്ങാനും ബൗൺസിന്റെ ബാറ്ററി സ്വാപ്പിംഗ് നെറ്റ്വർക്ക് ഉപയോഗിക്കാനും ഇത് ഉപഭോക്താക്കളെ അനുവദിക്കുന്നു. ബാറ്ററി ഘടിപ്പിച്ച വാഹനം വാങ്ങുമ്പോൾ സ്കൂട്ടറിനെ കുറഞ്ഞത് 40% കൂടുതൽ താങ്ങാനാവുന്നതാക്കാൻ ഈ ഓപ്ഷൻ സാധ്യമാക്കും എന്നാണ് കമ്പനി പറയുന്നത്.
കമ്പനി അടുത്തിടെ 22 മോട്ടോഴ്സ് ഏറ്റെടുത്തിരുന്നു. ഏകദേശം 7 മില്യൺ യുഎസ് ഡോളറിന് അതായത് ഏകദേശം 52 കോടി രൂപയ്ക്ക് ഒരു മാസം മുമ്പാണ് ഏറ്റെടുക്കൽ നടന്നത്. ഈ മോഡലിനെ പിന്തുണയ്ക്കുന്നതിന്, ബൗൺസ് ബാറ്ററി സ്വാപ്പിംഗ് സ്റ്റേഷനുകൾ സജ്ജീകരിക്കും. ബാറ്ററി പാക്കുകളും ബാറ്ററി മാനേജ്മെന്റ് സിസ്റ്റവും തദ്ദേശീയമായിരിക്കും. പാനസോണിക്, എൽജി കെം എന്നിവയിൽ നിന്ന് ബാറ്ററി പാക്കുകളിലെ സെല്ലുകൾ ഇറക്കുമതി ചെയ്യും. 2022 ജനുവരിയിൽ പുതിയ ഇലക്ട്രിക്ക് സ്കൂട്ടറിന്റെ ഡെലിവറികൾ ആരംഭിക്കുമെന്ന് ബൗൺസ് അവകാശപ്പെടുന്നു.
ഈ ഏറ്റെടുക്കലിന്റെ ഫലമായി, ബൗൺസിന് 22 മോട്ടോഴ്സിന്റെ ആസ്തിയും 1,20,000 യൂണിറ്റ് വാർഷിക ശേഷിയുള്ള രാജസ്ഥാനിലെ ഭിവാദിയിലുള്ള നിർമ്മാണ പ്ലാന്റും ലഭിച്ചിരുന്നു. ദക്ഷിണേന്ത്യയിൽ മറ്റൊരു പ്ലാന്റ് സ്ഥാപിക്കാനും കമ്പനി പദ്ധതിയിടുന്നുണ്ടെന്നാണ് റിപ്പോര്ട്ടുകള്.