സൂപ്പര്‍ റോഡിന്‍റെ ചിത്രം പങ്കുവച്ച് ഗഡ്‍കരി, കണ്ടിട്ട് കൊതിയാകുന്നുവെന്ന് മഹീന്ദ്ര മുതലാളി!

 ദില്ലിയിൽ നിന്ന് മുംബൈയിലേക്കുള്ള മുഴുവൻ എക്‌സ്പ്രസ് വേയും അടുത്ത ഏതാനും മാസങ്ങൾക്കുള്ളിൽ ഘട്ടംഘട്ടമായി തുറക്കുമെന്ന് നിതിൻ ഗഡ്‍കരി പറഞ്ഞു. ഇത് പൂർത്തിയാകുമ്പോൾ, രണ്ട് നഗരങ്ങൾക്കിടയിലുള്ള യാത്രാ സമയം വെറും 12 മണിക്കൂറായി കുറയും.

ഇന്ത്യയിലെ ഏറ്റവും നീളം കൂടിയ ദില്ലി-മുംബൈ എക്‌സ്‌പ്രസ് വേയുടെ പണി പൂർത്തിയായിരിക്കുന്നു. കേന്ദ്രമന്ത്രി റോഡ് ഗതാഗതമന്ത്രി നിതിൻ ഗഡ്‍കരി കഴിഞ്ഞ ദിവസം ഈ സൂപ്പര്‍ റോഡിന്‍റെ നിർമ്മാണത്തെക്കുറിച്ചുള്ള ഏറ്റവും പുതിയ വിവരങ്ങള്‍ പങ്കിട്ടിരുന്നു. മധ്യപ്രദേശിലൂടെ കടന്നുപോകുന്ന അതിവേഗ പാതയുടെ ഭാഗത്തിന്‍റെ ചില ചിത്രങ്ങളാണ് അദ്ദേഹം പങ്കുവച്ചത്. ദില്ലിയിൽ നിന്ന് മുംബൈയിലേക്കുള്ള മുഴുവൻ എക്‌സ്പ്രസ് വേയും അടുത്ത ഏതാനും മാസങ്ങൾക്കുള്ളിൽ ഘട്ടംഘട്ടമായി തുറക്കുമെന്ന് നിതിൻ ഗഡ്‍കരി പറഞ്ഞു. ഇത് പൂർത്തിയാകുമ്പോൾ, രണ്ട് നഗരങ്ങൾക്കിടയിലുള്ള യാത്രാ സമയം വെറും 12 മണിക്കൂറായി കുറയും.

386 കിലോമീറ്റർ ദൈർഘ്യമുള്ള എക്‌സ്പ്രസ് വേയിൽ 240 കിലോമീറ്റർ സംസ്ഥാനത്തിന് വിഹിതമുണ്ടാകും. ഈ വർഷം അവസാനത്തോടെ ദേശീയ തലസ്ഥാനത്തിനും രാജ്യത്തിന്റെ ബിസിനസ് തലസ്ഥാനത്തിനും ഇടയിൽ ഇത് പൂർണ്ണമായും പ്രവർത്തനക്ഷമമാകുമെന്ന് പ്രതീക്ഷിക്കുന്നു. ഡൽഹിക്കും രാജസ്ഥാനിലെ ദൗസയ്ക്കും ഇടയിലെ എക്‌സ്പ്രസ് വേയുടെ ആദ്യ 209 കിലോമീറ്റർ പാത ഈ വർഷം ആദ്യം പ്രധാനമന്ത്രി നരേന്ദ്ര മോദി ഉദ്ഘാടനം ചെയ്‍തിരുന്നു. ഈ വിഭാഗം ഇതിനകം പ്രവർത്തനക്ഷമമാണ്. 

അതേസമയം മഹീന്ദ്ര ഗ്രൂപ്പ് ചെയർമാൻ ആനന്ദ് മഹീന്ദ്ര, പുതിയ എക്‌സ്പ്രസ് വേയുടെ വിസ്‍മയത്തിലാണ്. രാജ്യത്തെ രണ്ട് വലിയ നഗരങ്ങൾക്കിടയിലുള്ള യാത്രാസമയം പകുതിയായി വെറും 12 മണിക്കൂറായി കുറയ്ക്കാൻ ലക്ഷ്യമിട്ടുള്ള പുതിയ ഡൽഹി-മുംബൈ എക്‌സ്പ്രസ് വേയെ ആനന്ദ് മഹീന്ദ്ര ഗഡ്‍കരിയുടെ ട്വീറ്റ് പരാമര്‍ശിച്ചുകൊണ്ട് അഭിനന്ദിച്ചു.

“അത്ഭുതം. ഇവിടെ അലഞ്ഞുതിരിയാൻ എന്നെ പ്രേരിപ്പിക്കുന്നു.." മഹീന്ദ്ര മേധാവി ട്വിറ്ററിൽ കുറിച്ചു. രാജ്യത്തുടനീളമുള്ള ഹൈവേ, എക്സ്പ്രസ് വേ നിർമ്മാണങ്ങളിൽ ആകൃഷ്ടനായ അദ്ദേഹം, പ്രകൃതിരമണീയമായ റോഡുകളുടെ വെർച്വൽ അനുഭവം നൽകാനും നിതിൻ ഗഡ്‍കരിയോട് അഭ്യര്‍ത്ഥിച്ചു. ദില്ലി -മുംബൈ എക്‌സ്‌പ്രസ്‌വേയ്‌ക്കും കേന്ദ്രം നിർമ്മിക്കുന്ന മറ്റ് ഹൈവേകൾക്കുമായി ചില വിആർ സിമുലേറ്റർ പ്രോഗ്രാമുകളുടെ സാധ്യതകളെക്കുറിച്ചും അദ്ദേഹം സൂചിപ്പിച്ചു. തുറന്നുകൊടുക്കുന്നതിന് മുമ്പുതന്നെ ഈ റോഡുകളിലൂടെ സഞ്ചരിക്കുന്നതിന്റെ അനുകരണീയമായ അനുഭവം ആസ്വദിക്കാൻ പലരും ആഗ്രഹിക്കുന്നുവെന്ന് തനിക്ക് ഉറപ്പുണ്ടെന്നും ഒരു മഹീന്ദ്ര എസ്‌യുവിയുടെ വിൻഡ്‌ഷീൽഡിലൂടെ വിര്‍ച്വല്‍ കാഴ്‍ചകള്‍ കാണാൻ താൻ ആഗ്രഹിക്കുന്നുവെന്നും ആനന്ദ് മഹീന്ദ്ര പറഞ്ഞു.

ദില്ലി, ഹരിയാന, രാജസ്ഥാൻ, ഗുജറാത്ത്, മഹാരാഷ്ട്ര തുടങ്ങി അഞ്ച് സംസ്ഥാനങ്ങളിലൂടെയാണ് ഡൽഹി-മുംബൈ എക്‌സ്‌പ്രസ് വേ കടന്നുപോകുന്നത്. ഒമ്പത് കിലോമീറ്റർ നീളം കുറഞ്ഞ പ്രദേശമാണ് ഡൽഹിയുടേത്, അതേസമയം അതിവേഗ പാതയുടെ ഭൂരിഭാഗവും 423 കിലോമീറ്റർ വിഹിതമുള്ള ഗുജറാത്തിലായിരിക്കും. ഡൽഹിയെയും മുംബൈയെയും കോട്ട, ഇൻഡോർ, ജയ്പൂർ, ഭോപ്പാൽ, വഡോദര, സൂറത്ത് തുടങ്ങിയ സ്ഥലങ്ങളിലേക്ക് ബന്ധിപ്പിക്കുന്ന 40 ല്‍ അധികം പ്രധാന ഇന്റർചേഞ്ചുകൾ ഇതില്‍ ഉണ്ടാകും. ആത്യന്തികമായി ഈ എക്സ്പ്രസ് വേ ഡൽഹിയെ ഉത്തർപ്രദേശിലെ ഗ്രേറ്റർ നോയിഡയിലെ ജെവാർ വിമാനത്താവളത്തിലേക്കും മുംബൈയിലെ ജവഹർലാൽ നെഹ്‌റു തുറമുഖവുമായും ബന്ധിപ്പിക്കും. ഡൽഹിയും മുംബൈയും തമ്മിലുള്ള ദൂരം 180 കിലോമീറ്റർ കുറയും എന്നാണ് റിപ്പോര്‍ട്ടുകള്‍.