തകരാര്‍; ഈ സൂപ്പർകാറുകൾ തിരിച്ചുവിളിച്ച് ഫെറാരി

ഇറ്റാലിയന്‍ സൂപ്പര്‍ കാര്‍ നിര്‍മ്മാതാക്കളായ ഫെറാരി അമേരിക്കയിൽ വിറ്റഴിച്ച സൂപ്പർകാറുകൾ തിരിച്ചുവിളിക്കുന്നു. സൂപ്പര്‍ഫാസ്റ്റ് 812 മോഡലുകളെയാണ് കമ്പനി തിരികെ വിളിക്കുന്നതെന്ന് ഹിന്ദുസഥാന്‍ ടൈംസ് റിപ്പോര്‍ട്ട് ചെയ്യുന്നു. 

സാങ്കേതിക തകരാറിനെ തുടര്‍ന്നാണ് നടപടി. പിന്നിലെ വിൻഡോകളിലാണ്​ തകരാറ്​. ഉയർന്ന വേഗതയിൽ വിൻഡോകൾ ഇളകിവീഴുന്നതായാണ്​ കണ്ടെത്തിയിരിക്കുന്നത്​. ഇവ കൃത്യമായി പിടിപ്പിച്ചിട്ടുണ്ടാവില്ല എന്നാണ്​ കമ്പനിയുടെ നിഗമനം. 1,063 യൂണിറ്റുകൾ തിരിച്ചുവിളിക്കുമെന്നാണ്​ റി​പ്പോർട്ടുകൾ. 2018 നും 2020 നും ഇടയിൽ നിർമ്മിച്ചവയാണിവ. 

812 സൂപ്പർഫാസ്​റ്റ്​ പേര് സൂചിപ്പിക്കുന്നതുപോലെ ഫെരാരി ഇതുവരെ നിർമ്മിച്ചതിൽ വച്ച് ഏറ്റവും ശക്തവും വേഗതയേറിയതുമായ മോഡലാണ്​. ഫെറാരി 812 സൂപ്പർഫാസ്റ്റ്​ ആദ്യമായി ലോകത്തിന് പരിചയപ്പെടുത്തിയത് 2017 ജനീവ മോട്ടോർ ഷോയിലാണ്. ഇതിന്‍റെ എയറോഡൈനാമിക്​ ഡിസൈൻ, ഇലക്ട്രിക് പവർ സ്റ്റിയറിംഗ് എന്നിവ സൂപ്പർ കാറുകളുടെ ലോകത്ത് വേറിട്ടുനിൽക്കുന്നതാണ്​. 

6.5 ലിറ്റർ, വി 12 എഞ്ചിനാണ്​ വാഹനത്തിന്​. 2.9 സെക്കൻഡിൽ 100 കിലോമീറ്റർ വേഗത കൈവരിക്കാനാവും. 2020 മാർച്ചിൽ‌ ജർമനിയിലാണ്​‌ ആദ്യമായി തകരാർ റിപ്പോർ‌ട്ട്​ചെയ്‌തത്​. തുടർന്ന് അത്തരം രണ്ട് പരാതികൾ‌കൂടി ലഭിക്കുകയായിരുന്നു.

പിന്നീട്​ നടത്തിയ അന്വേഷണത്തിലാണ്​ വ്യാപക തകരാർ കണ്ടെത്തിയത്​. ഒടുവിൽ വാഹനം തിരിച്ചുവിളിക്കൽ കമ്പനി തുരുമാനിക്കുകയായിരുന്നു. അമേരിക്കയിലെ ഡീലർമാർക്കും ഉടമകൾക്കും ഡിസംബർ മുതൽ അറിയിപ്പുകൾ ലഭിക്കുമെന്നും വിൻഡോ മാറ്റി സ്ഥാപിക്കുമെന്നും കമ്പനി അധികൃതർ പറഞ്ഞു.