ഥാര്‍ പ്രേമികള്‍ക്കൊരു സന്തോഷവാര്‍ത്ത, വലിയ ബൂട്ട് സ്പേസുമായി പുത്തൻ ഥാര്‍!

ഔദ്യോഗിക വെളിപ്പെടുത്തലിന് മുന്നോടിയായി, 5 ഡോർ മഹീന്ദ്ര ഥാറിന്റെ ഇന്റീരിയർ ഇന്റർനെറ്റിൽ ചോർന്നതായാണ് പുതിയ റിപ്പോര്‍ട്ട്.

വളരെ ജനപ്രിയമായ മഹീന്ദ്ര ഥാർ ലൈഫ്‌സ്‌റ്റൈൽ എസ്‌യുവിയുടെ നീളമുള്ള വീൽബേസ് അഞ്ച് ഡോർ പതിപ്പിന്‍റെ പണിപ്പുരയിലാണ് മഹീന്ദ്ര. അഞ്ച് ഡോറുള്ള മഹീന്ദ്ര ഥാർ ഇന്ത്യൻ റോഡുകളിൽ പരീക്ഷിക്കുന്നത് ഒന്നിലധികം തവണ ശ്രദ്ധയില്‍പ്പെട്ടിട്ടുണ്ട്. 2023 ന്റെ തുടക്കത്തിൽ എത്തുന്ന പുതിയ അഞ്ച് ഡോര്‍ മഹീന്ദ്ര ഥാർ വരാനിരിക്കുന്ന മാരുതി ജിംനി 5-ഡോർ, ഫോഴ്‌സ് ഗൂർഖ ലൈഫ്‌സ്റ്റൈൽ എസ്‌യുവി എന്നിവയ്ക്ക് എതിരാളിയാകും.

ഔദ്യോഗിക വെളിപ്പെടുത്തലിന് മുന്നോടിയായി, 5 ഡോർ മഹീന്ദ്ര ഥാറിന്റെ ഇന്റീരിയർ ഇന്റർനെറ്റിൽ ചോർന്നതായാണ് പുതിയ റിപ്പോര്‍ട്ട്. 3-ഡോർ മോഡലിനെ അപേക്ഷിച്ച് ഉപഭോക്താക്കൾക്ക് അഞ്ച് ഡോര്‍ വാഹനം കൂടുതൽ പ്രായോഗിക ക്യാബിൻ വാഗ്ദാനം ചെയ്യുമെന്ന് പുറത്തുവന്ന ചിത്രങ്ങൾ സ്ഥിരീകരിക്കുന്നു. ഡാഷ്‌ബോർഡ് ഡിസൈൻ നിലവിലെ ഥാർ 3 ഡോറിന് സമാനമാണ്. മുൻ സീറ്റ് ലേഔട്ടും 3-ഡോർ മോഡലിന് സമാനമാണ്. വാഹനം രണ്ടാം നിരയിൽ മാന്യമായ ലെഗ്‌റൂം ഇടം നൽകും. വലിയ ബാഗുകളും സ്യൂട്ട്കേസുകളും ഉൾക്കൊള്ളാൻ സ്ഥലമുള്ള ഒരു വലിയ ബൂട്ടും ദൃശ്യമാണ്. ഇതോടൊപ്പം, പിൻസീറ്റുകൾ 50:50 സ്പ്ലിറ്റിലാണ്, ലഗേജ് സ്പേസ് കൂടുതൽ വർധിപ്പിക്കാൻ ഒരാൾക്ക് അവയെ മടക്കിവെക്കാം.

അടിസ്ഥാനപരമായി ഥാറിന്റെ പ്ലാറ്റ്‌ഫോമിന്റെ പരിഷ്‌ക്കരിച്ച പതിപ്പായ സ്‌കോർപിയോ എൻ പ്ലാറ്റ്‌ഫോമിനെ അടിസ്ഥാനമാക്കിയാണ് ഥാറിന്റെ 5-ഡോർ എൽഡബ്ല്യുബി പതിപ്പ് എന്ന് മഹീന്ദ്ര ഇതിനകം സ്ഥിരീകരിച്ചിട്ടുണ്ട്. നവീകരിച്ച പ്ലാറ്റ്‌ഫോം നിർമ്മിക്കാൻ മഹീന്ദ്ര ഉയർന്ന കരുത്തുള്ള സ്റ്റീൽ ഉപയോഗിച്ചിട്ടുണ്ട്. 3-ഡോർ ഥാറിനെ അപേക്ഷിച്ച് പുതിയ മോഡൽ മികച്ച ഹാൻഡ്‌ലിംഗും ഉയർന്ന വേഗതയുള്ള പെരുമാറ്റവും വാഗ്ദാനം ചെയ്യുമെന്ന് പ്രതീക്ഷിക്കുന്നു.

സസ്‌പെൻഷൻ സജ്ജീകരണം സ്‌കോർപിയോ എന്നുമായി പങ്കിടും. കൂടാതെ അഞ്ച് ഡോർ ഥാർ മെച്ചപ്പെട്ട സുഖസൗകര്യങ്ങൾ പ്രദാനം ചെയ്യുമെന്ന് പ്രതീക്ഷിക്കുന്നു. പുതിയ എൽഡബ്ല്യുബി ഥാറിനെ ഉൾക്കൊള്ളാൻ പ്ലാറ്റ്‌ഫോം മാറ്റും. പുതിയ മോഡൽ യഥാർത്ഥ മൂന്ന് ഡോർ ഥാർ രൂപവും സവിശേഷതകളും നിലനിർത്തും.

സ്റ്റൈലിംഗ് ഫീച്ചറുകളുടെ കാര്യത്തിൽ, പുതിയ 5 ഡോർ ഥാറിൽ വൃത്താകൃതിയിലുള്ള ഹെഡ്‌ലാമ്പുകൾ, 7 സ്ലാറ്റുകൾ ഫ്രണ്ട് ഗ്രിൽ, ഫ്രണ്ട് ഫെൻഡറുകൾ ഘടിപ്പിച്ച എല്‍ഇഡി DRL-കൾ, 18 ഇഞ്ച് അലോയി വീലുകൾ എന്നിവയും മറ്റുള്ളവയും നിലനിർത്തും. അഞ്ച് ഡോർ മഹീന്ദ്ര ഥാർ നിലവിലുള്ള ഥാറിന്റെ ടെയിൽഗേറ്റ് നിലനിർത്തുമെന്ന് പുറത്തുവന്ന ചിത്രങ്ങൾ സ്ഥിരീകരിക്കുന്നു. അഞ്ച് ഡോര്‍ ഥാറിന് കൺവേർട്ടിബിൾ ഓപ്ഷൻ ലഭിക്കുമോ ഇല്ലയോ എന്നത് ഇതുവരെ സ്ഥിരീകരിച്ചിട്ടില്ല.

2023 മഹീന്ദ്ര ഥാർ എൽഡബ്ല്യുബിക്ക് കൂടുതൽ ശക്തമായ പെട്രോൾ, ഡീസൽ എഞ്ചിൻ ഓപ്ഷനുകൾ ലഭിക്കുമെന്ന് പ്രതീക്ഷിക്കുന്നു. സ്‍കോര്‍പ്പിയോ എന്നിന്റെ 2.0L ടർബോ പെട്രോൾ എഞ്ചിന് 5,000rpm-ൽ 200bhp കരുത്തും 370-380Nm ന്റെ പീക്ക് ടോർക്കും ഉത്പാദിപ്പിക്കാൻ കഴിയും. ട്രാൻസ്മിഷൻ തിരഞ്ഞെടുപ്പുകളിൽ ആറ് സ്പീഡ് മാനുവലും ആറ് സ്പീഡ് ഓട്ടോമാറ്റിക്കും ഉൾപ്പെടുന്നു.