പുത്തൻ ഫോർസ് ഗൂർഖയുടെ ഇന്‍റീരിയര്‍ വിവരങ്ങളും ചോര്‍ന്നു

ഗൂർഖയുടെ അഞ്ച്-വാതില്‍ മോഡലിന് അതിന്റെ മൂന്ന് വാതിലുകളുള്ള സഹോദരങ്ങളുമായി ഇന്റീരിയറിലും സാമ്യമുണ്ട് എന്നാണ് റിപ്പോര്‍ട്ടുകള്‍

അഞ്ച് വാതിലുകളുള്ള ഗൂർഖ എസ്‌യുവി ഇന്ത്യൻ വിപണിയിൽ അവതരിപ്പിക്കാനുള്ള അവസാനവട്ട ഒരുക്കത്തിലാണ് ഫോഴ്‌സ് മോട്ടോഴ്‌സ്. എസ്‌യുവി നേരത്തെ പരീക്ഷണം നടത്തിയിരുന്നെങ്കിലും, ഗൂർഖ അഞ്ച് വാതിലുകളുള്ള ഇന്റീരിയർ കാണിക്കുന്ന ഒരു കൂട്ടം ഫോട്ടോകൾ ഇപ്പോൾ പുറത്തുവന്നതായി ഓട്ടോ കാര്‍ ഇന്ത്യ റിപ്പോര്‍ട്ട് ചെയ്യുന്നു.  ഈ ചാര ചിത്രങ്ങൾ പരിശോധിക്കുമ്പോൾ, വാഹനം നിർമ്മാണത്തിന് തയ്യാറാണെന്നാണ് വ്യക്തമാകുന്നത്. 

ഗൂർഖയുടെ അഞ്ച്-വാതില്‍ മോഡലിന് അതിന്റെ മൂന്ന് വാതിലുകളുള്ള സഹോദരങ്ങളുമായി ഇന്റീരിയറിലും സാമ്യമുണ്ട് എന്നാണ് റിപ്പോര്‍ട്ടുകള്‍. ഇത് ഇരുണ്ട ചാരനിറത്തിലുള്ള ഡാഷ്‌ബോർഡ് നിലനിർത്തുന്നു, കൂടാതെ മാനുവൽ എസിയും ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റവും ഉൾപ്പെടെ മിക്ക ഫീച്ചറുകളും നിലവിലെ മോഡലിനെ പിന്തുരുന്നതായി തോന്നുന്നു. സെന്റർ കൺസോളിന്റെയും ഫ്രണ്ട് പവർ വിൻഡോ നിയന്ത്രണങ്ങളുടെയും ലേഔട്ടും സമാനമാണ്. 

ഗൂർഖ ഫൈവ്-ഡോറിൽ ഒന്നിലധികം സീറ്റിംഗ് ലേഔട്ട് ഓപ്‌ഷനുകൾ ഉണ്ടായിരിക്കുമെന്നും റിപ്പോര്‍ട്ടുകള്‍ ഉണ്ട്. രണ്ടാമത്തെ നിരയിൽ ഒരു ബെഞ്ച് സീറ്റ് അല്ലെങ്കിൽ ക്യാപ്റ്റൻ സീറ്റുകൾ, അതുപോലെ എതിർവശത്തുള്ള ജമ്പ് സീറ്റുകൾ അല്ലെങ്കിൽ മൂന്നാം നിരയിൽ ക്യാപ്റ്റൻ സീറ്റുകൾ എന്നിവ ഉൾപ്പെടുന്നു.  അഞ്ച് വാതിലുകളുള്ള ഗൂർഖയുടെ മുൻ ചാര ചിത്രങ്ങൾ മൂന്നാം നിരയിലെ ജമ്പ് സീറ്റുകൾ കാണിച്ചിരുന്നു. അതേസമയം  രണ്ടാമത്തെയും മൂന്നാമത്തെയും നിരകളിൽ  ക്യാപ്റ്റൻ സീറ്റുകള്‍ ഉപയോഗിക്കുന്ന ചിത്രങ്ങളും നേരത്തെ പുറത്തുവന്നിരുന്നു. 

ഗൂർഖ ത്രീ-ഡോറിന്റെ പരിഷ്കരിച്ച സി ഇൻ സി പ്ലാറ്റ്‌ഫോമിനെ അടിസ്ഥാനമാക്കിയുള്ളതാണ് ഗൂർഖ അഞ്ച് ഡോർ. വാഹനത്തിന് 400 എംഎം നീളമുള്ള വീൽബേസ് പ്രതീക്ഷിക്കുന്നു. എഞ്ചിനിൽ മാറ്റങ്ങളൊന്നും വരുത്താൻ സാധ്യതയില്ല. മൂന്ന് ഡോർ പതിപ്പിൽ ഡ്യൂട്ടി ചെയ്യുന്ന 2.6 എൽ ടർബോ ഡീസൽ മെഴ്‍സിഡസ് എഞ്ചിനിൽ നിന്നാണ് 5-ഡോർ ഫോഴ്‌സ് ഗൂർഖയുടെ പവർ ലഭിക്കുന്നത്. മോട്ടോർ 91 bhp കരുത്തും 250 എൻഎം ടോര്‍ഖും ഉത്പാദിപ്പിക്കുന്നു. ഓഫ്-റോഡ് എസ്‌യുവിക്ക് മെക്കാനിക്കലി ലോക്ക് ചെയ്യാവുന്ന ഫ്രണ്ട്, റിയർ ഡിഫറൻഷ്യലുകളോട് കൂടിയ 4X4 ഡ്രൈവ്‌ട്രെയിൻ സിസ്റ്റം ഉണ്ടായിരിക്കും. ഗൂർഖ ഫൈവ്-ഡോർ 4X4, 4X2 വേരിയന്റുകളിൽ വരാൻ സാധ്യതയുണ്ട്.

ലോ-റേഞ്ച് ഗിയർബോക്‌സും ലോക്കിംഗ് ഡിഫറൻഷ്യലുകളും ഉൾപ്പെടെ ഗൂർഖ എസ്‌യുവിയുടെ അഞ്ച് ഡോർ പതിപ്പിന് ഗൂർഖ ത്രീ-ഡോറിന്റെ അതേ ഓഫ്-റോഡ് ഗിയർ ലഭിക്കുമെന്ന് പ്രതീക്ഷിക്കുന്നു.  വരും മാസങ്ങളിൽ ഫോഴ്‌സ് ഗൂർഖ അഞ്ച് ഡോർ പുറത്തിറക്കുമെന്ന് പ്രതീക്ഷിക്കുന്നു. ലോഞ്ചിൽ ഇതിന് നേരിട്ടുള്ള എതിരാളികളില്ലെങ്കിലും, ഓട്ടോ എക്‌സ്‌പോയിൽ അരങ്ങേറുമെന്ന് പ്രതീക്ഷിക്കുന്ന മാരുതി സുസുക്കി ജിംനി ഫൈവ്-ഡോർ , വരാനിരിക്കുന്ന ജനപ്രിയ മഹീന്ദ്ര ഥാറിന്റെ അഞ്ച് ഡോർ പതിപ്പ് തുടങ്ങിയ മോഡലുകളില്‍ നിന്ന് 2023-ൽ ഗൂര്‍ഖ കടുത്തമത്സരം നേരിടും.