സുരക്ഷയിൽ ഒന്നാമൻ: ഹ്യുണ്ടായി നെക്സോയുടെ രഹസ്യം എന്ത്?

ഏറ്റവും പുതിയ യൂറോ എൻസിഎപി സുരക്ഷാ പരിശോധനയിൽ ഹ്യുണ്ടായിയുടെ ഹൈഡ്രജൻ ഫ്യുവൽ-സെൽ ഇലക്ട്രിക് എസ്‌യുവിയായ നെക്‌സോ ഏറ്റവും ഉയർന്ന ഫൈവ് സ്റ്റാർ റേറ്റിംഗ് നേടി. മുതിർന്നവരുടെ സംരക്ഷണം, കുട്ടികളുടെ സംരക്ഷണം എന്നിവയുൾപ്പെടെ ഈ വാഹനം മികച്ച പ്രകടനം കാഴ്ചവച്ചു.

ഏറ്റവും പുതിയ യൂറോ എൻസിഎപി സുരക്ഷാ പരിശോധനയിൽ പുതിയ ഹ്യുണ്ടായി നെക്‌സോ ഏറ്റവും ഉയർന്ന അഞ്ച് സ്റ്റാർ റേറ്റിംഗ് നേടിയതായി ഹ്യുണ്ടായി മോട്ടോർ കമ്പനി പ്രഖ്യാപിച്ചു. ഹ്യുണ്ടായിയുടെ അടുത്ത തലമുറ ഹൈഡ്രജൻ ഫ്യുവൽ-സെൽ ഇലക്ട്രിക് എസ്‌യുവിയാണ് നെക്സോ. വാഹന സുരക്ഷ വിലയിരുത്തുന്നതിനുള്ള യൂറോപ്പിലെ ഏറ്റവും വിശ്വസനീയമായ സ്വതന്ത്ര സ്ഥാപനമായ യൂറോ എൻസിഎപിയിൽ (യൂറോപ്യൻ ന്യൂ കാർ അസസ്‌മെന്റ് പ്രോഗ്രാം) മുതിർന്നവരുടെ സംരക്ഷണം, കുട്ടികളുടെ സംരക്ഷണം, ദുർബലരായ റോഡ് ഉപയോക്താക്കളുടെ സംരക്ഷണം, സുരക്ഷാ സഹായ സാങ്കേതികവിദ്യകൾ എന്നിങ്ങനെ നാല് വിഭാഗങ്ങളിലായി പുതിയ വാഹനങ്ങളെ വിലയിരുത്തുന്നു. മുതിർന്നവരുടെ സുരക്ഷയിൽ 90 ശതമാനവും കുട്ടികളുടെ സുരക്ഷയിൽ 85 ശതമാനവും ഉൾപ്പെടെ നാല് മേഖലകളിലും പുതിയ ഹ്യുണ്ടായി നെക്‌സോ മികച്ച ഫലങ്ങൾ കൈവരിച്ചു.

യൂറോ എൻസിഎപി ക്രാഷ് ടെസ്റ്റിൽ മുതിർന്ന യാത്രക്കാരുടെ പരിശോധനകളുടെ ഭാഗമായി ഹ്യുണ്ടായി നെക്‌സോ മുൻവശത്തെ ഓഫ്‌സെറ്റ് പരിശോധനയിൽ പാസഞ്ചർ കമ്പാർട്ട്‌മെന്‍റ് സ്ഥിരത പുലർത്തി. ഡ്രൈവർക്കും യാത്രക്കാർക്കും കാൽമുട്ടുകൾ, തുടയെല്ലുകൾ, എല്ലാ നിർണായക ശരീര മേഖലകൾ എന്നിവയ്ക്കും മികച്ച സംരക്ഷണം നൽകി. ഫുൾ-വിഡ്ത്ത് റിജിഡ് ബാരിയർ ടെസ്റ്റിലും നെക്സോ ശക്തമായ പ്രകടനം കാഴ്ചവച്ചു. സൈഡ് ബാരിയർ ടെസ്റ്റിൽ പരമാവധി പോയിന്റുകൾ നേടി. അതിന്‍റെ സെന്‍റർ എയർബാഗ് വഴി ഫാർ-സൈഡ് യാത്രക്കാരുടെ സംരക്ഷണം ഫലപ്രദമായി നൽകി. പിൻവശത്തെ ഇംപാക്ട് വിലയിരുത്തലുകളിൽ മുൻവശത്തെയും പിൻവശത്തെയും സീറ്റുകൾക്കുള്ള സംരക്ഷണം മികച്ചതായി റേറ്റുചെയ്‌തു.

കാറിലെ കുട്ടികളുടെ സുരക്ഷ ഉറപ്പാക്കുന്ന പ്രകടനവും മികച്ചതായിരുന്നു. ആറ്, പത്ത് വയസ് പ്രായമുള്ള കുട്ടികളുടെഡമ്മികൾ മുൻവശത്തെയും വശങ്ങളിലെയും ഇംപാക്ട് ടെസ്റ്റുകളിൽ ശരീരത്തിന്റെ എല്ലാ നിർണായക ഭാഗങ്ങളിലും മികച്ച സംരക്ഷണം കാണിച്ചു. അങ്ങനെ പരമാവധി പോയിന്റുകൾ നേടി. അധിക സുരക്ഷാ സവിശേഷതകളിൽ വ്യക്തമായ സ്റ്റാറ്റസ് സൂചനയുള്ള ഫ്രണ്ട് പാസഞ്ചർ എയർബാഗ് നിർജ്ജീവമാക്കൽ ഫംഗ്ഷനും എല്ലാ അംഗീകൃത ചൈൽഡ് നിയന്ത്രണ സംവിധാനങ്ങൾക്കുമുള്ള സുരക്ഷിതമായ ഇൻസ്റ്റാളേഷൻ സംവിധാനവും ഈ കാറിൽ ഉൾപ്പെടുന്നു.

നെക്‌സോയുടെ നൂതന ഇ-കോൾ സിസ്റ്റം, അപകടാനന്തര സെക്കൻഡറി ആഘാത പ്രതിരോധ സാങ്കേതികവിദ്യ, വാഹനം വെള്ളത്തിൽ മുങ്ങുന്ന സാഹചര്യത്തിൽ പരിശോധിച്ചുറപ്പിച്ച വാതിൽ/ജനാല പ്രവർത്തനക്ഷമത എന്നിവയും യൂറോ എൻസിഎപി അംഗീകരിച്ചു.