ഇന്ത്യയ്ക്ക് മാത്രമായി ഹ്യൂണ്ടായിയുടെ 'അൽകാസർ'; വെല്ലുവിളി ഇന്നോവയ്ക്ക്

നിലവില്‍ നിരത്തുകളിലുള്ള രണ്ടാം തലമുറ ക്രെറ്റയുടെ പ്രീമിയവും സ്ഥലസൗകര്യം കൂടിയതുമായ പതിപ്പായിരിക്കും ഏഴ് സീറ്റര്‍ ക്രെറ്റയെന്നാണ് വിവരങ്ങള്‍. ലോകത്തെവിടെയും ഹ്യുണ്ടായി നിലവില്‍ അൽകാസർ എന്ന പേരിൽ ഒരു എസ്‌യുവി വിൽക്കുന്നില്ല. ഇന്ത്യയ്ക്കായുള്ള പ്രത്യേക മോഡലിനാണ് അൽകാസർ എന്ന പേരെന്നും റിപ്പോര്‍ട്ടുകളുണ്ട്

ദക്ഷിണ കൊറിയൻ വാഹന നിർമ്മാതാക്കളായ ഹ്യൂണ്ടായിയുടെ ജനപ്രിയ മോഡലാണ് ക്രെറ്റ. ഈ വാഹനത്തിന്‍റെ 7 സീറ്റർ പതിപ്പ് പുറത്തിറക്കാനുള്ള ഒരുക്കത്തിലാണെന്ന് കമ്പനിയെന്ന് നേരത്തെ റിപ്പോർട്ടുകള്‍ ഉണ്ടായിരുന്നു. ഇപ്പോഴിതാ ഈ പുത്തൻ 7 സീറ്റർ എസ്‌യുവിയുടെ വരവ് കമ്പനി സ്ഥിരീകരിച്ചതായും അൽകാസർ എന്നാണ് ഈ എസ്‌യുവിയുടെ പേരെന്നുമാണ് ദേശീയ മാധ്യമങ്ങളുടെ റിപ്പോര്‍ട്ട് .

ഹ്യുണ്ടായി അൽകാസർ എസ്‌യുവി ആദ്യം വില്‍പ്പനയ്ക്ക് എത്തുന്ന വിപണി ഇന്ത്യ ആയിരിക്കുമെന്നാണ് റിപ്പോര്‍ട്ടുകള്‍. ലോകത്തെവിടെയും ഹ്യുണ്ടായി നിലവില്‍ അൽകാസർ എന്ന പേരിൽ ഒരു എസ്‌യുവി വിൽക്കുന്നില്ല. ഇന്ത്യയ്ക്കായുള്ള പ്രത്യേക മോഡലിനാണ് അൽകാസർ എന്ന പേരെന്നും റിപ്പോര്‍ട്ടുകളുണ്ട്. അൽകാസർ എന്ന പേര് ഉപയോഗിക്കാനുള്ള അവകാശത്തിനായി 2020 ഏപ്രിൽ 13-ന് ഹ്യുണ്ടായി അപേക്ഷ സമർപ്പിച്ചിരുന്നു. മധ്യകാലഘട്ടത്തിലെ ഒരു തരം മൂറിഷ് കോട്ട അല്ലെങ്കിൽ കൊട്ടാരത്തിന്റെ പേരാണ് അൽകാസർ. ഇതിൽ നിന്നും പ്രചോദനം ഉൾക്കൊണ്ടാണ് വിശാലവും, ദൃഢതയും കൈമുതലായ അൽകാസർ എസ്‌യുവി ഒരുങ്ങുന്നതെന്ന് ഹ്യുണ്ടായ് അവകാശപ്പടുന്നതായാണ് റിപ്പോര്‍ട്ടുകള്‍.

നിലവില്‍ നിരത്തുകളിലുള്ള രണ്ടാം തലമുറ ക്രെറ്റയുടെ പ്രീമിയവും സ്ഥലസൗകര്യം കൂടിയതുമായ പതിപ്പായിരിക്കും ഏഴ് സീറ്റര്‍ ക്രെറ്റയെന്നാണ് വിവരങ്ങള്‍. അതേസമയം, ഹ്യുണ്ടായിയുടെ പ്രീമിയം എസ്‌യുവി മോഡലായ പാലിസേഡില്‍ നല്‍കിയിട്ടുള്ള ഗ്രില്ലും എയര്‍ ഇന്‍ ടേക്കും സ്‌കിഡ് പ്ലേറ്റുമായിരിക്കും ഏഴ് സീറ്റര്‍ ക്രെറ്റയില്‍ നല്‍കുകയെന്നാണ് വിവരം. മറ്റ് ഡിസൈന്‍ ശൈലികള്‍ റെഗുലര്‍ ക്രെറ്റയിലേത് തുടര്‍ന്നേക്കും.

ഹ്യൂണ്ടായ് അൽകാസറിലും 113 ബിഎച്ച്പി പവറും 144 എൻഎം ടോർക്കും ഉത്പാദിപ്പിക്കുന്ന നാച്ചുറലി ആസ്പിറേറ്റഡ് 1.5 ലിറ്റർ പെട്രോൾ, 113 ബിഎച്ച്പി പവറും 250 എൻഎം ടോർക്കും നിർമിക്കുന്ന 1.5 ലിറ്റർ ടർബോചാർജ്ഡ് ഡീസൽ എന്നീ എൻജിനുകൾ തന്നെയാവും ലഭിക്കുക. എംജി ഹെക്ടറും (5 സീറ്റർ), ഹെക്ടർ പ്ലസും (7 സീറ്റർ) പോലെയാണ് അൽകാസറിന്റെയും വരവും. ക്രെറ്റയിൽ നിന്നും വ്യത്യസ്തമായ വലിപ്പം കൂടിയ ഗ്രിൽ, നീളം കൂടിയ ബോഡി പാനലുകൾ, റീഡിസൈൻ ചെയ്ത ടെയിൽ ലാമ്പും, പിൻ ബമ്പറുകളും അൽകാസറിൽ ഉൾപ്പെടും. അൽകാസറിന് നീളവും കൂടുതലായിരിക്കുമെന്നാണ് റിപ്പോർട്ട്.

കിയ സെല്‍റ്റോസിനും ഹ്യുണ്ടായി വെര്‍ണയ്ക്കും അടിസ്ഥാനമൊരുക്കുന്ന കെ2 പ്ലാറ്റ്ഫോമിന്റെ പുതുക്കിയ പതിപ്പിലായിരിക്കും ഏഴ് സീറ്റര്‍ ക്രെറ്റ ഒരുങ്ങുന്നത്. ആറ്, ഏഴ് സീറ്റിങ്ങ് ഓപ്ഷനുകളില്‍ ക്രെറ്റ എത്തിന്നുണ്ട്. ഇതിന് ആനുപാതികമായി വാഹനത്തിന്റെ നീളത്തിലും വീല്‍ബേസിലും മാറ്റം വരുത്തിയേക്കും. ആറ് സീറ്റ് പതിപ്പില്‍ ക്യാപ്റ്റന്‍ സീറ്റുകളും ഏഴ് സീറ്റ് പതിപ്പില്‍ ഏറ്റവും പിന്നിലെ നിര ബഞ്ച് സീറ്റുമായിരിക്കും നല്‍കുകയെന്നാണ് റിപ്പോര്‍ട്ട്.

2021 പകുതിയോടെ വാഹനം നിരത്തിലെത്തുമെന്നാണ് പ്രതീക്ഷിക്കുന്നത്. 14 ലക്ഷം മുതലായിരിക്കും വില തുടങ്ങുന്നത്. ടാറ്റ ഗ്രാവിറ്റാസ് എക്സ് യുവി500 ഹെക്ടർ പ്ലസ് എന്നിവർ അടങ്ങുന്ന വിഭാഗത്തിലേയ്ക്കാണ് എത്തുന്നതെങ്കിലും ഇന്നോവയ്ക്കായിരിക്കും പുത്തന്‍ ക്രെറ്റ അഥവാ അല്‍കാസര്‍ പ്രധാനമായും വെല്ലുവിളിയാകുക. 2021 ടാറ്റ സഫാരി, എംജി ഹെക്ടർ പ്ലസ് തുടങ്ങിയവരും എതിരാളികളായേക്കും.