2023 ഏപ്രിലിൽ നിർത്തലാക്കിയ KUV100 മിനി എസ്‌യുവിക്ക് പകരമായി ഇത് അവതരിപ്പിക്കാൻ സാധ്യതയുണ്ട്.
അടുത്തിടെ, തമിഴ്‌നാട്ടിലെ കാഞ്ചീപുരത്ത് പുതിയ മഹീന്ദ്ര കോംപാക്റ്റ് എസ്‌യുവിയുടെ ടെസ്റ്റ് പതിപ്പ് ക്യാമറയിൽ പതിഞ്ഞിരുന്നു. വരാനിരിക്കുന്ന ഈ ഉൽ‌പ്പന്നത്തെക്കുറിച്ച് ഔദ്യോഗിക പ്രഖ്യാപനങ്ങളൊന്നുമില്ലെങ്കിലും, ഇതൊരു പുതിയ മൈക്രോ എസ്‌യുവിയാണെന്നാണ് റിപ്പോർട്ടുകള്‍. 2023 ഏപ്രിലിൽ നിർത്തലാക്കിയ KUV100 മിനി എസ്‌യുവിക്ക് പകരമായി ഇത് അവതരിപ്പിക്കാൻ സാധ്യതയുണ്ട്. KUX100 NXT 1.2L (82PS/115Nm) പെട്രോൾ എഞ്ചിനും 5-സ്പീഡ് മാനുവൽ ട്രാൻസ്മിഷനും ലഭ്യമാണ്. ബ്രാൻഡിന്റെ പുതിയ ചെറു എസ്‌യുവിക്ക് മഹീന്ദ്ര XUV100 എന്ന് പേരിട്ടേക്കുമെന്ന് അഭ്യൂഹമുണ്ട്.
കമ്പനിയുടെ ഉൽപ്പന്ന നിരയിൽ, ഇത് മഹീന്ദ്ര XUV300 ന് താഴെയായി സ്ഥാനം പിടിക്കുകയും ടാറ്റ പഞ്ച്, മാരുതി സുസുക്കി ഫ്രോങ്ക്സ്, ഹ്യുണ്ടായ് എക്‌സ്‌റ്റർ എന്നിവയ്‌ക്കെതിരെ മത്സരിക്കുകയും ചെയ്യും . വിലയുടെ കാര്യത്തിൽ ഈ ചെറിയ എസ്‌യുവി, നിസാൻ മാഗ്നൈറ്റ്, റെനോ കിഗർ മുതൽ ഹ്യുണ്ടായ് ഗ്രാൻഡ് ഐ 10 നിയോസ്, മാരുതി സുസുക്കി ഇഗ്നിസ് വരെയുള്ള ഒന്നിലധികം കാറുകളെ നേരിടും. ഹ്യുണ്ടായിയുടെ ചെറിയ എസ്‌യുവി 2023 ജൂലൈ 10 - ന് വിൽപ്പനയ്‌ക്കെത്താൻ തയ്യാറാണ്. പുതിയ മഹീന്ദ്ര കോംപാക്റ്റ് എസ്‌യുവി 2024 അവസാനത്തോടെ നിരത്തിലെത്തുമെന്നാണ് റിപ്പോർട്ട്.
പ്രോട്ടോടൈപ്പിൽ ഡമ്മി ഹെഡ്‌ലാമ്പുകളും ടെയിൽലാമ്പുകളും ഉള്ളതിനാൽ മൈക്രോ എസ്‌യുവി അതിന്റെ പ്രാരംഭ പരീക്ഷണ ഘട്ടത്തിലാണെന്ന് തോന്നുന്നു. കഴിഞ്ഞ വർഷം യുകെയിൽ നടന്ന ഒരു പരിപാടിയിൽ പ്രദർശിപ്പിച്ച മഹീന്ദ്രയുടെ പുതിയ ഇലക്ട്രിക് എസ്‌യുവി കൺസെപ്‌റ്റുകളിൽ നിന്ന് മോഡലിന് അതിന്റെ ചില ഡിസൈൻ ബിറ്റുകൾ ലഭിച്ചേക്കാം. ബ്രേക്ക് ലൈറ്റുകളുള്ള മേൽക്കൂരയിൽ ഘടിപ്പിച്ച സ്‌പോയിലർ, സംയോജിത റിഫ്‌ളക്ടറുകളുള്ള ഒരു കൂറ്റൻ പിൻ ബമ്പർ, ടെയിൽഗേറ്റിന്റെ വീതിയിൽ പ്രവർത്തിക്കുന്ന കട്ടിയുള്ള സ്ട്രിപ്പ്, ഉയര്‍ന്ന ലൈസൻസ് പ്ലേറ്റ് എന്നിവ പ്രോട്ടോടൈപ്പിന്റെ സവിശേഷതകളാണ്.
പുതിയ മഹീന്ദ്ര കോംപാക്ട് എസ്‌യുവി 1.2 ലിറ്റർ നാച്ചുറലി ആസ്പിറേറ്റഡ് പെട്രോൾ എഞ്ചിനിനൊപ്പം നൽകാമെന്ന് വിവിധ റിപ്പോര്‍ട്ടുകള്‍ സൂചിപ്പിക്കുന്നു. 1.2ലിറ്റർ ടർബോചാർജ്ഡ് പെട്രോൾ മോട്ടോർ ഉയർന്ന ട്രിമ്മുകൾക്കായി നീക്കിവയ്ക്കാനും സാധ്യതയുണ്ട്. ഇത് മാനുവൽ, ഓട്ടോമാറ്റിക് ഗിയർബോക്‌സുമായി വരുമെന്ന് പ്രതീക്ഷിക്കുന്നു.