മാരുതി കാറുകളുടെ വില ഉയരുമോ? നിർണായക തീരുമാനം ഉടൻ

മാരുതി സുസുക്കി, തങ്ങളുടെ ചെറുകാറുകളുടെ വില വർദ്ധിപ്പിക്കുന്നതിനെക്കുറിച്ച് ആലോചിക്കുന്നു. ജിഎസ്ടി നിരക്ക് കുറച്ചതിനെ തുടർന്ന് വില കുറച്ചിരുന്ന കമ്പനി, ഈ തന്ത്രപരമായ വില തുടരണമോ എന്ന കാര്യത്തിൽ ഉടൻ തീരുമാനമെടുക്കും.  

ഇന്ത്യയിലെ മുൻനിര ഓട്ടോമൊബൈൽ നിർമ്മാതാക്കളായ മാരുതി സുസുക്കി ഇന്ത്യ , ചെറുകാറുകളുടെ വില വർദ്ധനവ് സംബന്ധിച്ച് ഉടൻ തന്നെ തീരുമാനമെടുക്കും. സെപ്റ്റംബറിൽ ചെറുകാറുകളുടെ ജിഎസ്ടി നിരക്കുകൾ കുറച്ചതിനെത്തുടർന്ന് മാരുതി ഈ വാഹനങ്ങളുടെയും വില കുറച്ചതായി കമ്പനിയിലെ ഒരു മുതിർന്ന ഉദ്യോഗസ്ഥൻ പറഞ്ഞു. കഴിഞ്ഞ കുറച്ച് മാസങ്ങളായി കമ്പനിയുടെ ചെറുകാറുകളുടെ വിൽപ്പനയിൽ വർദ്ധനവുണ്ടായി. വിശദാംശങ്ങൾ വിശദമായി പരിശോധിക്കാം.

എസ്-പ്രസ്സോ മോഡലിന് 1,29,600 രൂപ വരെയും ആൾട്ടോ കെ10 മോഡലിന് 1,07,600 രൂപ വരെയും സെലേറിയോ മോഡലിന് 94,100 രൂപ വരെയും വാഗൺആർ മോഡലിന് 79,600 രൂപ വരെയും കമ്പനി വില കുറച്ചിരുന്നു. കൂടുതൽ ആളുകളിലേക്ക് കാറുകളുടെ ലഭ്യത വർദ്ധിപ്പിക്കുക എന്നതായിരുന്നു ചെറിയ കാറുകളുടെ തന്ത്രപരമായ വിലനിർണ്ണയത്തിന് പിന്നിലെ തങ്ങളുടെ ലക്ഷ്യമെന്ന് മാരുതി സുസുക്കി ഇന്ത്യയുടെ മാർക്കറ്റിംഗ് ആൻഡ് സെയിൽസ് സീനിയർ എക്സിക്യൂട്ടീവ് ഓഫീസർ  പാർത്ഥോ ബാനർജി അടുത്തിടെ മാധ്യമപ്രവർത്തകരോട് പറഞ്ഞു.

മറ്റ് കമ്പനികളെപ്പോലെ മാരുതി വില വർധിപ്പിക്കാനുള്ള സാധ്യതയെക്കുറിച്ച് ചോദ്യത്തിന് ജിഎസ്ടി മാത്രമുള്ള വിലക്കുറവ് എന്ന നിലയിലേക്ക് തിരികെ പോകണോ അതോ തന്ത്രപരമായ വിലനിർണ്ണയം തുടരണോ എന്ന് കമ്പനി ഉടൻ തന്നെ തീരുമാനിക്കും എന്നും ബാനർജി പറഞ്ഞു.

വാഹനങ്ങൾ ബുക്ക് ചെയ്ത് ഇതുവരെ അവ ലഭിക്കാത്ത ഉപഭോക്താക്കൾക്കാണ് ഇത് ബാധകമാകുക എന്ന് ബാനർജി പറഞ്ഞു. അടുത്ത 15-20 ദിവസത്തേക്ക് ബുക്ക് ചെയ്ത ഉപഭോക്താക്കൾക്ക് ഞങ്ങൾ സേവനം നൽകുന്നത് തുടരും. ഇപ്പോൾ ഞങ്ങളുടെ ചിന്ത അതാണെന്നും  ഉടൻ തന്നെ ഒരു പ്രഖ്യാപനം നടത്തും എന്നും പാർത്ഥോ ബാനർജി വ്യക്തമാക്കി.