കോളടിച്ചത് വലിയ ഫാമിലികൾക്ക്, മാരുതിയുടെ ഈ ജനപ്രിയ എംപിവിക്ക് വില വെട്ടിക്കുറച്ചു

മാരുതി സുസുക്കി ഇൻവിക്റ്റോ ഏപ്രിൽ മാസത്തിൽ വാങ്ങുന്നവർക്ക് 1.40 ലക്ഷം രൂപ വരെ കിഴിവ് ലഭിക്കും. ടോപ്പ്-സ്പെക്ക് ആൽഫ+ വേരിയന്റിൽ ക്യാഷ് ഡിസ്‌കൗണ്ടും എക്സ്ചേഞ്ച് ബോണസുംScrappage ഓഫറുകളും ലഭ്യമാണ്.

ഈ ഏപ്രിൽ മാസത്തിൽ മാരുതി സുസുക്കി ഇൻവിക്റ്റോ വാങ്ങാൻ പദ്ധതിയിടുന്നുണ്ടെങ്കിൽ നിങ്ങൾക്ക് ഒരു വലിയ കിഴിവ് ലഭിക്കും. ഈ മാസം ഈ കാറിന് 1.40 ലക്ഷം രൂപ വരെ ആനുകൂല്യങ്ങൾ കമ്പനി വാഗ്‍ദാനം ചെയ്യുന്നു. ഇന്നോവ ഹൈക്രോസിനെ അടിസ്ഥാനമാക്കിയുള്ള മാരുതി സുസുക്കി ഇൻവിക്റ്റോ, ടോപ്പ്-സ്പെക്ക് ആൽഫ+ വേരിയന്റിൽ 1.40 ലക്ഷം രൂപ വരെ ആനുകൂല്യങ്ങളോടെ ലഭ്യമാണ്. ഇതിൽ 25,000 രൂപ ക്യാഷ് ഡിസ്‌കൗണ്ടും 1.15 ലക്ഷം രൂപയുടെ സ്‌ക്രാപ്പേജ് ഓഫറോ അല്ലെങ്കിൽ വാങ്ങുന്നവർക്ക് ഒരു ലക്ഷം രൂപ എക്‌സ്‌ചേഞ്ച് ബോണസോ ഉൾപ്പെടുന്നു.  സീറ്റ+ 7, 8 സീറ്റർ മോഡലുകൾക്കും സമാനമായ ഓഫറുകൾ ലഭിക്കുന്നുണ്ട്.

ഇന്റലിജന്റ് ഇലക്ട്രിക് ഹൈബ്രിഡ് സിസ്റ്റത്തോടുകൂടിയ 2.0 ലിറ്റർ TNGA എഞ്ചിനാണ് മാരുതി ഇൻവിക്റ്റോയിൽ. ഇത് ഒരു ഇ-സിവിടി ഗിയർബോക്സുമായി ഘടിപ്പിച്ചിരിക്കുന്നു. ഇത് 183 bhp പവറും 1250 Nm ടോർക്കും ഉത്പാദിപ്പിക്കുന്നു. 9.5 സെക്കൻഡിനുള്ളിൽ പൂജ്യത്തിൽ നിന്ന് 100 കിലോമീറ്റർ വേഗത കൈവരിക്കാൻ ഈ കാറിന് കഴിയും. അതേസമയം, ഒരു ലിറ്റർ പെട്രോളിൽ 23.24 കിലോമീറ്റർ വരെയാണ് ഇതിന്റെ മൈലേജ്. ടൊയോട്ട ഇന്നോവയെപ്പോലെ, ഇതും 7 സീറ്റർ കോൺഫിഗറേഷനിൽ വരുന്നു.

മസ്‌കുലാർ ക്ലാംഷെൽ ബോണറ്റ്, ഡിആർഎല്ലുകളുള്ള സ്ലീക്ക് എൽഇഡി ഹെഡ്‌ലൈറ്റുകൾ, ക്രോം കൊണ്ട് ചുറ്റപ്പെട്ട ഷഡ്ഭുജ ഗ്രിൽ, വീതിയേറിയ എയർ ഡാം, സിൽവർ സ്‌കിഡ് പ്ലേറ്റുകൾ എന്നിവ ഇതിൽ ഉൾപ്പെടുന്നു. ഡ്യുവൽ-ടോൺ ഡാഷ്‌ബോർഡ്, ലെതർ അപ്ഹോൾസ്റ്ററിയുള്ള പവർഡ് ഓട്ടോമൻ സീറ്റുകൾ, ഇന്റഗ്രേറ്റഡ് മൂഡ് ലൈറ്റിംഗുള്ള പനോരമിക് സൺറൂഫ്, മൾട്ടി-സോൺ ക്ലൈമറ്റ് കൺട്രോൾ, മൾട്ടി-ഫങ്ഷണൽ സ്റ്റിയറിംഗ് വീൽ എന്നിവ ക്യാബിനിൽ ഉൾപ്പെടുന്നു.

മാരുതി സുസുക്കി ഇൻവിക്ടോയ്ക്ക് വൺ-ടച്ച് പവർ ടെയിൽഗേറ്റ് ലഭിക്കും. അതായത് ഒറ്റ സ്പർശനത്തിൽ ടെയിൽഗേറ്റ് തുറക്കും. കമ്പനിയുടെ അടുത്ത തലമുറ സുസുക്കി കണക്റ്റിനൊപ്പം ആറ് എയർബാഗുകളുടെ സുരക്ഷയും ഇതിലുണ്ടാകും. ഇതിന്റെ നീളം 4755 എംഎം, വീതി 1850 എംഎം, ഉയരം 1795 എംഎം ആണ്. ഇതിന് 8 വിധത്തിൽ ക്രമീകരിക്കാവുന്ന പവർ വെന്റിലേറ്റഡ് സീറ്റുകളുണ്ട്. മുൻ സീറ്റുകൾ, രണ്ടാം നിരയിൽ ക്യാപ്റ്റൻ സീറ്റുകൾ, വശങ്ങളിൽ മടക്കാവുന്ന ടേബിളുകൾ, മൂന്നാം നിരയിലേക്ക് എളുപ്പത്തിൽ പ്രവേശിക്കുന്നതിനായി വൺ-ടച്ച് വാക്ക്-ഇൻ സ്ലൈഡ്, മൾട്ടി-സോൺ താപനില ക്രമീകരണങ്ങൾ എന്നിവ ഇതിലുണ്ട്.

ശ്രദ്ധിക്കുക, വ്യത്യസ്‍ത പ്ലാറ്റ്‌ഫോമുകളുടെ സഹായത്തോടെ കാറുകളിൽ ലഭ്യമായ കിഴിവുകളാണ് മുകളിൽ വിശദീകരിച്ചിരിക്കുന്നത്. മേൽപ്പറഞ്ഞിരിക്കുന്ന കിഴിവുകൾ രാജ്യത്തെ വിവിധ സംസ്ഥാനങ്ങൾക്കും വിവിധ ഭൂപ്രദേശങ്ങൾക്കും ഓരോ നഗരത്തിനും ഡീലർഷിപ്പുകൾക്കും സ്റ്റോക്കിനും നിറത്തിനും വേരിയന്‍റിനുമൊക്കെ അനുസരിച്ച് വ്യത്യാസപ്പെട്ടിരിക്കുന്നു. അതായത് ഈ കിഴിവ് നിങ്ങളുടെ നഗരത്തിലോ ഡീലറിലോ കൂടുതലോ കുറവോ ആയിരിക്കാം. അത്തരമൊരു സാഹചര്യത്തിൽ, ഒരു കാർ വാങ്ങുന്നതിന് മുമ്പ്, കൃത്യമായ കിഴിവ് കണക്കുകൾക്കും മറ്റ് വിവരങ്ങൾക്കുമായി നിങ്ങളുടെ തൊട്ടടുത്തുള്ള പ്രാദേശിക ഡീലറെ സമീപിക്കുക.