ഇ-വിറ്റാരയുടെ ചാർജ്ജിംഗിനും സർവ്വീസിനുമൊന്നും ഒരു മുട്ടും ഉണ്ടാകില്ല, ഇത് മാരുതിയുടെ ഉറപ്പ്!

2025 മാർച്ചിൽ ഷോറൂമുകളിൽ എത്താൻ ഒരുങ്ങുന്ന മാരുതി സുസുക്കിയുടെ ആദ്യ ഇലക്ട്രിക് വാഹനമാണ് ഇ വിറ്റാര. വിപുലമായ ചാർജിംഗ് ശൃംഖല, ലീസിംഗ് പദ്ധതികൾ, മികച്ച വിൽപ്പനാനന്തര സേവനങ്ങൾ എന്നിവ ഒരുക്കുന്നു. 49kWh, 61kWh ബാറ്ററി പായ്ക്കുകൾ, 500 കിലോമീറ്റർ റേഞ്ച്, നൂതന സവിശേഷതകൾ എന്നിവയും ഈ വാഹനത്തിന്റെ പ്രത്യേകതകളാണ്.

2025 മാർച്ചിൽ ഷോറൂമുകളിൽ എത്താൻ ഒരുങ്ങുകയാണ് മാരുതി സുസുക്കി ഇ വിറ്റാര. കമ്പനിയുടെ ആദ്യത്തെ ഇലക്ട്രിക് വാഹനമാണിത്. വിപണിയിൽ എത്തുന്നതിനുമുമ്പ്, മതിയായ ചാർജിംഗ് അടിസ്ഥാന സൗകര്യങ്ങൾ സജ്ജീകരിക്കാനും ലീസിംഗ് പ്രോഗ്രാമിലൂടെ മികച്ച വിൽപ്പനാനന്തര സേവനങ്ങൾ നൽകാനും ഒന്നിലധികം ധനകാര്യ ഓപ്ഷനുകൾ വാഗ്ദാനം ചെയ്യാനും മാരുതി സുസുക്കി തയ്യാറെടുക്കുകയാണ് എന്നാണ് പുതിയ റിപ്പോർട്ടുകൾ. രാജ്യവ്യാപകമായി 100 നഗരങ്ങളിൽ 10 കിലോമീറ്റർ ഇടവേളകളിൽ ഫാസ്റ്റ് ചാർജിംഗ് സൗകര്യം സ്ഥാപിക്കാൻ കമ്പനി പദ്ധതിയിടുന്നു.

മാരുതി ഇ വിറ്റാരയെ ഉപഭോക്താക്കളുടെ പ്രാഥമിക കമ്മ്യൂട്ടർ വാഹനമായി സ്ഥാപിക്കുക എന്നതാണ് കമ്പനി ലക്ഷ്യമിടുന്നതെന്ന് മാരുതി സുസുക്കി ഇന്ത്യയുടെ മാർക്കറ്റിംഗ് ആൻഡ് സെയിൽസ് സീനിയർ എക്സിക്യൂട്ടീവ് ഓഫീസർ പാർത്ഥോ ബാനർജി പറഞ്ഞു. ഇത് നേടുന്നതിന്, നല്ല വിൽപ്പനാനന്തര പിന്തുണ ഒരു പ്രധാന ഘടകമാണ്. 1,000 നഗരങ്ങളിൽ വിൽപ്പനാനന്തര സേവനങ്ങൾ വാഗ്ദാനം ചെയ്യാൻ മാരുതി സുസുക്കി പദ്ധതിയിടുന്നു. ഈ വർഷം അവസാനത്തോടെ മാരുതി സുസുക്കിയുടെ ഗുജറാത്ത് നിർമ്മാണ കേന്ദ്രത്തിൽ ഇ വിറ്റാര ഉൽപ്പാദനം ആരംഭിക്കുമെന്നാണ് റിപ്പോർട്ടുകൾ. ഈ ഉൽപ്പാദന പ്ലാന്റ് ആഭ്യന്തര, കയറ്റുമതി വിപണികൾക്ക് സേവനം നൽകും.

തൃപ്‍തികരമായ സേവനങ്ങൾ നൽകുന്നതിനായി, വിൽപ്പനാനന്തര പിന്തുണ ലഭ്യമല്ലാത്ത മേഖലകളിലെ സാങ്കേതിക പ്രശ്‌നങ്ങളും തകരാറുകളും പരിഹരിക്കുന്നതിനായി 'സർവീസ് ഓൺ വീൽസ്' പരിപാടി വാഗ്‍ദാനം ചെയ്യാൻ കമ്പനി പദ്ധതിയിടുന്നു. ഇതിനായി മാരുതി സുസുക്കി 300ൽ അധികം മൊബൈൽ യൂണിറ്റുകൾ സ്ഥാപിക്കും.

മാരുതി ഇ വിറ്റാര 49kWh, 61kWh എന്നിങ്ങനെ രണ്ട് ബാറ്ററി പായ്ക്ക് ഓപ്ഷനുകളോടെയാണ് വരുന്നത് . ഇവ യഥാക്രമം 144bhp ഉം 174bhp ഉം പവർ നൽകുന്നു. സിംഗിൾ ഇലക്ട്രിക് മോട്ടോർ സ്റ്റാൻഡേർഡായിരിക്കും. അതേസമയം വലിയ ബാറ്ററി പായ്ക്കിനൊപ്പം ഡ്യുവൽ മോട്ടോർ ഓൾവീൽ ഡ്രൈവ് സജ്ജീകരണം ഓപ്ഷണലായിരിക്കും. മാരുതി സുസുക്കി തങ്ങളുടെ പുതിയ ഇലക്ട്രിക് എസ്‌യുവി അതിന്റെ ഹൈ-സ്പെക്ക് അവതാരത്തിൽ 500 കിലോമീറ്ററിലധികം റേഞ്ച് വാഗ്ദാനം ചെയ്യുമെന്ന് സ്ഥിരീകരിച്ചു.

ടൊയോട്ടയുമായി സഹകരിച്ച് വികസിപ്പിച്ചെടുത്ത പുതിയ സ്കേറ്റ്ബോർഡ് ഇ-ഹാർട്ട്‌ക്റ്റ് ഹീറ്റക്റ്റ്-ഇ പ്ലാറ്റ്‌ഫോമിലാണ് പുതിയ മാരുതി ഇവി നിർമ്മിച്ചിരിക്കുന്നത്. ലെവൽ 2 ADAS സ്യൂട്ടിനൊപ്പം സ്റ്റാൻഡേർഡ് ഏഴ് എയർബാഗുകൾ, ടയർ പ്രഷർ മോണിറ്ററിംഗ് സിസ്റ്റം, ഇലക്ട്രോണിക് പാർക്കിംഗ് ബ്രേക്ക് എന്നിവയുമായി വരുന്ന ഇന്ത്യയിലെ ആദ്യത്തെ മാരുതി സുസുക്കിയായിരിക്കും ഇത്. 60ൽ അധികം നൂതന സവിശേഷതകളും നിരവധി നൂതന ഫീച്ചറുകളും ഉള്ള സുസുക്കി കണക്റ്റും ഇതിൽ ഉണ്ടായിരിക്കും.