ഈ ഷോറൂമുകളിൽ നിന്നും മാരുതി സുസുക്കി വിറ്റത് 60 ലക്ഷം പഴയ കാറുകൾ

മാരുതി സുസുക്കി ട്രൂ വാല്യു 60 ലക്ഷം കാറുകളുടെ വിൽപ്പന കണക്ക് മറികടന്നു. 2001 ൽ ആരംഭിച്ച മാരുതി സുസുക്കി ട്രൂ വാല്യു വർഷങ്ങളായി തുടർച്ചയായ വളർച്ച കൈവരിച്ചു, 2024- 2025 സാമ്പത്തിക വർഷത്തിൽ 492,697 കാറുകൾ വിറ്റു.

ഇന്ത്യൻ വിപണിയിലെ ജനപ്രിയ വാഹന ബ്രാൻഡാണ് മാരുതി സുസുക്കി. കമ്പനി എല്ലാ മാസവും ലക്ഷക്കണക്കിന് കാറുകൾ വിൽക്കുന്നു. അതേസമയം, സെക്കൻഡ് ഹാൻഡ് കാറുകൾ വിൽക്കുന്നതിലും കമ്പനി ഒന്നാം സ്ഥാനത്താണ്. കമ്പനിയുടെ പ്രീ-ഓണേഴ്‌സ് കാർ റീട്ടെയിൽ ചാനലാണ് മാരുതി സുസുക്കി ട്രൂ-വാല്യൂ (എംഎസ്ടിവി). ഇപ്പോഴിതാ മാരുതി സുസുക്കി ട്രൂ വാല്യു 60 ലക്ഷം കാറുകളുടെ വിൽപ്പന കണക്ക് മറികടന്നു. 2001 ൽ ആരംഭിച്ചതിനുശേഷം, എംഎസ്ടിവി വർഷങ്ങളായി തുടർച്ചയായ വളർച്ച കൈവരിച്ചു. 24-25 സാമ്പത്തിക വർഷത്തിൽ ആകെ 492,697 കാറുകൾ വിറ്റു.

ഉപഭോക്തൃ വിശ്വാസവും ആത്മവിശ്വാസവും വർദ്ധിപ്പിക്കുന്നതിനായി, മാരുതി സുസുക്കി ട്രൂ വാല്യൂ സർട്ടിഫൈഡ് പ്രീ-ഓൺഡ് കാറുകൾ ഒരു വർഷം വരെ വാറന്‍റിയും സൗജന്യ സേവനങ്ങളും നൽകുന്നു. ഇന്ത്യയിലെ 305 നഗരങ്ങളിലായി വ്യാപിച്ചുകിടക്കുന്ന 606 മാരുതി സുസുക്കി ട്രൂ വാല്യൂ ഷോറൂമുകളുടെ വിശാലമായ ശൃംഖലയുണ്ട്. കൂടാതെ, മാരുതി സുസുക്കി ട്രൂ വാല്യൂ ആപ്പിലൂടെയും വെബ്‌സൈറ്റിലൂടെയും പ്രീ-ഓൺഡ് കാറുകൾ ബ്രൗസ് ചെയ്ത് കണ്ടെത്താം. മോഡൽ, വില, സ്ഥാനം മുതലായവ അടിസ്ഥാനമാക്കിയ തിരയൽ ഫിൽട്ടറുകൾ ഉപയോഗിച്ച്, ടെസ്റ്റ് ഡ്രൈവുകളുടെയും മറ്റ് സവിശേഷതകളും കണ്ടെത്താം. ഓൺലൈൻ ബുക്കിംഗിനൊപ്പം മികച്ച ഓൺലൈൻ-ടു-ഓഫ്‌ലൈൻ പ്രവർത്തനം എംഎസ്‍ടിവിയുടെ ഡിജിറ്റൽ സാന്നിധ്യത്തെ ശ്രദ്ധേയമാക്കുന്നു.

ട്രൂ വാല്യൂ ഉപഭോക്താക്കൾക്ക് മാരുതി സുസുക്കി സ്മാർട്ട് ഫിനാൻസിന്റെ ഓപ്ഷനും ഉണ്ട്. പൊതു, സ്വകാര്യ ബാങ്കുകളിൽ നിന്നും എൻ‌ബി‌എഫ്‌സികളിൽ നിന്നും എളുപ്പത്തിലുള്ള ധനകാര്യ ഓപ്ഷനുകൾ വാഗ്ദാനം ചെയ്യുന്ന ഒരു സമഗ്ര ഡിജിറ്റൽ പ്ലാറ്റ്‌ഫോമാണിത്. ഇത് ട്രൂ വാല്യൂ കാറുകളെ കൂടുതൽ ആക്‌സസ് ചെയ്യാവുന്നതും ആകർഷകവുമാക്കി മാറ്റുന്നു. ഇത്തരം സംരംഭങ്ങൾ മാരുതി സുസുക്കി ട്രൂ വാല്യൂവിൽ പുലർത്തുന്ന അചഞ്ചലമായ വിശ്വാസത്തെ ശക്തിപ്പെടുത്തുന്നുവെന്നും സുതാര്യത, ഗുണനിലവാരം, ഉപഭോക്തൃ കേന്ദ്രീകൃതത എന്നിവയെ അടിസ്ഥാനമാക്കിയുള്ള ദീർഘകാല ബന്ധങ്ങൾ ഇവ വളർത്തിയെടുക്കുന്നുവെന്നും കമ്പനി പറയുന്നു.

60 ലക്ഷം വിൽപ്പന നാഴികക്കല്ല് ആഘോഷിക്കുമ്പോൾ, ട്രൂ വാല്യൂ കാറുകളിലുള്ള തങ്ങളുടെ എല്ലാ വിലപ്പെട്ട ഉപഭോക്താക്കളോടും അഗാധമായ നന്ദിയുണ്ടെന്ന് ഈ നേട്ടത്തെക്കുറിച്ച് സംസാരിച്ച മാരുതി സുസുക്കി ഇന്ത്യ ലിമിറ്റഡിന്റെ മാർക്കറ്റിംഗ് ആൻഡ് സെയിൽസ് സീനിയർ എക്സിക്യൂട്ടീവ് ഓഫീസർ പാർത്ഥോ ബാനർജി പറഞ്ഞു. രണ്ട് പതിറ്റാണ്ടുകൾക്ക് മുമ്പ് സ്ഥാപിതമായ മാരുതി സുസുക്കി ട്രൂ വാല്യൂ, വിശ്വസനീയവും സുരക്ഷിതവുമായ ഒരു പ്രീ-ഓൺഡ് കാർ ചാനൽ എന്ന നിലയിൽ വൈവിധ്യമാർന്ന ഉപഭോക്താക്കൾക്ക് സ്ഥിരമായി ഒരു മികച്ച തിരഞ്ഞെടുപ്പാണെന്നും നിലവിൽ ശരാശരി 31 വയസ് പ്രായമുള്ള യുവ ഉപഭോക്താക്കൾക്കിടയിൽ ഇതിന് ശക്തമായ മുൻഗണനയുണ്ടെന്നും ട്രൂ വാല്യൂ ഉപഭോക്താക്കളിൽ 85 ശതമാനം പേരും ആദ്യമായി വാങ്ങുന്നവരാണെന്നും അദ്ദേഹം വ്യക്തമാക്കി.