ഐ-പോഡിലെ ടെക്ക്നിക്കുകള്‍, ചെറുകുടുംബങ്ങളുടെ കീശയിലൊതുങ്ങും; ടിയാഗോയുടെ അടപ്പിളക്കുമോ ചൈനീസ് വണ്ടി?!

ഇലക്ട്രിക് പവർട്രെയിനിലേക്ക് മാറാൻ ആഗ്രഹിക്കുന്ന ചെറുകുടുംബങ്ങൾക്ക് അനുയോജ്യമായ നഗര യാത്രാ ഓപ്ഷനായി എംജി കോമറ്റ് സ്ഥാനം പിടിക്കും.

ചൈനീസ് വാഹന ബ്രാൻഡായ എം‌ജി മോട്ടോർ ഇന്ത്യ കോമറ്റ് ഇവി അവതരിപ്പിക്കാൻ ഒരുങ്ങുകയാണ്. ഇസെഡ് ഇവിയ്ക്ക് ശേഷം അതിന്റെ രണ്ടാമത്തെ പൂർണ-ഇലക്‌ട്രിക് വാഹനമായിരിക്കും ഇത്. ഇലക്ട്രിക് പവർട്രെയിനിലേക്ക് മാറാൻ ആഗ്രഹിക്കുന്ന ചെറുകുടുംബങ്ങൾക്ക് അനുയോജ്യമായ നഗര യാത്രാ ഓപ്ഷനായി എംജി കോമറ്റ് സ്ഥാനം പിടിക്കും. മാത്രമല്ല ഇതിന് ആക്രമണോത്സുകമായ വിലയും നിരവധി സാങ്കേതിക-അധിഷ്‌ഠിത സവിശേഷതകളും ലഭിക്കും.

എം‌ജി മോട്ടോർ ഇന്ത്യ കഴിഞ്ഞ ദിവസം ഒരു ടീസർ ചിത്രം പുറത്തിറക്കി. അത് സ്റ്റിയറിംഗ് വീൽ ഡിസൈൻ പ്രദർശിപ്പിച്ചിരിക്കുന്നു. അത് മൗണ്ടഡ് കൺട്രോളുകളോടെയാണ് വരുന്നത്. മുൻകാല ഐ-പോഡ് ഉപകരണങ്ങളിലെ ഫീച്ചറുകളിൽ നിന്ന് ഈ നിയന്ത്രണങ്ങൾ വളരെയധികം സ്വാധീനിക്കപ്പെട്ടതായി തോന്നുന്നു. ഇടതുവശത്തുള്ള നിയന്ത്രണങ്ങൾ ഇൻഫോടെയ്ൻമെന്റ് ഡിസ്പ്ലേ സ്‌ക്രീനിലൂടെ നാവിഗേറ്റുചെയ്യുന്നതിന് വേണ്ടിയുള്ളതാണ്. വലതുവശത്തുള്ള നിയന്ത്രണങ്ങൾ സംഗീതം നിയന്ത്രിക്കുന്നതിനും വോയ്‌സ് കമാൻഡുകൾക്കുമുള്ളതാണ്. ഇളം വർണ്ണ തീം ഉപയോഗിച്ച് ലേഔട്ട് തന്നെ വളരെ ലളിതമാണെന്ന് തോന്നുന്നു.

അതേ ടീസർ ചിത്രം ഡ്രൈവർ ഡിസ്പ്ലേ യൂണിറ്റുമായി ബന്ധിപ്പിച്ചിരിക്കുന്ന ഇൻഫോടെയ്ൻമെന്റ് സ്ക്രീനിന്റെ ഒരു കാഴ്ചയും നൽകുന്നു. ഹീറ്റിംഗ്, വെന്‍റിലേഷൻ, എയര്‍ കണ്ടീഷനിംഗ് തുടങ്ങിയവയ്‌ക്കുള്ള സർക്കുലർ കൺട്രോൾ ഡയലുകളും നീളമേറിയ എസി വെന്റുകളും ദൃശ്യമാണ്. എം‌ജി മോട്ടോർ ഇന്ത്യ അതിന്റെ ഓഫറുകളിൽ സാങ്കേതിക അധിഷ്‌ഠിത സവിശേഷതകളിൽ ഊന്നിപ്പറയുന്നത് തുടരുന്നു. കോമറ്റ് ഇവിയും ഇതിൽ നിന്ന് വ്യത്യസ്തമാകില്ലെന്നും കമ്പനി അവകാശപ്പെടുന്നു. 

നിലവിൽ ടാറ്റ ടിയാഗോ ഇവിയുടേതായ വിലയുമായി ലോഞ്ച് ചെയ്യുമ്പോൾ എംജി കോമറ്റ് ഇവി ഇന്ത്യൻ വിപണിയിലെ ഏറ്റവും താങ്ങാനാവുന്ന ഇലക്ട്രിക് കാർ ആയിരിക്കും . 17.3 kWh ബാറ്ററി പായ്ക്ക് ഉള്ളതിനാൽ, കോമറ്റ് ഇവിക്ക് 250 കിലോമീറ്റർ വരെ അനുയോജ്യമായ റേഞ്ച് ലഭിക്കും എന്ന് പ്രതീക്ഷിക്കുന്നു. നോർമൽ, സ്‌പോർട്ട് എന്നിങ്ങനെ രണ്ട് ഡ്രൈവ് മോഡുകളും ഉണ്ടാകും. വാഹനത്തിന്‍റെ ഉയർന്ന വേഗത മണിക്കൂറിൽ 100 ​​കിലോമീറ്റര്‍ ആയിരിക്കും. ഇവിക്ക് രണ്ട് വാതിലുകളുള്ള ഡിസൈൻ ഉണ്ട്. വെറും 815 കിലോഗ്രാം മാത്രമാണ് ഭാരം. പിൻ സീറ്റുകളിലേക്കുള്ള പ്രവേശനം മടക്കിയ മുൻ സീറ്റുകളിലൂടെയായിരിക്കും. കോമറ്റ് ഇവിയ്ക്ക് വളരെ ചെറിയ റോഡ് സാന്നിധ്യമാണ് ഉള്ളത്.  അതായത് ദൈനംദിന നഗര യാത്രകൾക്ക് ഇത് അനുയോജ്യമായ ഓപ്ഷനാണ് എന്ന് ഉറപ്പ്.