2023 ഹോണ്ട ഡബ്ല്യുആര്വി, കൂടുതൽ വിശദാംശങ്ങൾ പുറത്ത്
Synopsis
2023 ഹോണ്ട ഡബ്ല്യുആർ-വി എന്ന് വിളിക്കപ്പെടുന്ന പുതിയ ചെറു എസ്യുവി ടൊയോട്ട റൈസ്, ഡൈഹാറ്റ്സു റോക്കി, നിസാൻ മാഗ്നൈറ്റ്, കിയ സോനെറ്റ് എന്നിവയെ നേരിടും.
ജാപ്പനീസ് വാഹന നിർമ്മാതാക്കളായ ഹോണ്ട, 2022 നവംബർ രണ്ടിന് ഇന്തോനേഷ്യയിൽ ഹോണ്ട എസ്യുവി ആർഎസ് കൺസെപ്റ്റിന്റെ പ്രൊഡക്ഷൻ പതിപ്പ് അവതരിപ്പിക്കുമെന്ന് ഔദ്യോഗികമായി പ്രഖ്യാപിച്ചു. 2023 ഹോണ്ട ഡബ്ല്യുആർ-വി എന്ന് വിളിക്കപ്പെടുന്ന പുതിയ ചെറു എസ്യുവി ടൊയോട്ട റൈസ്, ഡൈഹാറ്റ്സു റോക്കി, നിസാൻ മാഗ്നൈറ്റ്, കിയ സോനെറ്റ് എന്നിവയെ നേരിടും.
2023 ഹോണ്ട ഡബ്ല്യുആർ-വി അതിന്റെ മൂത്ത സഹോദരനായ പുതിയ ഹോണ്ട ബിആർ-വിയുടെ അതേ പ്ലാറ്റ്ഫോം ഉപയോഗിക്കുമെന്ന് ഇന്തോനേഷ്യൻ മാധ്യമങ്ങൾ റിപ്പോർട്ട് ചെയ്യുന്നു. കണ്സെപ്റ്റ് മോഡലുമായി താരതമ്യപ്പെടുത്തുമ്പോൾ, പുതിയ എസ്യുവിക്ക് ബിആർ-വി, എച്ച്ആർ-വി എന്നിവയുൾപ്പെടെ വലിയ ഹോണ്ട എസ്യുവികളിൽ നിന്ന് പ്രചോദനം ഉൾക്കൊണ്ട് നിരവധി ഡിസൈൻ മാറ്റങ്ങൾ ലഭിക്കും. പുതിയ മോഡലിന്റെ ഫ്രണ്ട് ഫാസിയയിൽ ബ്രിയോയുടെയും ബിആർ-വിയുടെയും സംയോജനമുണ്ടാകും. കൂടാതെ ലൈറ്റിംഗ് സിസ്റ്റം ഡിസൈൻ എല്ലാ പുതിയ ഹോണ്ട സിവിക്കിൽ നിന്ന് പ്രചോദനം ഉൾക്കൊണ്ടും ആയിരിക്കും.
2023 ഹോണ്ട ഡബ്ല്യുആർ-വി എസ്യുവിയുടെ പിൻ പ്രൊഫൈലിന് പുതിയ എച്ച്ആർ-വിയുമായി സാമ്യമുണ്ട്. ആര്എസ് എസ്യുവി കോൺസെപ്റ്റുമായി താരതമ്യപ്പെടുത്തുമ്പോൾ, പുതിയ ഡബ്ല്യുആർ-വി മോഡലിന് പുതിയ HR-V RS-ന് സമാനമായ ക്രോം സ്റ്റഡ് ചെയ്ത RS ട്രീറ്റ്മെന്റോടുകൂടിയ കൂടുതൽ പരമ്പരാഗത ഫ്രണ്ട് ഗ്രില്ലും ലഭിക്കും. കൺസെപ്റ്റിന് കുത്തനെയുള്ള സ്ക്രീനും പിന്നിൽ പൂർണ്ണ വീതിയുള്ള എൽഇഡി സിഗ്നേച്ചറുകളും ഉണ്ടായിരുന്നു. പ്രൊഡക്ഷൻ പതിപ്പിന് കൂടുതൽ പരമ്പരാഗത ആംഗിളുകളും ടെയിൽ-ലാമ്പ് ക്ലസ്റ്ററുകളും ഉണ്ടായിരിക്കും. റൂഫ്-ഇന്റഗ്രേറ്റഡ് സ്പോയിലർ, വിപരീത എൽ-ആകൃതിയിലുള്ള എൽഇഡി സിഗ്നേച്ചറുകളുള്ള 3D-സ്റ്റൈൽ ടെയിൽ-ലൈറ്റുകൾ, ഡിഫ്യൂസർ ഏരിയയിൽ സിൽവർ ട്രിം എന്നിവ ഉൾപ്പെടുന്നതാണ് മറ്റ് ഡിസൈൻ ഹൈലൈറ്റുകൾ.
2023 ഹോണ്ട WR-V വ്യത്യസ്ത ചക്രങ്ങളുള്ള E, RS എന്നിങ്ങനെ രണ്ട് വകഭേദങ്ങളിൽ വാഗ്ദാനം ചെയ്യുമെന്നാണ് റിപ്പോർട്ട്. ഈ കോംപാക്റ്റ് എസ്യുവിയുടെ ക്യാബിൻ പുതിയ ബിആർ-വി, സിറ്റി സെഡാനുമായി ക്യാബിൻ പങ്കിടാൻ സാധ്യതയുണ്ട്. ടോപ്-എൻഡ് വേരിയന്റുകളിൽ സോഫ്റ്റ്-ടച്ച് മെറ്റീരിയലുകളുള്ള ഒരു ലേയേർഡ് ഡാഷ്ബോർഡ് ഇതിന് ഉണ്ടായിരിക്കും. വയർലെസ് കണക്റ്റിവിറ്റിയുള്ള വലിയ ടച്ച്സ്ക്രീൻ ഇൻഫോടെയ്ൻമെന്റ് സിസ്റ്റം, കണക്റ്റഡ് കാർ ടെക്, മൾട്ടി-ഫങ്ഷണൽ സ്റ്റിയറിംഗ് വീൽ, സെമി-ഡിജിറ്റൽ ഇൻസ്ട്രുമെന്റ് കൺസോൾ, റിയർ എസി വെന്റുകളുള്ള ഓട്ടോമാറ്റിക് എസി, ഇലക്ട്രിക് സൺറൂഫ് എന്നിവയും മറ്റുള്ളവയും ലഭിക്കാൻ സാധ്യതയുണ്ട്.
2023 ഹോണ്ട WR-V കോംപാക്റ്റ് എസ്യുവിക്ക് 121PS പവറും 145Nm ടോർക്കും ഉത്പാദിപ്പിക്കുന്ന 1.5 ലിറ്റർ i-VTEC പെട്രോൾ എഞ്ചിനായിരിക്കും കരുത്ത് പകരുകയെന്നാണ് റിപ്പോർട്ട്. ട്രാൻസ്മിഷൻ ചോയിസുകളിൽ ആറ് സ്പീഡ് മാനുവലും ഒരു സിവിടി ഓട്ടോമാറ്റിക്കും ഉൾപ്പെടാൻ സാധ്യതയുണ്ട്. സിറ്റി സെഡാന് കരുത്ത് പകരുന്നതും ഇതേ പവർട്രെയിൻ തന്നെയാണ്. പുതിയ WR-V-യ്ക്കൊപ്പം ശക്തമായ ഹൈബ്രിഡ് പവർട്രെയിൻ വാഗ്ദാനം ചെയ്യാൻ കമ്പനിക്ക് കഴിയും.
2023 ന്റെ ആദ്യ പകുതിയിൽ ഇന്ത്യൻ വിപണിയിൽ ഒരു പുതിയ കോംപാക്റ്റ് എസ്യുവി അവതരിപ്പിക്കുമെന്ന് ഹോണ്ട കാർസ് ഇന്ത്യ സ്ഥിരീകരിച്ചിട്ടുണ്ട്. പുതിയ മോഡൽ ഹ്യുണ്ടായ് വെന്യു, കിയ സോനെറ്റ്, ടാറ്റ നെക്സൺ, മാരുതി ബ്രെസ്സ എന്നിവയ്ക്കും മറ്റുള്ളവക്കും എതിരാളിയാകും. ഇന്തോനേഷ്യൻ-സ്പെക്ക് മോഡലിന് ഏകദേശം 4.1 മീറ്റർ നീളമുണ്ടാകുമ്പോൾ, ഇന്ത്യ-സ്പെക്ക് മോഡലിന് നാല് മീറ്ററിൽ താഴെയായിരിക്കും. സിറ്റിയുടെ പ്ലാറ്റ്ഫോമുമായി നിരവധി സമാനതകളുള്ള ഹോണ്ടയുടെ അമേസ് പ്ലാറ്റ്ഫോമിനെ അടിസ്ഥാനമാക്കിയാണ് ഇന്ത്യ-സ്പെക്ക് മോഡൽ. ഇത് ഒരു ബഹുമുഖ പ്ലാറ്റ്ഫോമാണ്, ഇത് വ്യത്യസ്ത ബോഡി ശൈലികൾക്കും എഞ്ചിൻ ഓപ്ഷനുകൾക്കും അനുയോജ്യമാണ്.