ഫാമിലി കാർ വാങ്ങാൻ പ്ലാനുണ്ടോ? ഇതാ ഡസ്റ്ററിന്‍റെ ചേട്ടൻ, ഏഴുസീറ്റുള്ള റെനോ ബിഗസ്റ്റർ!

ഡസ്റ്ററിന്‍റെ വിപുലീകൃത പതിപ്പായ ഡാസിയ ബിഗസ്റ്റർ ആഗോളതലത്തിൽ 2024 ഒക്ടോബറിൽ അനാച്ഛാദനം ചെയ്യപ്പെട്ടു. ഇന്ത്യ-സ്പെക്ക് മോഡൽ 2025-ൽ എത്തും. 

ഇന്ത്യൻ വിപണിയിൽ ഡസ്റ്റർ എസ്‌യുവി അവതരിപ്പിക്കാനൊരുങ്ങുകയാണ് ഫ്രഞ്ച് വാഹന ബ്രാൻഡായ റെനോ. ഇതിൻ്റെ വിപുലീകൃത പതിപ്പായ ഡാസിയ ബിഗസ്റ്റർ ആഗോളതലത്തിൽ 2024 ഒക്ടോബറിൽ അനാച്ഛാദനം ചെയ്യപ്പെട്ടു. അതേസമയം ഇന്ത്യ-സ്പെക്ക് മോഡൽ 2025-ൽ എത്തും. അന്താരാഷ്ട്ര മോഡൽ 5-സീറ്റർ പതിപ്പിലാണ് അവതരിപ്പിച്ചത്. എന്നാൽ റെനോ ബിഗ്സ്റ്ററിനെ 7-സീറ്റർ ലേഔട്ടിൽ അവതരിപ്പിക്കും എന്നാണ് റിപ്പോർട്ടുകൾ.

7-സീറ്റർ റെനോ ബിഗ്‌സ്റ്ററിൽ വൈ- ആകൃതിയിലുള്ള സ്ലീക്ക് എൽഇഡി ഹെഡ്‌ലൈറ്റുകൾ, സ്ലിവർ സ്‌കിഡ് പ്ലേറ്റ്, ബമ്പറിന് സമീപം ഫോഗ് ലൈറ്റുകൾ എന്നിവ ഉൾപ്പെടുന്നു. 19 ഇഞ്ച് ഡ്യുവൽ ടോൺ അലോയ് വീലുകളിൽ ഓടുന്ന എസ്‌യുവിക്ക് ഷഡ്ഭുജാകൃതിയിലുള്ള വീൽ ആർച്ചുകളുണ്ടാകും. പിൻവശത്തെ ഡോർ ഹാൻഡിലുകൾ സി-പില്ലറിൽ സ്ഥാപിക്കും. അതിൻ്റെ കറുത്ത ബോഡി ക്ലാഡിംഗ് എസ്‌യുവിയെ പുറത്ത് നിന്ന് കടുപ്പമുള്ളതാക്കുന്നു. വി-ആകൃതിയിലുള്ള എൽഇഡി ടെയിൽ ലൈറ്റുകൾ, ചങ്കി ബമ്പർ, സംയോജിത പിൻ സ്‌പോയിലർ എന്നിവ മറ്റ് ബാഹ്യ ഡിസൈൻ ഘടകങ്ങളിൽ ഉൾപ്പെടുന്നു.

ക്യാബിനിൽ ഉപയോഗിച്ചിരിക്കുന്ന സുസ്ഥിര സാമഗ്രികൾക്കൊപ്പം ഡ്യുവൽ-ടോൺ ഗ്രേ, ബ്ലാക്ക് ഇൻ്റീരിയർ തീം ഇന്ത്യ-സ്പെക്ക് റെനോ ബിഗ്സ്റ്ററിന് ലഭിക്കും. ഡാഷ്‌ബോർഡിൽ 10.1 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെൻ്റും 10 ഇഞ്ച് ഡിജിറ്റൽ ഡ്രൈവർ ഡിസ്‌പ്ലേയും ഉണ്ട്. കൂടാതെ, 7-സീറ്റർ എസ്‌യുവിയിൽ 6-സ്പീക്കർ അർകാമിസ് സൗണ്ട് സിസ്റ്റം, ഡ്യുവൽ-സോൺ ക്ലൈമറ്റ് കൺട്രോൾ, പനോരമിക് സൺറൂഫ്, റിയർ എസി വെൻ്റുകൾ, മാനുവൽ ലംബർ സപ്പോർട്ട് ഉള്ള ഇലക്ട്രിക്കലി അഡ്‍ജസ്റ്റ് ചെയ്യാവുന്ന ഡ്രൈവർ സീറ്റ് എന്നിവ ലഭിക്കും.

റെനോ ബിഗ്‌സ്റ്റർ 7 സീറ്റർ എസ്‌യുവിയിൽ ഒന്നിലധികം എയർബാഗുകളും പിൻ പാർക്കിംഗ് ക്യാമറയും ഉണ്ടാകും. അഡാപ്റ്റീവ് ക്രൂയിസ് കൺട്രോൾ, ഓട്ടോമാറ്റിക് എമർജൻസി ബ്രേക്കിംഗ് എന്നിവയുൾപ്പെടെ നിരവധി സവിശേഷതകൾ ഉൾക്കൊള്ളുന്ന അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റവും (ADAS) ഇതിലുണ്ടാകും. ആഗോള മോഡൽ ഒന്നിലധികം എഞ്ചിൻ ഓപ്ഷനുകളിൽ ലഭ്യമാണ്. ഇന്ത്യൻ പതിപ്പിന്, AWD സജ്ജീകരണമുള്ള 1.3 ലിറ്റർ ടർബോ പെട്രോൾ എഞ്ചിനും 1.5 ലിറ്റർ നാച്ചുറലി ആസ്പിരേറ്റഡ് പെട്രോൾ എഞ്ചിനും റെനോ വാഗ്ദാനം ചെയ്യാം. ഹൈബ്രിഡ് എഞ്ചിനും പിന്നീട് ചേർത്തേക്കാമെന്നും റിപ്പോർട്ടുകൾ ഉണ്ട്. വാഹനം താങ്ങാവുന്ന വിലയിൽ ആയിരിക്കും ഇന്ത്യയിൽ എത്തുക എന്നാണ് കരുതുന്നത്.