Rolls Royce electric : 2030-ഓടെ മുഴുവൻ മോഡലുകളും വൈദ്യുതീകരിക്കാൻ റോൾസ് റോയിസ്
Synopsis
സ്പെക്ടർ കൂപ്പെയ്ക്ക് പിന്നാലെ കള്ളിനൻ എസ്യുവി, ഗോസ്റ്റ് സലൂൺ, ഫാന്റം ലിമോസിൻ എന്നിവയുടെ പിൻഗാമികളും ഓൾ-ഇലക്ട്രിക് മോഡലുകളായിരിക്കുമെന്ന് ഇപ്പോര് പ്രഖ്യാപിച്ചിരിക്കുകയാണ് റോൾസ് റോയ്സ്
ഐക്കണിക്ക് ആഡംബര കാർ നിര്മ്മാണ കമ്പനിയായ റോൾസ് റോയിസ് (Rolls-Royce) 2023-ൽ തങ്ങളുടെ ആദ്യത്തെ ഓൾ-ഇലക്ട്രിക് മോഡൽ റോൾസ് റോയ്സ് സ്പെക്ടർ കൂപ്പെ അവതരിപ്പിക്കാന് ഒരുങ്ങുകയാണ്. ഇതുസംബന്ധിച്ച് റോൾസ് റോയ്സ് മുമ്പ് വെളിപ്പെടുത്തല് നടത്തിയിരുന്നു. 2030-ഓടെ ഐസി എഞ്ചിനുകൾ നിർത്തലാക്കാന് ഒരുങ്ങുകയാണ് കമ്പനി. സ്പെക്ടർ കൂപ്പെയ്ക്ക് പിന്നാലെ കള്ളിനൻ എസ്യുവി, ഗോസ്റ്റ് സലൂൺ, ഫാന്റം ലിമോസിൻ എന്നിവയുടെ പിൻഗാമികളും ഓൾ-ഇലക്ട്രിക് മോഡലുകളായിരിക്കുമെന്ന് ഇപ്പോര് പ്രഖ്യാപിച്ചിരിക്കുകയാണ് റോൾസ് റോയ്സ് എന്ന് ഓട്ടോ കാര് ഇന്ത്യ റിപ്പോര്ട്ട് ചെയ്യുന്നു.
റോൾസ് റോയിസ് 2030 വൈദ്യുതീകരണ തന്ത്രം
ഓരോ മോഡലിനും പകരം ഒരു ഇവി നൽകേണ്ടത് പ്രധാനമാണെന്നെന്നും 2030-ഓടെ പ്യുവർ-ഇലക്ട്രിക് ലൈനപ്പിലേക്ക് സ്ഥാപനം പുരോഗമിക്കും എന്നും ഓട്ടോകാർ യുകെയോട് സംസാരിച്ച സിഇഒ ടോർസ്റ്റൺ മുള്ളർ-ഒത്വോസ് പറഞ്ഞു. റോൾസ് റോയ്സ് അതിന്റെ 117 വർഷത്തെ ചരിത്രത്തിൽ മുൻവർഷത്തെ അപേക്ഷിച്ച് 2021ൽ കൂടുതൽ കാറുകൾ വിറ്റഴിച്ചുവെന്ന പ്രഖ്യാപനത്തിന്റെ പശ്ചാത്തലത്തിലായിരുന്നു ഒത്വോസിന്റെ വാക്കുകള്.
ബ്രിട്ടീഷ് സ്ഥാപനം വരും വർഷങ്ങളിൽ അതിന്റെ നിലവിലെ ശ്രേണി പുതുക്കും. എന്നാൽ കൂടുതൽ ജ്വലന മോഡലുകൾ പുറത്തിറക്കില്ല. ഇതോടെ കമ്പനിയുടെ അവസാന പെട്രോൾ പവർ വാഹനമായി റോൾസ് റോയ്സ് Mk2 ഗോസ്റ്റ് മാറിയേക്കും. ഒരു പ്രത്യേക പ്രോത്സാഹനമായി UK ഗവൺമെന്റിന്റെ 2030-ലെ പുതിയ ICE കാർ വിൽപ്പന നിരോധനത്തെ മുള്ളർ-ഒത്വോസ് എടുത്തുകാണിക്കുന്നു. എന്നാല് നിയമപരമായി മാത്രമല്ല കമ്പനി നയിക്കപ്പെടുന്നതെന്നും ലോകമെമ്പാടുമുള്ള യുവ ഉപഭോക്താക്കളാണ് കമ്പനിയെ നയിക്കുന്നതെന്നും കൂടാതെ കൂടുതൽ കൂടുതൽ ആളുകൾ വൈദ്യുതീകരിച്ച റോൾസ് റോയ്സിനായി സജീവമായി ആവശ്യപ്പെടുന്നുണ്ടെന്നും അദ്ദേഹം വ്യക്തമാക്കുന്നു. റോൾസ് റോയിസ് വാങ്ങുന്നയാളുടെ ശരാശരി പ്രായം സമീപ വർഷങ്ങളിൽ കുത്തനെ കുറഞ്ഞ് വെറും 43 ആയി എന്നും മുള്ളർ-ഒത്വോസ് പറയുന്നു.
എന്താണ് ആദ്യത്തെ റോൾസ് റോയിസ് ഇലക്ട്രിക്?
ആദ്യത്തെ റോൾസ് റോയിസ് ഇലക്ട്രിക് കാർ ഒരു പ്രോട്ടോടൈപ്പ് അല്ലെന്നും ഒരു യഥാർത്ഥ കാര്യമാണെന്നും 2023 ന്റെ നാലാം പാദത്തിൽ ഈ വാഹനത്തിന്റെ ആദ്യ ഡെലിവറികൾ എടുക്കുമെന്നും സിഇഒ, ടോർസ്റ്റൺ മുള്ളർ ഒത്വാസ് 2021 നവംബറില് പറഞ്ഞിരുന്നു. ആഗോള ഇലക്ട്രിക് കാർ വിപ്ലവത്തെ ഉയർത്തുകയും അസാധാരണമായ ഒരു പുതിയ ഉൽപ്പന്നത്തിനായി ഓൺ-റോഡ് ടെസ്റ്റിംഗ് പ്രോഗ്രാം ആരംഭിക്കുകയും അതിന്റെ ആദ്യത്തേതും മികച്ചതുമായ ഒരു സൂപ്പർ ലക്ഷ്വറി ഉൽപ്പന്നം സൃഷ്ടിക്കുകയും ചെയ്യുമെന്നും അദ്ദേഹം വ്യക്തമാക്കി.
റോൾസ് റോയിസ് ലോകത്തിലെ ഏറ്റവും മികച്ച കാറുകൾ നിർമ്മിക്കുന്നുവെന്നും അത് ഏറ്റവും ആഡംബരവും കുറ്റമറ്റതുമായ ഉപഭോക്തൃ അനുഭവം പ്രദാനം ചെയ്യുന്നുവെന്നുമാണ് കമ്പനി പറയുന്നത്. സ്പെക്ടർ ബ്രാൻഡിന്റെ ആദ്യത്തെ ഇലക്ട്രിക് കാർ ആയതിനാൽ, ഇവി പൂർണമായി കുറ്റമറ്റതാണെന്ന് ഉറപ്പുവരുത്താൻ, റോൾസ് റോയിസ് അതിന്റെ ആഗോള പരിശോധനയിൽ 2.5 ദശലക്ഷം കിലോമീറ്റർ സഞ്ചരിക്കും എന്നുമാണ് റിപ്പോര്ട്ടുകള്.
കമ്പനിയുടെ പവർട്രെയിൻ സാങ്കേതികവിദ്യയിലെ ഈ അടിസ്ഥാനപരമായ മാറ്റത്തിന്, വാഹനം പുറത്തിറങ്ങും മുമ്പ് ഉൽപ്പന്നത്തിന്റെ ഓരോ വശത്തെയും ഞങ്ങൾ പരിശോധിക്കേണ്ടതുണ്ട്. ഇതിനായി റോൾസ് റോയ്സിന്റെ ചരിത്രത്തിലെ ഏറ്റവും ആവശ്യപ്പെടുന്ന ടെസ്റ്റിംഗ് പ്രോഗ്രാം വിഭാവനം ചെയ്തെന്നും കമ്പനി അധികൃതര് പറയുന്നു.
സ്പെക്ടർ അവതരിപ്പിച്ചതിനുശേഷം, റോൾസ് റോയ്സ് 2030 ആകുമ്പോഴേക്കും അതിന്റെ മുഴുവൻ ഉൽപ്പന്ന നിരയുടെയും വൈദ്യുതീകരിക്കുമെന്നും ഇതിനു ശേഷം പരമ്പരാഗത ഇന്ധനങ്ങളില് ഓടുന്ന വാഹനങ്ങള് നിര്മ്മിക്കില്ലെന്നും കമ്പനി വ്യക്തമാക്കുന്നു.
ഇന്ത്യയിൽ റോൾസ് റോയിസ്
റോൾസ് റോയ്സിന് നിലവിൽ ഇന്ത്യയിൽ അതിന്റെ അഞ്ച് മോഡലുകളും വിൽപ്പനയ്ക്കുണ്ട് - വ്രെയ്ത്ത്, ഡോൺ, ഗോസ്റ്റ്, കള്ളിനൻ, ഫാന്റം. റോൾസ് റോയ്സ് ഇപ്പോൾ പുതിയ ഗോസ്റ്റ് ബ്ലാക്ക് ബാഡ്ജ് വരും മാസങ്ങളിൽ ഇന്ത്യയിലേക്ക് കൊണ്ടുവരാൻ ഒരുങ്ങുകയാണ്. റോൾസ് റോയ്സിന്റെ ഏഷ്യാ പസഫിക് റീജിയണൽ സെയിൽസ് മാനേജർ സാങ്വൂക്ക് ലീ അടുത്തിടെ ലോഞ്ച് സ്ഥിരീകരിച്ചു.