ഉപഗ്രഹ ടോളിന് ഇനിയും കാത്തിരിക്കണം! കാരണം ഈ ആശങ്കകൾ

ഉപഗ്രഹാധിഷ്ഠിത ടോൾ സംവിധാനം വരാൻ ഇനിയും വൈകും. കാരണം സുരക്ഷാ, സ്വകാര്യതാ ആശങ്കകൾ. കൂടുതൽ ചർച്ചകൾ വേണമെന്ന് സമിതിയുടെ റിപ്പോർട്ട്. 

ഹൈവേകളിൽ ഉപഗ്രഹാധിഷ്ഠിത ടോൾ സംവിധാനത്തിനായി ഇനിയും കാത്തിരിക്കേണ്ടിവരും. സുരക്ഷാ, സ്വകാര്യതാ ആശങ്കകൾ കാരണം കൂടുതൽ ചർച്ചകൾ ആവശ്യമാണെന്ന് വ്യക്തമാക്കി ഈ വിഷയത്തിൽ നയം രൂപീകരിക്കുന്നതിനായി രൂപീകരിച്ച കമ്മിറ്റി പ്രകടിപ്പിച്ച സാഹചര്യത്തിലാണ്  ഉപഗ്രഹാധിഷ്ഠിത ടോൾ സംവിധാനത്തിന്‍റെ വരവ് വൈകുന്നത് എന്നാണ് റിപ്പോർട്ടുകൾ.

ഉപഗ്രഹ അധിഷ്ഠിത ടോളിനായി ഓട്ടോമാറ്റിക് നമ്പർ പ്ലേറ്റ് റെക്കഗ്നിഷൻ (ANPR) ഫാസ്റ്റാഗ് സംവിധാനത്തിന്റെ പ്രവർത്തനങ്ങൾ നടന്നുവരികയാണെന്ന് കേന്ദ്ര റോഡ് ഗതാഗത, ഹൈവേ മന്ത്രി നിതിൻ ഗഡ്കരി ബുധനാഴ്ച രാജ്യസഭയിൽ രേഖാമൂലം നൽകിയ മറുപടിയിൽ പറഞ്ഞു. വ്യവസായ, അക്കാദമിക് മേഖലകളിൽ നിന്നുള്ള വിദഗ്ധർ ഉൾപ്പെടുന്ന കമ്മിറ്റി, ജനങ്ങളുടെ സുരക്ഷയുടെയും സ്വകാര്യതയുടെയും ലംഘനത്തെക്കുറിച്ചും സിസ്റ്റത്തിന്റെ മൊത്തത്തിലുള്ള പ്രവർത്തനത്തെക്കുറിച്ചും ചില ആശങ്കകൾ രേഖപ്പെടുത്തിയിട്ടുണ്ട്. ഇക്കാര്യത്തിൽ കൂടുതൽ ചർച്ചകൾ നടത്തണമെന്നും അതിനുശേഷം നയത്തിന് അന്തിമരൂപം നൽകണമെന്നുമാണ് ശുപാർശ.

നിലവിലുള്ള ഉപഗ്രഹാധിഷ്ഠിത നാവിഗേഷനോടൊപ്പം, ചില അധിക ഉപഗ്രഹ കണക്റ്റിവിറ്റികളും ആവശ്യമാണെന്ന് നിതിൻ ഗഡ്‍കരി പറഞ്ഞു. ഇതോടൊപ്പം, ശരിയായ റിസീവറിന്റെ വികസനവും ഒരു വലിയ പ്രശ്നമാണ്. ഇത് കൂടാതെ, പ്രതീക്ഷിച്ച ഫലങ്ങൾ കൈവരിക്കാൻ കഴിയില്ല. അർബൻ എക്സ്റ്റൻഷൻ റോഡിലെയും (UER-2) ദ്വാരക എക്സ്പ്രസ് വേയിലെയും പ്ലാസകളിൽ തടസരഹിത ടോൾ പിരിവിനായി ടെൻഡറുകൾ നൽകിയിട്ടുണ്ടെന്ന് ഗഡ്‍കരി പറഞ്ഞു. ഇതിന്‍റെ അടിസ്ഥാനത്തിൽ, മറ്റ് പ്ലാസകളിലും ഇത് ഘട്ടംഘട്ടമായി നടപ്പിലാക്കാൻ കഴിയും.

ഇലക്ട്രോണിക് ടോൾ പിരിവിനായി ലോകമെമ്പാടും നിന്ന് ദേശീയപാതാ അതോറിറ്റിയിൽ നിന്നും ഇതിനകം തന്നെ നിർദ്ദേശങ്ങൾ തേടിയിട്ടുണ്ട്. ഈ സംവിധാനം നടപ്പിലാക്കിക്കഴിഞ്ഞാൽ, ഹൈവേകളിലെ ടോൾ പ്ലാസകൾ ഇല്ലാതാകും. ഹൈവേയോ എക്സ്പ്രസ് വേയോ ഉപയോഗിക്കുന്ന അത്രയും മാത്രം ടോൾ നൽകേണ്ടിവരുമെന്നതിനാൽ ഈ സംവിധാനം ജനങ്ങൾക്ക് വലിയ ആശ്വാസം നൽകും. പുതിയ സംവിധാനം ജനങ്ങൾക്ക് വലിയ സാമ്പത്തിക നേട്ടങ്ങൾ നൽകുമെന്ന് കേന്ദ്രമന്ത്രി നിതിൻ ഗഡ്‍കരി പറഞ്ഞു. പുതിയ ടോൾ സംവിധാനത്തിൽ പ്രതിമാസ, വാർഷിക, 15 വർഷത്തെ പാസുകൾ നൽകാനും മന്ത്രാലയം പദ്ധതിയിടുന്നു. അതേസമയം അതിന്റെ നിരക്കുകൾ ഇതുവരെ തീരുമാനിച്ചിട്ടില്ല.