ജനപ്രിയ എസ്യുവി ഹാരിയറിന്‍റെ ഏഴ് സീറ്റർ വകഭേദവുമായി ടാറ്റ
ജനപ്രിയ എസ്യുവി ഹാരിയറിന്‍റെ ഏഴ് സീറ്റർ വകഭേദവുമായി ടാറ്റ. ഗ്രാവിറ്റാസ് എന്നുപേരിട്ട ഈ വാഹനം 2020ൽ ഇന്ത്യയിലെത്തും. ഹാരിയറുമായി ഡിസൈനിൽ കാര്യമായ വ്യത്യാസങ്ങളൊന്നുമില്ലാത്ത ഗ്രാവിറ്റാസിനെ 2019 ജനീവ മോട്ടോർ ഷോയിലാണ് ആദ്യം അവതരിപ്പിച്ചത്.
ടാറ്റയും ജാഗ്വാര്‍ ലാന്‍ഡ് റോവറും സംയുക്തമായി വികസിപ്പിച്ച ഒമേഗ പ്ലാറ്റ്‌ഫോമിലാണ് സെവന്‍ സീറ്റര്‍ എസ്‍യുവിയുടെയും നിര്‍മ്മാണം. നിലവില്‍ അഞ്ച് സീറ്ററാണ് ഹാരിയര്‍. ഇതിന്റെ ഇൻറീരിയറിൽ ഒരുനിര സീറ്റ് കൂടി അധികമായി ഉൾപ്പെടുത്തിയാവും ഗ്രാവിറ്റാസ് എത്തുക. 2.0 ലിറ്റർ ഡീസൽ എൻജിനാണ് ഗ്രാവിറ്റാസിന്‍റെയും ഹൃദയം. പക്ഷേ ട്യൂണിങ്ങിൽ മാറ്റം വരുത്തി കൂടുതൽ കരുത്ത് നൽകും.
ഈ ബിഎസ് 6 എൻജിൻ 170 പിഎസ് പവറും 350 എന്‍എം ടോർക്കും സൃഷ്‍ടിക്കും. ആറ് സ്പീഡ് മാനുവലാണ് ട്രാൻസ്മിഷൻ. ഹ്യുണ്ടായിയുടെ സഹകരണത്തോടെ വികസിപ്പിച്ച ആറ് സ്പീഡ് ഓട്ടോമാറ്റിക് ട്രാൻസിഷനും വാഹനത്തിലുണ്ടാകും. പെട്രോൾ എൻജിനിലും വാഹനം എത്തിയേക്കുമെന്നും റിപ്പോർട്ടുകളുണ്ട്.
ഫെബ്രുവരിയില്‍ നടക്കാനിരിക്കുന്ന 2020 ഇന്ത്യ ഓട്ടോ എക്‌സ്‌പോയിലായിരിക്കും ഇതിന്റെ ആദ്യ പ്രദര്‍ശനം. വാഹനത്തിന്റെ വില സംബന്ധിച്ച വിവരങ്ങളൊന്നും ടാറ്റ വ്യക്തമാക്കിയിട്ടില്ല. 15 ലക്ഷം റേഞ്ചിലായിരിക്കും വാഹനത്തിന്റെ പ്രാരംഭ വിലയെന്നാണ് സൂചനകള്‍.