ടെസ്ല നല്‍കുന്ന കനത്ത വിലക്കിഴിവുകൾ ചില വാഹന നിർമ്മാതാക്കളുടെ കച്ചവടം തന്നെ പൂട്ടിക്കുന്ന നിലയിലാണെന്നാണ് റിപ്പോര്‍ട്ടുകള്‍.
അമേരിക്കൻ ഇലക്ട്രിക്ക് വാഹന ഭീമനായ ടെസ്ല ഇൻ‌കോർപ്പറേറ്റ് ചൈനീസ് വാഹന വിപണിയിൽ ഒരു വിലയുദ്ധത്തിനാണ് തുടക്കമിട്ടത്. അത് ലോകത്തിലെ ഏറ്റവും വലിയ കാർ വിപണിയായ ചൈനയില്‍ വൻ ആശങ്കയാണ് സൃഷ്‍ടിച്ചരിക്കുന്നതായാണ് റിപ്പോര്‍ട്ടുകള്‍. ടെസ്ല നല്‍കുന്ന കനത്ത വിലക്കിഴിവുകൾ ചില വാഹന നിർമ്മാതാക്കളുടെ കച്ചവടം തന്നെ പൂട്ടിക്കുന്ന നിലയിലാണെന്നാണ് റിപ്പോര്‍ട്ടുകള്‍.
2022 ഒക്ടോബറിലാണ് ടെസ്ല ഈ വില യുദ്ധം ആരംഭിച്ചത്. എലോൺ മസ്‌കിന്റെ ഇലക്ട്രിക് വാഹന നിർമ്മാതാക്കളായ ടെസ്ല ഷാങ്ഹായുടെ പ്രാന്തപ്രദേശത്തുള്ള അതിന്റെ ഭീമാകാരമായ ഫാക്ടറിയിൽ നിർമ്മിക്കുന്ന മോഡലുകളുടെ വില കുറച്ചു. ടെസ്‌ലയുടെ പ്രാദേശികമായി നിർമ്മിച്ച കാറുകൾക്ക് കഴിഞ്ഞ വർഷത്തേക്കാൾ 14 ശതമാനം വരെ വിലക്കുറവും ചില സന്ദർഭങ്ങളിൽ യുഎസിലും യൂറോപ്പിലും ഉള്ളതിനേക്കാൾ 50 ശതമാനം വിലക്കുറവും വരുത്തിയതോടെയാണ് ചൈനീസ് കമ്പിനകള്‍ കുടുങ്ങിയത്.
ഇതോടെ എതിരാളികളും വില കുറയ്ക്കാൻ നിര്‍ബന്ധിതരായി. എക്സ്പെൻഗ് ഇങ്ക്, നിയോ ഇൻക് തുടങ്ങിയ പ്രാദേശിക കമ്പനികളും ഫോക്‌സ്‌വാഗൺ എജി, മെഴ്‍സിഡസ് ബെൻസ് ഗ്രൂപ്പ് എജി പോലുള്ള മുൻനിര അന്താരാഷ്ട്ര ബ്രാൻഡുകളും 70,000 യുവാൻ (10,000 ഡോളര്‍) വരെ കിഴിവ് വാഗ്ദാനം ചെയ്തു. ഫോർഡ് മോട്ടോർ കമ്പനിയുടെ മാക്ക് -ഇ ഇലക്ട്രിക് സ്‌പോർട് യൂട്ടിലിറ്റി വാഹനത്തിന്റെ പ്രാരംഭ വില 209,900 യുവാൻ ആയി കുറഞ്ഞു.ഇത് അമേരിക്കയിൽ ഉള്ളതിനേക്കാൾ ഏകദേശം മൂന്നിലൊന്ന് കുറവാണ്.
ബ്ലൂംബെർഗ് ന്യൂസിന്റെയും പ്രാദേശിക മാധ്യമങ്ങളുടെയും കണക്കുകൾ പ്രകാരം കുറഞ്ഞത് 30 കാർ നിർമ്മാതാക്കളെങ്കിലും വില കുറച്ചിട്ടുണ്ട്. ടെസ്ല വിപണിയുടെ ബാക്കി ഭാഗങ്ങളിൽ നാശം സൃഷ്‍ടിച്ചതായി ഷാങ്ഹായിലും സ്റ്റട്ട്‌ഗാർട്ടിലുമുള്ള ഓഫീസുകളുമായുള്ള കൺസൾട്ടൻസിയായ JSC ഓട്ടോമോട്ടീവ് മാനേജിംഗ് ഡയറക്ടർ ജോചെൻ സീബെർട്ട് തുറന്നടിച്ചതായി റിപ്പോര്‍ട്ടുകള്‍ ഉണ്ട്.
ചൈനയിലെ ഓട്ടോമൊബൈൽ മാനുഫാക്‌ചേഴ്‌സ് അസോസിയേഷൻ ബുധനാഴ്ച വിലയുദ്ധം അവസാനിപ്പിക്കാൻ ആഹ്വാനം ചെയ്തു, ഇത് വിൽപ്പനയിലെ മാന്ദ്യത്തിനും സാധനങ്ങളുടെ ശേഖരണത്തിനും ഒരു ദീർഘകാല പരിഹാരമല്ലെന്നും വ്യവസായം സാധാരണ പ്രവർത്തനത്തിലേക്ക് മടങ്ങണം എന്നും പറഞ്ഞു. അതിന്റെ ആരോഗ്യകരമായ വികസനം ഉറപ്പാക്കണമെന്നും ഓട്ടോമൊബൈൽ മാനുഫാക്‌ചേഴ്‌സ് അസോസിയേഷൻ ആവശ്യപ്പെട്ടു.
പ്രാദേശികമായി ഉൽപ്പാദിപ്പിക്കുന്ന വാഹനങ്ങൾക്ക് പ്രാദേശിക സർക്കാരുകൾ സബ്‌സിഡി നൽകുന്നത് അനുചിതമാണെന്ന് ചൈനീസ് മാധ്യമങ്ങളും പറയുന്നു. ഇവികളുടെ വർദ്ധിച്ചുവരുന്ന ഉപയോഗത്തിനൊപ്പം, ചൈനയുടെ വാഹനവിപണി വളരെ ആഴത്തിലുള്ള പുനഃക്രമീകരണത്തിലൂടെയാണ് കടന്നുപോകുന്നതെന്ന് നിയോ ചീഫ് ഫിനാൻഷ്യൽ ഓഫീസർ സ്റ്റീവൻ ഫെങ് ബുധനാഴ്ച ബ്ലൂംബെർഗ് ടെലിവിഷനു നൽകിയ അഭിമുഖത്തിൽ പറഞ്ഞു.
ഉപഭോക്താക്കൾ കൂടുതൽ സെലക്ടീവാകുകയും ആവശ്യം ശക്തമാവുകയും ചെയ്യുന്നുവെന്നും ഈ വർഷം കാൽ മില്യൺ ഇവി വിൽപ്പന എന്ന ലക്ഷ്യം കൈവരിക്കാൻ നിയോയ്ക്ക് ആത്മവിശ്വാസമുണ്ടെന്ന് ഫെങ് പറഞ്ഞു.